سيد قراره
بيقولوا قال مجلس وموقر
طيب مين وقره يا جماعه
دى عمايل اعضاءه تعكر
دم بلد لكن بفظاعه
بيقولوا قال سيد لقراره
طيب مين سيده يا اخواننا
لو تدخل وتشوف اسراره
تعرف انه سامم فى بدننا
معظم اعضائه مابيجوش
واللى بيجى بيكون متأخر
وفى نوع تانى ماتشوفهوش
وان شفته تلاقيه بيشخر
قاعدين بيمرروا قوانين
تقطم وسط الشعب بحاله
مرروا بيها عيشت الملايين
وكمان شفطوا بيها امواله
فيهم عضو يا الف خساره
ع النواب المحترمين
جاب مزبله سماها عباره
وغرق فيها كتير مساكين
ولا كياس الدم اياها
اللى ما تفهم فين عملوها
اصل الناس كت ناقصه عياها
علشان نوابها يعيوها
ولا حبيبنا بتاع العز
قال ده يمسك لجنه خطه
وادى شطانه عمال بيوز
فتحوا كرار وسابوه للقطه
ولا التانى واخدهالى عافيه
شايف روحو طويل وعريض
عايش دور زعماء المافيه
ناقصه كمان قتل وتحريض
ودى عينه وفى غيرها كتير
لو ننكشها دخلنا متاها
وكلامنا راح يبقى خطير
لا ياعمى.... خلينا براها
لما لقوه مليان بفضايح
قالوا ضرورى نخبى حقيقه
جم قبل ما تطلع له روايح
حرقوا ورقهم وقالوا حريقه
دكتور
عادل عيد