[conan_egypt]

المشاركة الأصلية كتبت بواسطة love_queen_emy

ميرسيي بجد علي الموضوع ده لانه رائع وبناء ويسعدني إني أرد عليه

أسئلة مطروحة للنقاش :

كيف كانت الفترة التي قضيتها هناك خارج مصر؟ وكيف كانت أحوالك الدراسية ؟
كانت فترة صعبة كنت ساعات بحس إني في سجن كبير وكل سنه باخد إفراج وهو نزولي مصر رغم إني بحب السعودية جدا بس أكيد عشقي لمصر وحنيني ليها يفوق أي حب لأي بلد تانيه وبالنسبه لأحوالي الدراسية كنت الحمد لله دايما من الأوائل تدرجت لغاية ما وصلت للترتيب التاني علي المدرسة كان نفسي أبقي الأولي لكن كل شئ نصيب
والحمد لله علي كل شئ
ما هي نظرتك لمستقبلك في الجامعات المصرية ؟
كنت زمان ببصلها علي أنها حاجه جميلة مستنياها بفارغ الصبر لكن دلوقت بقيت خايفة من حاجات كتير فيها وحاسه إنها هتبقي مرحلة صعبة وخصوصا إن بابا وماما هيرجعوا تاني وهبقي مع تيتا فـ الموضوع صعب من كل النواحي لكن إن شاء الله بالإرادة والعزيمة هتخطي كل الحواجز وهحافظ إن شاء الله علي مستوايا الدراسي
وعلي مبادئي وبإذن الله تعدي المرحلة دي بسلام
ما هو الفرق بين التعليم في الخارج وبين التعليم في مصر ؟
فرق كبير في السعودية كان التعليم أسهل من مصر أكيد رغم إن المناهج متشابهه لكن الفرق إن الإمتحانات هناك بتبقي معظمها واضحه والنقط اللي محتاجه زكاء مش كتير أووي عكس هنا خالص
لو عاد بك الزمن للوراء هل كنت ستحصل على الثانوية من مصر ولا من الخارج ؟
لو رجع بيا الزمن كنت هتمسك أكتر بإني أخد الثانوية من هناك بالذات بعدما شوفت دفعتي اللي هنا في مصر إتبهدلوا قد إيه في الإمتحانات والمجاميع قد إيه نازله بجد بحمد ربنا إني كنت هناك
ما هي طموحاتك في مصر ؟
طموحاتي في مصر كبيرة أووي مع ذلك أنا قنوعه وأتمني إني ألحق هندسة بترول السويس أو طب أسنان بجد نفسي في حاجه منهم و نفسي اتفوق في دراستي وأبقي من الأوائل دايما مع إني عارفه إن ده بيبقي صعب علي اللي جايين من السعودية لكن بالإرداة والتفاؤل واهم حاجه الإيمان بالله هزلل الصعاب بإذن الله
هل لا زلت تجد في قلبك الحنين للعيش خارج مصر ؟
والله وحشتني ساجر ودي البلد إللي كنت فيها في السعودية ووحشتني لمتي مع أصحابي هناك في المدرسة من كل الجنسيات العربية ومدرساتي وحشوني لأني كنت بحبهم جداااا ووحشتني شوارعها وكل حاجه فيها ووحشتني مكة اوووي لأني متعودتش إني أغيب عنها كتير بجد حاسه بحنين بس عمره ما هيكون قد حنيني لنزول مصر لما ببقي في السعودية يعني بجد محتارة وكأني سبت قلبي في البحر الأحمر لاهو هنا ولا في السعودية تاه مني في النص
وهل تفكر في العودة الى هناك ؟
أنا هروح بإذن الله طبيعي في الأجازات علشان أشوف العيله لكن متوقعش إني ممكن أرجع مثلا أشتغل هناك صعب

ميرسيي أوووي علي الموضوع الرائع ده خلتني قولت كلام كتير كان نفسي أقوله وفضفت وأكيد إحنا كعائدين من الخارج نفهم بعض أكتر لأن ظروفنا واحده وأنا مبسوطة إني معاكم وبعتذر علي الإطالة الغير مقصودة وربنا يوفقكم جميعا وإلي الأمام دائما

تقريبا نفس الشعور اللي انا حاسه وتقريبا برضه نفس اجاباتي عن الأسئلة
يمكن عشان كنا عايشين تقريبا في حته واحدة
على فكرة انا برضه كنت عايش قريب من الدوادمي
في مدينة اسمها عفيف واكيد حاضرتك عارفاها
شكرا جزيلا ليكي يا love_queen_emy
وكل سنة وانتي طيبة