اه قبل اي حاجة .. على فكرة يا doody2 .. انا اكتشفت ان المكتبة بتاعتكوا تقريبا والله اعلم هيا مكتبة بينجو .. ودي اصلا اللي كانت بتدينا السنة اللي فاتت .. بيني وبينك هيا حرامية وبنت ستين في سبعين .. بس محترمة .. بمعني ان ملازمها نضيفة جدا مقارنة بالمكتبات التحف الجديدة اللي نازلة السنة دي !!
اجي بقي ليوميات اليوم الظريف بتاع النهارده ..
استيقظت من النوم باكرا .. وغسلت وجهي بالماء والصابون .. والجيل خلص
عشان كدا لبست كاب .. نزلت من البيت على الساعة 7 الا ربع .. تقولولي ليه اقولكوا مش عارف !! .. اصل تقريبا والله اعلم عندي محاضرة الساعة 8 فلازم انزلها بدري ! .. عموما الحمدلله وصلت بالسلامة للجامعة بعد عناء قفلة الشارع دا غير ان عجلة العربية عملتها في الطريق وفرقعت وكانت شورة سودا ان الواحد يروح الجامعة بعربية !!!! ..
المهم اخش الجامعة .. الاقي سكون رهييييييب .. فاستغربت .. المهم دخلت كان فيه واحد صحابي مستنيني قعدت معاه شوية لغاية مالمدرج بتاع (و) فتح (وربنا مانا فاكر و ولا هـ .. الله يرحم السطلان!!) .. حضرت اول محاضرة كان نقود وبنوك .. والدكتور اصلا بتاعها عجيب بجد .. بيدي المادة بالانجليش وبيشرح بالعربي
.. بس ماعلينا اهو بنستفاد وخلاص .. بعد ماخلصت المحاضرة طلعت قضيتها عند شباك الحبايب يا حبيبة !! .. فطرنا وشربنا وظبطنا نفسنا .. وقعدت اراقب الناس بتوع الاخوان وهما بيرصوا الاستيدج بتاع الويلكم بارتي بتاع سنة اولي ..
وتمر الدقائق والساعات .. على 12 وربع كدا بدأ الدي جي يشتغل .. وبدأت الحفلة .. روحت عشان اتفرج عليها لاقيتهم بيعملوا حاجات عادية .. شوية اسألة على شوية هدايا على شوية هزار .. بس بعد كدا بقي الحفلة احلوت اما المسرحية بدأت .. حتى كان اسمها( تايه في الجامعة ) .. بس كانت جامدة جدا بجد .. خاصة الواد رامي (اللي كان قايم بدور الشاب الكوول) .. كان واد تحفة بجد.. بس يمكن اللي يعيب عليهم في المسرحية انهم احبطوا بتوع سنة اولي بطريقة غريبة جداً .. يمكن الناس اللي حضرت هيا اللي تحس بكدا .. عموما هيا الحفلة كانت كويسة وظريفة .. ووزعوا الاي بود والا ميت في الاخر خالص .. وواحد اسمه محمد تقريبا هوا اللي خد الاي بود ..
بعد كدا بقي روحت عند اعلام اقضيها معا صحابي هناك .. دخلت لفيت في ارجاء المبني شوية .. بس جامد من جوا .. كدا بقي مش بقيلي غير مبني سياسة واقتصاد وابقي كدا دخلت جميع مباني الجامعة !!