السلام عليكم ورحمة الله وبركاته
اسمحولى يا جماعة اقول رأي رغم اني مش مدرسة
اولا يستحسن ما تقفوش فى وش رياح التغيير لان مفيش حاجة هتثنيهم عن خططهم
ثانيا انتم ليه معتبرين الاختبارات ديه اهانه ليكم او ان التعليم بيقف عند مرحلة معينة ما دكاترة الجامعة طول عمرهم يذاكروا ويمتحنوا والنتايج بتطلع ادام الطلبة وعادى جدا .. فبلاش حساسية
ثالثا نية الوزارة لسه مااتضحتش الي الان فلو جت الامتحانات تعجيزية يبقى خلاص عرفنا انهم بيتملصوا من وعدهم بزيادة رواتبكم ومن حقكم الاعتراض والتظاهر والاعتصام عن التدريس كمان اما لو جت امتحانات عادية فيبقي مفيش داعي للمشاكل
اما عن نظام الكادر ده فانا شايفة انهم لازم يعيدوا صياغته لانه مش منطقى
يعني هم عايزين يعاملوكم زي دكاترة الجامعة بيحصلوا علي تريقتهم بعد امتحانات وشهادات يحصلوا عليها
يعني المعيد لما بياخد ماجستير بيترقي بيبقى مدرس مساعد انتم بعد ما تذاكروا وتمتحنوا هتبقوا ايه ؟ ايه معلم اول ومعلم خبير ده ؟! ولا ايه الشهادة اللي هتحصلوا عليها ديه اسمها ايه ؟ شهادة الكادر ؟!
وبعدين الموضوع مالوش علاقة بالسنين انت وشطارتك بقى .. قدرت تاخد الماجستير في سنتين ودكتوراة في تلاته هتبقى دكتور بعد خمس سنين .. لكن انتم لازالت ترقيتكم مرتبطة بالسنين .. طيب يبقى لازمتها ايه الامتحانات .. ماهو لامتحانات لسنين
وبعدين طالما القصة كدا يبقوا طالبوا بالمساواه الكاملة بدكاترة الجامعة ويبقى مرتبكم زيهم واهو كلكم مدرسين
ولا هي امتحانات وتعب قلب علي ملاليم
واخيرا بصوا للجانب المضيء ان الامتحانات ديه جمعتكم كدا وهتعمل ريفرش لمعلوماتكم وتخليكم تتنافسوا وترتقوا وماتبصوش لكلام الحاقدين .. زي مافي ناس فرحانه فيكم في ناس متعاطفة معاكم وبتأيدكم .