مجموعة (ز) .. اللي هيا (و) سابقا ..
وماتسأليش عملت ايه السنة اللي فاتت عشان مش ناقصة نكد !!
نكمل بقي القصة ..
انتي بعد مامر اليوم الاول والتاني على خير والحمدلله
هاييبقي عندك غالبا اجازة .. وبعد كدا اليوم التالت يطل بشمسه المشرقه على قبة الجامعة عشان تنور مدرج العيوطي البهيج !!
وتدق ساعة الجامعة الساعة الثامنه صباحاً .. معلنة بداية يوم دراسي جديد حافل بالنشاط والحيوية .. ههههه قال يعني !!
هاتنزلي من بيتك معززة مكرمة . هاتحاولي تتزوقي عشان تبقي زي زميلاتك الحسناوات اللي في المدرج !
ومعاكي شنطتك وفيها قلمك وكشكولك والكام كتاب لزوم الدح بتاع اول السنة .. قال يعني انتي مهمته اوي ..
تركبي المترو وهوب تقومي نازلة محطة جامعة القاهرة اللي غالبا بتبقي مكتظة بالطلبة اللي جايين من شتى انحاء القاهرة
المهم هاتيجي تخشي من البوابة وانتي فرحانه انك عديتي من غير كارنيه ..
هاتخشي المدرج بتاع العيوطي .. وانتي في دماغك 3000 حاجة .. اولهم امتي ياربي هاييجي الدكتور ونخلص ؟!
هاتقعدي تلفي حواليكي وتبصي للناس والبشر وبتتأملي في جمال المدرج من جوا .. وعماله برده تسألي الدكتور ماجاش ليه ؟!
والمهم بعد عشر دقايق من التفكير تفاجأي بان شوية شباب كدا طلعوا على المدرج ويقعدوا يقروا في قران
دول ياستي بتوع الاخوان المسلمين .. ماعلينا سيبك منهم
المهم شوية وهاتتلاقي الدكتور داخل.. هاتحاولي تتأهبي للموقف وتطلعي الكشكول والكتاب والقلم والمسطرة !!
نوبروبليم .. شئ عادي .. بعد كدا مش هاتستعملي دا كله نهائي ..
هاتكتبي المحاضرة والمره دي هاتبدأي تفهمي عشان هاتكوني ربطتي كلام المحاضرة اللي فاتت معا المحاضرة الحالية
وساعتها هايبان الدكتور دا شرحه كويس ولا وحش ..
اثناء المحاضرة يبقي حظك وحش لو ربنا رزقك باتنين رغايين وراكي مش هاتعرفي تسمعي منهم حاجة
نصيحة .. حذريهم في الاول.. عندوا .. قومي بكل جرأة وقولي للدكتور .. ولا يهمك !
في البريك هاتبدأيي تتصاحبي على بنت .. والبنت هاتكون متصاحبة على بنت تانية .. وتبدائي تعملي لنفسك جروب
وتمر الايام والمحاضرات .. لغاااااااااااية مايجي ميعاد اخر محاضرة في الترم .. ودا بيبقي موال تاني
اقدر اقولك كفاية .. ويتبع >>>
|