حلقة (2) التوعية الدستورية " حملة مصر الواعية "
النهاردة بكمل حوارى مع بيومى عن الدستور نسمع النهاردة كلامنا كان ايه
-السلام عليكم
-و عليكم السلام و رحمة الله و بركاته
-ازيك يا بيومى
-الحمد لله تمام
-و ايه اخبار الوعى ؟
-تمام بس لسه ما كملناش كلامنا
-احنا وقفنا لحد فين المرة اللى فاتت
-وقفنا عند المادة 76 من الدستور
-اه .. شوف يا سيدى المادة دى بقى المادة اللى بنتظم تولى منصب رئيس الجمهورية و طريقة الاختيار .... زمان كان بالاستفتاء الشعبى بعد مبايعة مجلس الشعب لكن فى تعديلات مايو 2005 تم التعديل عشان تكون طريقة تولى منصب الرئيس زى أى رئيس فى الدنيا بالانتخاب الحر المباشر و الاختيار المتعدد
-ايوة و حصلت الانتخابات فى سبتمبر 2005
-صح .. بس مش ده اللى قالته المادة بس
-امال ايه تانى ؟
-المادة نصت على شروط الترشح أن يحصل على موافقة مكتوبة من 250 عضوًا علىالأقل من المنتخبين بمجلسي الشعب والشورى والمجالس الشعبية المحليةللمحافظات و لا بد لمرشحى الأحزاب أن يكون الحزب له نسبة 5% من مقاعد غرفتي البرلمان.
-اه كدة فهمت .. طب اسأل فى حاجة كمان ؟
-اتفضل
-واجبى ايه و حقوقى فين من الدستور
-كتيييييييييير هقولك اهم النقاط
-ماشى
-بص يا سيدى انت مواطن مصرى عربى المفروض انك تعمل على تحقيق الوحدة العربية طبقا للمادة (1) و كمان الشريعة الإسلامية هى مصدر التشريع القانونى للبلاد طبقا للمادة (2) كمان السيادة للشعب وحده يعنى ليا و ليك و احنا المفروض نحميها و نحافظ عليها طبقا للمادة (3)
-طب ازاى ؟
-يغنى نحمى سيادتنا بالاعتراض لو فيه حاجة غلط و بالتأييد لو فيه حاجة صح و مشاركتنا فى الانتخابات و حرية التعبير عن الراى و بحاجات كتير ممكن نحفظ و نصون سيادتنا دى اللى نص عليها الدستور
-جميل و ايه تانى ؟
- كل مواطن له الحق فى تكوين حزب بالرجوع لقانون الأحزاب شرط ما يكونش قائم على اساس دينى او تفرقة عنصرية بسبب الجنس أو الأصل طبقا للفقرة الثالثة فى المادة (5) كمان من حقك ان الدولة تكفل ليك تكافؤ الفرص فى التعليم و التعيين و جميع خدمات الدولة طبقا للمادة (8) المفروض كمان ان فيه تأمين صحى و اجتماعى الدولة بتكفله لكل مواطن و كمان فى حالة العجز عن العمل و البطالة و الشيخوخة ليك فى الحالات معاش تقبضه من الدولة وفقا للقانون ده اللى بتقوله المادة (17) من الدستور
-ههههههههههههههههههههههههههه
-بتضحك على ايه يا بيومى ؟
-لا ابدا ابدا كمل
-مش من حق اى حد مصادرة أموالك إلا بحكم قضائى طبقا للمادة (36) و كمان الضرايب فى البلد تقوم على شئ واحد و وحيد و هو العدالة الاجتماعية طبقا للمادة (38) كل المواطنين سواء أمام القانون و لا أحد فوق القانون بسبب سلطة او مال او جنس او عقيدة طبقا للمادة (40) و كمان مش من حق اى حد يحبسك او يأذيك أو يقيد حريتك إلا فى حالات التلبس فيضمن الدستور حرية شخصية لكل المواطنين و عدم إيذاءهم نفسيا او جسديا و لا يجوز تحديد الاقامة إلا بقرار من الجهات المختصة طبقا للمادة (41) و إذا كان الحبس بموجب القانون تجب معاملة الشخص المقرر عليه بالحبس معاملة تليق بكرامة الانسان مع عدم جواز ايذاءه بدنيا او معنويا أو حبسه فى غير الاماكن الخاضعة للقوانين الصادرة لتنظيم السجون
-ههههههههههههههههههههههههههههه
-برده بتضحك !!
-طبعا لازم اضحك عموما كمل
-حاضر يا سى بيومى طبقا للمادة (47) من الدستور اللى انت عمال تضحك على مواده من صباحية ربنا بتكفل حرية الرأى و التعبير و تكفل النقد الذاتى للأشخاص و النقد البناء بما يحافظ على سلامة الوطن
-هسألك سؤال ؟
-اتفضل
-انت متأكد ان ده دستور جمهورية مصر العربية ؟
-ايوة يا بيومى ليه
-و لا ليه و لا حاجة
-عموما خلاص انا نازل الدقى و بكرة نتكلم
-بكرة هنتكلم عن الناس اللى فوق بيعملوا ايه و اختصاصتهم ايه سيبك مننا احنا
-ماشى خد بالك من نفسك
-ان شاء الله
-السلام عليكم
-و عليكم السلام و رحمة الله و بركاته
و الحلقة الجاية آخر حلقات التوعية الدستورية
|