يا سبحان الله .. يا جدعان والله العظيم تلاته شئ طبيعي انكوا ماتكونوش عارفين حاجة ..
انتو مستغربين ليه ؟؟؟؟؟ .. مانا كنت زيكوا كدا والله .. بس معا الوقت بعرف النظام
عموما انا كتبت رد قبل كدا على سؤال مشابه لسؤالك دا وهاعملك اقتباس ليه
اقتباس:
بص ياسيدي .. انتا شئ طبيعي انك تبقي سايح على نفسك في اول السنة
بمعني انك مش عارف ايه المصدر الاساسي اللي انتا تذاكر منه
بص .. فيه 4 مصادر اساسية للمذاكرة في الكلية دي
محاضرات ، كتب ، ملازم ، تطبيقات
1- محاضرات : فيه حاجتين في كليتنا دي .. مواد عملي و مواد نظري
العملي >> زي الرياضة والمحاسبة في الترم الاول .. اهم حاجة تفهم .. وماتكتبش حاجة وانتا مش فاهمها والا هاتخش في دوامة انعدام الثقة والهاتف اللي يفضل كل شوية يقولك انتا ساقط انتا ساقط !! .. وحط في دماغك ان محاسبة يعني تجارة .. يعني لازم تذاكرها .. ولو شيلتها .. هاتبقي رخمة وحمل عليك مالوش لازمة
النظري >> احفظ وصم .. عايز تحضر محاضرات .. احضر .. مش عايز .. مش مهم .. بس المهم انك تعرف الدكتور شرح ايه ولغي ايه عشان ماتتبهدلش في اخر الترم !!
2- الكتب : فيه برده نظري وعملي ..
النظري >> خلي الكتاب مرجع من مراجع مذاكرتك .. بمعني انك حضرت محاضرة النهارده يبقي ارجع واقرا اللي انا خدته في المحاضرة دي في الكتاب .. لإن السمع في المحاضرة غير القراية من الكتاب .. غير برده الكتابه .. الكتابة عبارة عن خليط من فهمك للي سمعته واللي قريته قبل كدا بطريقتك الخاصة ..
العملي >> ماعتقدش انك هاتفهم حاجة من الكتاب في مواد المحاسبة والرياضة .. كل اللي تعمله ركز في المسائل اللي في الكتاب وحلها .. عشان ساعات كتير الدكتور بيجيب الامتحان من الامثلة دي ..
3 - ملازم : فيه عملي ونظري ..
العملي >> رياضة ومحاسبة .. هاتتلاقي ملازم اسمها ورق الدروس .. هاته وعيش حياتك فيه .. ورق الدروس دا بيشرح المادة كمادة مش كفصول معينة ..
نظري >> فيه سؤال وجواب .. دا برده كويس ..
وفيه ملزمة الامتحانات السابقة .. مهمة جدا جدا جدا ..
4 - التطبيقات : ماهي الا عبارة عن كتاب تدريبات .. في تجارة انجليش بيسموه text book
وغالبا مابينزلش الا في المواد العملي زي المحاسبة والرياضة .. نصيحة اخوية .. امسك الكتاب دا واطحنه حل .. عشان دا مابيخرجش عنه الامتحان .. لإنك لو حليته كله .. كدا يبقي انتا فاهم المادة كويس .. وكدا يبقي انتا معدي فيها ..
دا نبذة صغيرة بس عن كيفية انك تعدي في الكلية بتاعتنا .. لكن انك تتفوق دي بقي .. ليها نظريات خاصة !!
|