ابدأ احكى انا بقي
بســــــــم الله
اولا صحيت 6 تقريبا
جهزت ف ساعة الا ( وده طبعا رقم قياسي )
نزلت من البيت 7 الا ربع كده
الحمد لله المواصلات كانت ميسرة
وصاحبتى اللى نزلت معايا هرتنى كلام افسادى
عمالة تسألنى هتدى نمرتك لولد ؟
طيب هتمشي مع ولد لوحدك؟
طيب طيب طيب لحد ما فى الاخر قالتلى كفاية يا معقدة
وانا فى المواصلة التانية زينب كلمتنى بتقولى انها وصلت الجامعة
انا بشرتها انى لسه مركبتش المترو (17 محطة) اساسا
ربنا يكرمها البنية كان عندنا محاضرة الساعة 8 وانا وصلت الساعة 9 الا ربع كده باب الجامعة وهيا كانت مستنيانى
طبعا هى استقبلتنى استقبال جامد جدا .. بصراحة انا كنت خايفة على نفسي منها
المهم رحنا ندور ع المدرج بتاعنا
ودخلنا المدرج وفضلنا قاعدين شوية بس مكناش عارفين نرغي براحتنا خاااالص لان كان فى عيال بايخة ورانا قمنا غيرنا المدرج ورحنا قعدنا فى ركن بعيد هادى
بعد كده فضلنا فترة نرغى نرغى و خرجنا من المدرج رحنا جبنا كرت شحن ليا
ورجعنا تانى وبردو لا جديد
المهم بقي قاموا اتحاد الطلبة جولنا تانى وفضلوا يتكلموا معانا
و بعد كده الدكتورة دخلتلنا وفضلت تتكلم شوية كده فى الاول وتختبر معلوماتنا العلمية وطبعا احنا برفكت اوى مقولكوش يعنى
والاولاد اللى كانوا ورانا الحمدلله مهمدوش نازلين تريقه تريقه
واحنا كنا بنحاول نمسك نفسنا من الضحك بس .........
بعد كده الدكتورة قالت اللى عندو اسئلة وكده
زينب عملت فيها ماتريكس مان و رفعت ايديها بقي اوعى
الدكتورة قالتلها اتفضلى
قامت زينب واقفة وفاردة طولها وقالت للدكتورة حضرتك قلتى فى 3 حالات للمادة ؤمال البلازما راحت فين
الدكتورة قالتلها لا دى حاالة خاصة وكده .. وقامت مكملة بتسأل زينب انتى عارفة ايه البلازما دى اساسا ؟؟
زينب تنحت و........................
مش هوصفلكم المنظــــــــــــــــــــــــــــــــــــــــــــر ههههههههههههههههههههههههه
(ادينى فضحتك يا سوستى علشان تهددينى براحتك)
المهم الدكتورة فضلت تقولها يعنى بتتكلمى عنها ومتعرفيهاش وبتاع
المهم قامت الدكتورة قالتلنا نعمل بحث ع البلازما
يعنى زينب لو كانت قعدت ساكتة مكناش اتعاقبنا بسببها
المهم واحنا فى المحاضرة انا كنت بكلم زينب بسمع 10 ورايا يردوا عليا وكذلك هى .. حاجة ظريفة جدا
بعد ما الست الدكتورة مشيت
سألت البناتيت اللى جنبي عندنا حاجة تانية قالولى لأ روحى
المهم صاحبتى اللى بتروح معايا مكانتش فاضيالى بقي البنية كانت بتشوف مصالحها
ركبت انا وزينب المترو و نزلت انا قبلها بشوية ودعتها و انطلقت الى بداية رحلة العذاب فى المواصلات
ارخم حاجة فى المواصلات بصراحة انى مقدرش اقعد غير جنب الشباك وطبعا الشمس كل يوم بتبهدلنى
حاسة ان خدى الشمال لونه هيتغير عن اليمين
والحمد لله حاولت احافظ عليا صاحية بانى حطيت سماعات الموبايل فى ودانى وعليت الصوت ع الااااااخر
واول ما وصلت اكتوبر الحمدلله اخدت تاكسي نزلنى عند بيتنا
بس وطلعت روقت اوضتى علشان ده كان شرط ان بابا يدخلى وصلة النت للكمبيوتر بتاعى
ودخلت المنتدى شوية وبعدها خرجت علشان انام
بس كده