قوم يا شهيد أكتوبر قولي: علشان مين كان استشهادك
كان علشان الأرض اتباعت واتباعت تربة أولادك
كان علشان المجد الظلمة باعوا ف مصر تاريخ أمجادك
كان علشان مصر المحروسة قلعت ملط ف حفل مزادك
******
قوم يا شهيد أكتوبر قابل جرحي الحرب الي مواعدينك
بعد ما أصبح نصرك سلعة بيتاجروا بيها ناس بايعينك
تاجروا بلحمك تاجروا بعضمك تاجروا حتي ف ملك يمينك
دمك أصبح غاز بنبيعه وبإرادتنا لناس دبحينك
******
قوم يا شهيد أكتوبر كدب اللي يقول ف هواها يفوقك
قوم دول باعوا مصر حبيبتك يوم ما باعو لنا الوهم ف سوقك
قوم خد حقك م اللي خانونا لاجل الدم ما يملا عروقك
لاجل إن جيت تستشهد تاني تاخد منهم كل حقوقك
******
قوم يا شهيد أكتوبر وافهم إن جميلك راح لولادهم
قوم هات كل إخوانك واصحي لاجل يغيروا من استشهادهم
قوم دول عملوا دمك ميه اللي مسطر كل أمجادهم
قوم دول ضحكوا عليك وكلوها لما قالولنا مصر بلدهم
******
قوم يا شهيد أكتوبر وادفع دمك للي صحيح يفديك
قوم دول باعوا وسامك خردة للي بيدفع من أعاديك
قوم علشان أصغر أحفادك ياخد إيدك ويوريك
إن ف مصر بلدنا الظلمة باسم الشعب متاجرين بيك
|