[Travel]

امممممممم
ارغيلكوا فى امبارح لسه
دخلتلنا دوك/ فى الكيميا
(هى كانت كيميا ولا فيزيا؟)
شكلها كانت كيميا
(انا لسه صاحية)
المهم
الدوك/ دى بجد ممتازة جدااااا بتتكلم عن المنهج الاول من زمان وبستطه
وبعدين هى قالت انواع المادة 3 :
صلبة. . . . سائل. . . . غاز
(انا فاكرة انى خدت فى الفيزيا انهم 4)
المهم الدوك/ عمالة تقول هما كده صح ولا فى حاجة ناقصة او زايدة؟
انا عمالة اقول فى نفسى ايوة فى . . .حالة البلازما
اسال ريما تقوم قايلالى
انا بكره الفيزيا متجيبيليش سيرتها انا رياضة بس
كل ما اقولها انا بحب حاجة الاقيها بتكرهها
زى العضوية فى الكيميا بحبها ...هى بتكرهها
الفيزيا بحبها ... هى بتكرهها
هى بتحب الرياضة انا بولع منها
المهم مش عارفة اسال الدوك.
(مكسوفة). . واللى زود كسوفى ان اللى بيكح بس المدرج كله بيلف يتفرج عليه
وقعد ورانا شلة ولاد بس ايه. . عالم رزلة
دول لو قعدوا ورانا تانى انا كده ضمنت انى هتطرد المحاضرة الجاية
لانى مش ضامنة انى اسكت (سبحان اللى كتمنى المرة اللى فاتت)
واحدة وقفت تجاوب على سؤال للدوك. هما قعدوا يتريقوا ولما هى جاوبت غلط قاموا قالوا :الاجابة خاطئة لا تحاولى مرة اخرى
اترزعى
(مش عليا انا لسه دورى مجاش)
المهم لاقيت بقى البنات والولاد بيسالوا الدوك. ينفع يسالوها فى المحاضرة عادى ولا لأ وايه نظام الكتب وكده
انا عاوزة اسال مليش دعوة (فى حكاية حالة المادة دى)
المهم كل ما ارفع ايدى انزلها تان..(عملت الحركة دى 5 مرات)
وريما طالعة فى دور عادل امام فى فيلم الارهاب والكباب
كل شوية تقولى يا بنتى قومى وتشجعنى علشان اقوم وتتريق عليا
المهم قررت انى ارفع ايدى فا هى شاورت عليا
انا شفتها وهى بتقولى اتفضلى
سكت كده وكانى مسمعتش ونزلت ايدى (كانى كنت بجرب نظرية رفع القلم)
بس طبعا قمت خلاص
المهم قلتلها:
حالات المادة ثلاثة(.. . . ..) ينفع ازود عليهم حاجة رابعة اللى هيا حالة البلازما؟؟
هى شرحتلى بقى وقالت فى الاخر تنفع تبقى حالة رابعة ومتنفعش
علشان هى بتنتج فى ظروف خاصة فى وسط خاص
(مع ان اصلا فى كتاب الفيزيا ثانوية عامة واتحدى فى الباب التالت ...حرارة الفصل الثامن والسادس)
(والموائع ..الفصل الرابع)
واراهن اى حد على مورو ان طلع كلامى غلط
المهم الدوك. اتكلمت معايا وناقشتنى وكده
وانا قعدت (المدرج كله كان بيتفرج عليا وانا قايمة اصلا عاملة زى الارنب مترددة اقوم ولا مقمش)