بسم الله الرحمن الرحيم ..
شكرا ليكم جدا على إتاحة الفرصة دي لينا ..
أنا الحمد لله علاقتي بوالدتي كويسة و متينة و باقدر أحكيلها أي حاجة و بتفهمني و بجد ربنا يخليها لينا و يحفظها من كل سوء ..
مشكلتي بقى مع والدي .. هابدأ لكو من الأول ..
و أنا صغيرة كانت علاقتي بيه تمااااااااااااام أوي .. و كنت علطول لازقه فيه و معاه فكل مكان و كنت باحبه أوي و فعلا ما كنتش أعرف أقول بحب ماما و لا بابا أكتر ..
بس دلوقتي في فجوة ما بينا .. لأن أنا لما بدأت أكبر ما بقاش في تفاهم بينا و ما بقتش أحس انه بيفهمني او بيحس بيا زي زمان .. و بعدين جزء كبير أوي من المشكلة أنا السبب فيه .. لأن أنا عنيدة معاه ..و برد عليه بطريقة ناشفة شوية و قليل اما ببص لوشه .. و حاسة انه ما بقاش في لغة حوار بينا .. مش السبب انه بعيد عني و مشغول و كده لأ ما اظنش لأننا بنشوفه كتير ...
بس مثلا لما بيتصرف تصرف مش عاجبني او في حاجة فيه مش عاجباني ما ببصش الا عالسلبيات بس و بانسى انو طيب و بينسى بسرعة و الحاجات الحلوة اللي فيه .. و ممكن نتخاصم و ما اكلموش و حاجات كده .. بس ما بغلطش فيه ..
لما بروح لماما و احكيلها بتقولي معلش ده ابوكي و فيه حاجات تانية جميلة فيه و مهما عمل لازم ترضيه لأن انتي اللي محتاجاله ..
بس انا بقى ما بيعجبنيش و اقول طب اشمعنى مش لما يعرف يعاملني ازاي ابقى ارضيه .. و بفكر غلط .. و بعدين يومين كده و خلاص .. بس ده بيؤثر على العلاقة بينا و ما بقاش في جوايا حب ليه زي الأول .. يعني تقريبا عايشة معاه عشان يصرف عليا و خلاص .. بس هو مش مقصر معايا انا بالذات خالص و اي حاجة بعوزها بيحققهالي و بيعاملني كأب .. بس يمكن ظروفه و هو صغير أثرت على طريقته معانا .. هو طيب و الله .. بس اكيد اي واحد هيبقى فيه حاجات مش عاجبانا .. و يتهيألي ان المشكلة دي اقل بكتييييييييييييييييير مع اخواتي الولاد ...
انا عارفة انو ما فيش حد كامل بس انا بدور دايما عالمثالية و بناقض الواقع ..
انا فعلا مضايقة بسبب الوضع ده و فعلا انا محتاجة رضاه بس عايزاه يفهمني انا كمان .. و نفسي ارجع احبه زي زمان ..
عشان كده انا حكيتلكو .. هو طبعا الكلام ده مش هيوصله بس عايزاكو تساعدوني
معلش أنا طولت عليكو .. و قولولي أعمل إيه .. !!!