انا حاسس انى بقرا مغامرات علاء الدين
بس نصيحة منى يا رحمة سيبك من كلام الناس والعيال اللى بيتريقوا عليكى فى المحاضرة دول
واللى عايزة تعمليه اعمليه طالما الحاجة دى مش حرام ولا عيب
المهم
طبعاا انهاردة الخميس وهو عندى اجازة الاسبوع ده بس علشان اول الدراسة بقى والكلام ده
من بعد العيد مفيش اجازة تانى
فانا بقى هحكى مغامراتى امبارح رغم انى مش فاكرها اوى ( زهيمر )
صحيت امبارح الساعة 6.15 ونزلت على 7 بس المرة خدت طريق المواصلات التانى
فلقيت نفسى وصلت على 7.20 معرفش ازاى
تقريبا كنت راكب صاروخ
المهم كان علينا محاضرة فيزيا والراجل عمل خير وماجاش
وكان بعديها علينا محاضرة جيولوجيا طبيعية وتاريخية فى قاعة 103
ربنا رزقنى كده بواد من اسوان جاى عندنا عين شمس مش عارف اى حاجة فى اى حاجة
ساب الناس كلها وجاى يتصاحب عليا انا
وعمال يسألنى على المحاضرات والاماكن وقالى تعالى معايا ندور على قاعة 103 هو معتمد على انى عارف بقى كل حتة فى الكلية المهم توهته فى الكلية وطلعته ونزلته 50 مرة ومش لاقيين القاعة
الواد ندم انه جه عين شمس عندنا
فى الاخر خالص لاقينا قاعة 103 و لقينا الناس كلها بتدور على القاعة دى بس انا طبعاا اول من استدليت القاعة دى
و لقيناها قافله
حضرنا بقى مع قسم الجيولوجيا وخلاص
والواد الاسوانى جه حضر معانا بس كان اتعقد خلاص وعمال يكلم فى نفسه
فين وفين دخلنا دكتور الجيولوجيا الطبيعية الراجل والله كان ابن حلال وعمال يقولنا انتوا احسن كلية فى مصر والكلام التعبان ده
وبعد كده دخلتلنا دكتورة الجيولوجيا التاريخية
وكان بقالها نص ساعة عايزة تشغل البروجكتور مش عارفة وفى الاخر واد معانا قام شغلهولها بخطوة واحدة بس كان شكلها وحش اوى
المهم بقى بدأت فى الشرح
اسرع مخلوق بيتكلم على وجه الارض
خلصت الفصل الاول فى ربع ساعة المهم محدش فهم ولا كلمة ومحدش لحق يسجل حاجة واللى كان بيسالها مش بترد عليه وقالت لينا مفيش كتب واللى عايز يذاكر يصور مذكراتى
ومشيت ومحدش فهم اى حاجة فى اى حاجة
المهم الواد الاسوانى كان اتعقد من الدنيا كلها وروح من الجامعة
وبعد كده كان علينا محاضرة حاسب الى تثقيفى والدكتور كالعادة ماجاش ف روحنا
واحنا مروحين كنت انا وصحابى اربعة
وملقيناش الميكروباص وشكله كده مش هيقف قدام الجامعة تانى على حظنا
المرة دى بقى ما اخدناش تاكسى لان لو كل يوم خدنا تاكسى بيتنا هيتخرب
فمشينا بقى من قدام الجامعة لحد كوبرى القبة
وبعد كده كل واحد شاف طريقة اللى طلع على عمارات السعودية واللى طلع على الحلمية واللى طلع على المطرية ( اللى هو انا ) وبعد كده من المطرية خدت ميكروباص تانى لحد البيت
وبس