بالا نيلة ..
مانا اهو في تانية .. عملت ايه يعني ..هديت الكلية وبنيتها من اول وجديد ؟!
يابنتي اللي الناس مرت بيه قبل مني.. انا هامر بيه .. واللي انا مريت بيه .. انتي هاتمري بيه ..
هى منظومة متتاليه .. ومابتتغيرش .. الا اما ربك يريد بقي ..
اما بالنسبة بقي لحكاية انك عارفه ومش عارفه ماتخافيش .. مسيييرك هاتعرفي الكلية ونظامها
بصي انا هاقولك على اللي فيها وخلاص
اول يوم .. انتي هاتخشي مش عارفه اي حاجة في حاجة .. لا عارفه مدرج جـ من مدرج هـ
ولا عارفه مدرج العيوطي .. من مدرج مشرفة بتاع علوم !!
اول واحد هايقابلك هاتسأليه عن جدول مجموعتك .. هايقولك عند مدرج جـ .. هاتقوليله فين مدرج جـ
هايقولك امشي شمال في يمين في شمال في يمين طوالي .. هاتمشي زي ماهوا بيقولك هاتكتشفي انك راجعاله تاني !!
المهم بعد نجاح هاتوصلي للجدول .. ومن ثم هاتتلاقي جمهور كبير قدام الجدول وبالتلي هاتشوفي بالعافية
ومش بعيد تدبي خناقة معا اي حد وانتي واقفه .. عادي عادي !
بعد كدا هاتبصي للجدول والمواعيد وتكتشفي بقدرة قادر ان كان فيه محاضرة الساعة 8 الصبح وانتي هاتبقي ساعتها الساعة 10 .. وبالتالي فاتتك المحاضرة .. وتبقي ملخومة ومش عارفه تعملي ايه !
هاييجي اليوم اللي بعده تسألي على مدرج جـ هايقولولك .. هاتخشي هاتتلاقي المدرج كومبليت على اخره
وربنا يبقي كرمك لو لاقيتي مكان تقعدي فيه .. ولو لاقيتي مكان جنب اي ولد .. اقعدي ولا يهمك .. الوقفة وحشه صدقيني !! :D
هاتفضلي قاعدة طول المحاضرة ساعة كاملة .. دا في رمضان طبعا . اما غير رمضان فساعة ونص
هاتفضلي قاعدة تكتبي ورا الدكتور ولا انتي فاهمة اي حاجة في اي حاجة.. كل اللي انتي بتعمليه انك بتكتبي عشان شايفه الناس كلها بتكتب جنبيكي وهايبقي عيب عليكي ان هما يكتبوا وانتي لأ !!!
بعد المحاضرة ماتخلص .. هاتتلاقي شاب زي الورد جايلك وبيقولك لو سمحت انتي كتبتي اخر حاجة قالها الدكتور
هاتقوليله بسلامة نية اه .. ويقولك اصل انا مافهمتهاش اشرحيهالي .. وهاتك يا رغي .. لغية ماميعاد المحاضرة التانية ييجي ..
يخش الدكتور .. يرص الكلام زي اللي قبله ..وبعد مالمحاضرة تخلص تلاقي 500 واحد ناطط فوق راسه وماتعرفيش بيسألوه فيه ايه ؟!
المهم هاتخلص محاضراتك .. تطلعي من الباب دا ان عرفتي .. عشان بتبقي مطحنة طبعا لسببين
1- ان الناس كلها عايزه تخلص وتخرج
2- ان فيه فرقه تانية عايزة تخش مكانكوا عشان تلحق تحجز . وياسعدكوا يا هناكوا لو كانوا سنة اولي برده !!
مش هاتطلعي من المدرج في يومك دا !!
بعد نجاح عظيم .. وبعد الخروج من المدرج بحمدلله وتوفيقه .. مش هاتكوني لسه صاحبتي
هاتحسي بالكآبة .. فهاتنوي اليوم اللي بعده انك تتصاحبي عشان ماتحسيش بالخنقة
هابقي اكملك باقي القصة بس بعدين .. او بمعني اصح هاعمل زي الروائيين المشهورين
يتبع >>>> :D