[قطرات ندى]

المشاركة الأصلية كتبت بواسطة amro_alex

صباح الخير يا جماعة عليكم كلكم........انا قولت نتسلى شوية عقبال النتيجة ما تتطلع....


معظمنا امتحنا مستوى رفيع الحمدلله......


عايز كل واحد يقولي بقى :

1- اللجنة كانت عاملة ازاي ؟؟(( كووسة يعني ولا لا شديدة ))


2-المراقبين كان ايه نظامهم ؟؟؟ ((طيبين يعني ولا غلسين و مولعنها ))


3- حصل معاك اي موقف وانت في اللجنة ؟؟ لو فييه يا ريت تقولوا



انا حبدأ :

1- اللجنة كانت كوووسة بعد اول نص ساعة ويا سلاام على التعاون بس كان التعاون ملهووش اي لزمة عشان

تقريبا كنت انا اللي مذاكر .

-2المراقبييييييييين عسل اوي وطيبين خالص مش عايز اقولكوا ((مش عايزين فضايح خليها سر )).


3- اه حصل معايا موقف.... انا كنت لابس تي شرت ابيض مش عايز اقولكوا اني طلعت من اللجنة التي شرت

اسود خالص من كتر التراب اللي كان مغرق اللجنة وكمان كنت بمتحن في اوحش حتة في اسكندرية (( والدي كتب غلط قي السفارة)) بس ما كنت وانا بحل اللاقي الستات بتنشر الغسيل من الشبابيك وتقريبا الشابك بتاع المدرسة لازق فيهم ....ده غير الفرح اللي كان معمول تحت شباك اللجنة ..يا جماعة كان يووم فصلة بجد.


يلا مستني ردكم

الحمد لله اللجنة بتاعتي كانت كويسة والمدرسة نظيفة ومفيش حشرات الحمد لله الحمد لله عشان ربنا بيحبني
بس أصل موضوع الحشرات ده صعب برده كدا مش هعرف أحل حاجه وممكن أطلع من اللجنة

المراقبين بقى كانوا كويسين واصلا مكنش فيه حد بيتكلم مع حد يعني انا مش لاحظت ان فيه اي كلام او ازعاج او يمكن انا كنت مركزة اوي في ورقتي بس المراقبين لقيوا الوضع مستقر وهادئ فكانوا ساكتين في آخر اللجنة بس المراقبين قالوا لبعض البنات على الاجابات لان البنات مكنوش عايزين يروحوا
فيه مدرسة دخلت علينا سألتنا انتم خلصتم ولا لسه ؟؟ اللي مخلصش يرفع ايده ؟؟ فيه اتنين رفعوا ايديهم وانا كان قدامي سؤال لسه بفكر فيه في الخريطة طبعا فرفعت ايديا فقالت يعني كل الفصل مخلص طيب اوك اصل اللجنة التانية خلصوا وطلعوا تقدروا تطلعوا انتم كمان والتلاته اللي محتاجين كمان وقت يخلوهم قاعدين نو بروبلم
جه المراقبين ياخدوا الورق من البنات محدش راضي يسلم الورقة ويسالوهم انتم مش خلصتم ؟؟فكان الرد بنراجع يا مستر وطبعا كل شويا بقى واحدة تدخل تقول ايه ده لسه مخلصتوش ده في الترم الاول خلصوا الامتحان في 5 دقايق بس وجابوا العشرة هو الامتحان صعب ؟ الكلام ده كان بيستفزني جدا

كانت لجنتي اغلبها من السعودية واحنا خارجين بقى كانوا بتوع اللجان واقفين لينا قبل ما ننزل على السلم وجبتي كام يا حبيبتي وعملتي ايه انتي جاية منين؟والكلام ده فطبعا كل اللي قدامي جايبين 100 ومجاميع السعودية اللي حضرتكم عارفينها ولما سألوني فبقولها 95 قالتلي جاية منين قولتلها من سلطنة عمان فقالتلي اعمال سنة برده؟ قلتلها اه
السؤال الان يعني ايه اعمال سنه برده ده هما 30 % بس وبناخدهم بطلوع الروح ابحاث وتقارير وحضور وغياب والشروط بتاعة المدرسين بقى والاختبارات الفصلية مش عارفه بيخترعوها ازاي

السؤال بتاعها ده ضايقني شويا بس انا كنت مش فاضية اضايق يعني كنت سهرانه اليوم اللي قبل الامتحان ومنمتش خالص معرفتش نهااااائي وكنت عماله اعيط كأني أول مرة ادخل امتحان بس الحمد لله جبت العشرة

الشيء اللي لفت نظري في الامتحان ورق الاجابة و ورق الاسئلة سبحان الله ورقة الاسئلة شايفين عاملة ازاي نونو ما شاء الله مقارنة بالورق اللي انا اعرفه عن الامتحانات و ورق الاجابة مش عارفة حاسة انه كان ورق قديم وعملوله اعادة تدوير واستصلاح طبعا برده ده بالمقارنه مع ورق الاجابة اللي انا شفته قبل كدا بس الحمد لله طالما الورق عارفين نقراه ونكتب عليه خلاص نضايق ليه ؟؟!!

برده مكنش فيه مراوح وكان فيه شبابيك بتطل على شارع وصوت الكلكسات بقى عمال على بطال
اتكلمت كتير اوي ..........