اولا اهلا ومرحبا بيك يا أستاذ نبيل في قسم كلية التجارة .. واظن حضرتك محاسب قديم فياريت نستفيد من خبرات حضرتك في شغل المحاسبة ..
اللي اقدر افيدك فيه في الموضوع دا كله هوا الجامعة الامريكية ..
اولا .. شئ طبيعي انك تخش على السايت بتاعهم وماتفهمش حاجة .. عشان تفهم لازم يكون حد من الطلبة اللي بيدرسوا هناك يفهمك وجها لوجه .. اما غير كدا ماعتقدش ..
بص حضرتك .. مبدأياً يأسفني ان اقول لحضرتك ان طلبات التقديم بتاعة الالتحاق هناك خلاص قفلت .. لإن التقديم بيبقي سنوي وبيبقي في شهر 7 و 8 ..
طبعا هوا نظامهم هناك يكول شرحة .. بس انا هاشرح لحضرتك على اساس ان ابنك خريج ثانوية عامة
اولا .. حضرتك بتروح مقر الجامعة (القاهرة الجديدة / التجمع الخامس) .. وتدور على مكتب اسمه enrollment office وتطلب منهم ملف الالتحاق (Application) ودا قيمته 250 جنيه مصري .. او 50 دولار اميركي ..
ثانيا .. ابن حضرتك خريج ثانوية عامة مش ثانوية امريكية .. عشان كدا لازم يخش امتحان اسمه تحديد مستوي اللغة الانجليزية ودا هناك بيختصروه تحت اسم ELPT .. ودا قيمته 250 جنيه مصر او 50 دولار اميركي برده و امتحان تاني اسمه EWAT.. والامتحان دا لازم ابن حضرتك يعدي فيه لإنه عبارة عن معادلة للغة .. ولو مانجحش فيه مش هايتقبل في الجامعة عموماً .. ودا قيمته 125 جنيه مصري .. والامتحانين دول بيبقوا بمواعيد مسبقة بتقرها الجامعة وبتعلنها .. اذا حضرتك راح عليك ميعاد الامتحان بتضطر تعمل حاجة اسمها date change .. ودا طبعا مش ببلاش بتدفع 50 جنيه قيمة تغيير الميعاد ..
اذا ابن حضرتك تم قبوله في الجامعة .. بيبعتولك جواب على العنوان اللي حضرتك كتبته في ال Application والجواب دا زيه زي جواب التنسيق بتاع الجامعات الحكومية كدا .. واسمه Accpetance Letter وبيجيلك ومطبوع عليه شعار الجامعة ومختوم بالختم بتاعهم وممضي شخصياً من ديفيد ارنولد رئيس الجامعة ..
ابن حضرتك بيقوم واخد الجواب دا ويطلع بيه على ال student affairs هناك عشان يقدم ورقه .. بعد دا كله المفروض ان فيه حاجة اسمها Major announcement ودا عشان التخصص .. فيه اقسام بيبقي التخصص فيها عام وبعد كدا يتخصص تخصصات فرعية زي اقسام الاقتصاد والعلوم .. وفيه بيتخصص في حاجة معينة ومنها يتخصص تخصصات فرعية زي قسم الاعلام والصحافة .. يعني نظام كدا برده يطول شرحه ..
كدا احنا خلصنا من اجرائات القيد .. طب دفع المصروفات بقي بيبقي ازاااااااي ؟؟؟
حضرتك الجامعة هناك مش ماشية بنظام الترم .. ماشية بنظام عدد الساعات المعتمدة .. وبالتالي الفيصل في تحديد قيمة اللي سيادتك هاتدفعه في المصروفات هوا عدد الساعات .. بدون التطرق لقصة الساعات المعتمدة دي .. غالبا النظام السائد حاجة اسمها ال full time و1st level يعني حوالي 20 ساعة .. والدفع مابيبقاش بالسنة كلها .. بيبقي بالسيمستر .. كل سمستر ب 41 الف جنيه مصري ..
اظن كدا انا استوفيت لحضرتك نظام التقديم والدفع .. اما نظام الدراسة بقي فدا موال تاني لوحده وطويل جدا ..
عموما .. حضرتك نورت القسم عندنا ..
|