[vampire1188]

ويا فامبير عايزه اسألك على حكايه اتحاد الطلاب ده هما ايه نظامهم ؟

وهى الجمعيه العلميه ديه تبعهم ولا لأ

وهل اشترك معاهم ولا تعطيل على الفاضى

والله يا منيرفا .. اتحاد الطلبة دا معمول للناس الفاضية بتاعة الانشطة اللي عايزين يعملولهم منظر في الكلية

> اتحاد الطلبة عبارة عن .. ان شوية ناس بتبقي تبع الاتحاد دا .. ليهم انشطة في مجالات معينة ادارة الكلية بتكون سامحالهم بالانشطة دي ..

دا الشكل الخارجي للاتحاد .. اما حقيقة الاتحاد بقي .. فهوا ان كل واحد بيوصل التاني .. خاصة في قيادة الاتحاد ذات نفسه .. بمعني مثلا ان انا لو كنت ماسك الاشراف الرياضي .. واخويا او ابن خالتي كان حظه انه دخل السنة دي في اولي .. اقوم انا مدخله الاتحاد .. وشوية همبكة على شوية حوارات فاشلة .. اقوم موصلة لفوق .. وهكذااااااااااا

عشان كدا انا نفسي مابعترفش باتحاد الطلبة دا .. لإنه شايف انه مالوش لازمة في الكلية عندنا .. مجرد حاجة كدا شكلية

انتوا لسه في اولي .. فا معميين بشوية الحاجات اللي بيعرضوهالكوا وشوية الانشطة العادية اللي بيقدموها

غير انكوا لسه داخلين الدراسة حاميين اوي .. وعايزين بقي تعيشوا في دور الشباب المكافح اللي ليه انشطة في كل حتة وكل واحد عايز يحصل على لقب الطالب الاكثر شعبية !!

كله كلام في الهوا .. وعلى فكرة بسبب اتحاد الطلبة دا بتحصل مشاكل كتيرة جدا

بسبب ان ادارة الكلية بتبقي معترفة بالاتحاد .. اما جماعة منشقة زي بتاعة الاخوان معا نفسها كدا .. ماتعترفش بيه

وتقوم خناقات بقي واعتصامات وبلاوي منيلة من الحاجات دي .. وفي الاخر يقرروا انهم يعمولوا اتحاد طلبة موازي !!

طب والنبي انا امشي تبع مين كطالب ؟! .. اخوان موازي نوعا ما صح ؟ .. ولا اتحاد طلبة قانوني اهبل ؟!!!!

عشان كدا انا عن نفسي بنفض لدا كله .. انا اخليني في مذاكرتي وخلاص ..

انا كل همي اني اجيب تقدير وانجح واعدي .. لإني قدامي لسه مستقبل الله اعلم بيه !

ولاحظي ان اللي كتبته دا كله .. رأي شخصي .. يقبل النقاش ..

> اما بالنسبة بقي للجمعية العلمية .. فدي انتي ممكن تشتركي فيها وممكن لأ ..

بس زي ماقولتلك قبل كدا .. انتي همك تحافظي على تقدير الجيد جدا بتاعك عشان تفضلي في المميزة اللي انتي فيها

فا صعب انك توازي مابين نشاط في الكلية .. ونشاط في المذاكرة .. (صاحب البالين كداب) ..

بس انتي ممكن تستفيدي بخدمات الجمعية العلمية .. والخدمات دي بتبقي متاحة للكل .. ودي ميزة الجمعية بقي

وبعدين من المتعارف عليه .. ان اهم حاجة الجمعية بتقدمها هيا حكاية شهادة الـ icdl دي ..

اما باقي الانشطة بقي فابتتلخص في شوية كورسات لغات عادية جدا .. يعني لاتفيد ولا تغني ..

انتي عايزالك قعدة على فكرة !! .. لإن المشكلة اني هابدأ الخبط في الرد واخرج من حاجات وادخلك من حاجات ..

بس انا جاوبت على سؤالك .. ويارب اكون افدتك