كل يوم الناس بتصرخ وانتو مش سامعين.. والناس بتموت وانتو مش سائلين.. طب قولولنا يا أسيادنا نشتكي لمين؟ طوابير العيش قلنا أزمة جايز تتحل.. طوابير استخراج بطاقات التموين الجديدة قلنا فترة وهتعدي.. طوابير البنزين قلنا جايز أثداء البترول اللي في أراضي وطننا جفت وجايز يعملولنا وقود حيوي من العدس أو الفول اللي مش لاقيينه!.. أسعار الحديد خرافية قلنا جايز يبيعوا النادي الأهلي للناس وأهو الأهلي حديد!..
آخر حاجة قابلتني لما الوزير مصيلحي كان رئيس هيئة البريد افتتح في آخر أيامه مكتب بريد مبني في مكان فخم علي كورنيش النيل بمدينة دمياط.. آل إيه مسميينه مكتب نموذجي!!..رحت أسجل فيه جواب لقيته زحمة جداً، طلعت اشتكي للمدير مالقيتوش، قالولي ماجاش!..
رحت أسجل الجواب النهارده نفس الزحام الرهيب، لأن المكتب اللي بيتقال عليه نموذجي ده ياسادة موظف واحد يقوم بكل الأعمال من بيع طوابع، لبيع نماذج واستمارات، لتسجيل جوابات.. إلخ! قابلت نائب المدير قاللي وإحنا نعمل إيه الهيئة فيها نقص شديد في العمالة لدرجة إن الشباب خريجي معهد البريد نفسه صايعين ودايرين في الشوارع مش لاقيين شغل.
لا أملك إلا أن أقول: أيها الذين تديرون بلدنا.. إذا كنتم مش عارفين تديروها اقفلوها وسلموها.. وربنا يتولانا برحمته
|