لا طبعا .. انا قولتلك النظام العام قبل كدا
انتي بتمشي عادي جدا طول السنة ..
بس فيه بالنسبة للترم الاول .. فيه 3 مواد ذاكريهم اول بأول من اول السنة عشان ماتضيعيش في الاخر
المحاسبة المالية .. والرياضة البحتة .. والسلوك الانساني
وركزي شوية على السلوك الانساني عشان هى مادة طويلة شوية .. وبتوصل لييجي 18 شابتر
طبعا مش معقول انتي في اسبوعين هاتخلصي 18 شابتر بحالهم !!
اما المحاسبة المالية .. فاتفهميها يعني تفهيمها .. ولو مافهمتيهاش مش هاتفهمي اي محاسبة تانية
وعشان تبقي عارفه المحاسبة المالية دي انا اكتشفت انها هايفة .. وتعتبر الف باء محاسبة
وفي جامعات تانية بيسموها princeples of accounting ..
واعملي حسابك انك هاتاخديها في الترم التاني بس بالانجليش ..
اما الرياضة البحتة .. فهى كلها حل مسائل .. شدي في المسائل وحلي كتير
وركزي على التطبيقات اللي الدكتور هايقول عليها .. وربنا يبقي كرمك لو دكتور مصطفى الفقي هوا اللي ادالك
مصطفي الفقي دا هوا يعتبر وكيل مركز البحوث التجارية .. اللي هوا في ضهر مدرج العيوطي دا
اما باقي المواد .. ادارة ، موارد اقتصادية .. فدي بالبلدي كدا انجز في الوينجز !
وبرده يبقي ربنا كرمك لو دكتور عادل زايد هوا اللي اداكي الادارة دي .. تقريبا ممكن يلغي نص الكتاب !!
بس .. في اخر الترم .. واظبي شوية على الحضور .. واعرفي ايه اللي ليكي واللي عليكي
شوفي الملغي ايه بالظبط .. وركزي في الاسئلة اللي الدكاترة بيقولوا عليها في الاخر
ونصيحة .. اذا مثلا .. مثلا يعني .. الدكتور جيه اتنرفز عليكوا في مرة وقالكوا باقي المحاضرة مشروحة
احتمال 80 % ان اللي ماشرحوش دا ييجي في الامتحان .. وهوا كل الامتحان اساسا من 20
من 10 لـ 12 مقبول .. من 13 لـ 15 جيد .. من 16 لـ 17 جيد جدا .. من 18 لـ 20 امتياز .. ربنا يوعدنا ويوعدك بيه قادر يا كريم !
من الاخر بقي .. فيه نصيحة كدا كان اخويا قالهالي قبل ماخش الجامعة وماعرفتش انها صح الا بعد مالسنة خلصت ..
لو ذاكرت عشان تنجح .. هاتسقط .. ولو ذاكرت عشان تجيب تقدير .. ربنا هايكرمك وتجيبه ..
النظرية دي مستخدمة في كليتين .. اداب وتجارة
|