انا اصلا كنت في الجامعة النهارده .. واول ماروحت البيت على طول فتحت التليفزيون عشان اعرف الاخبار
لاقيتهم كاتبين في قناة العربية .. وقوع مصر في مجموعة سهلة نسبياً
تفائلت .. قولت اما اشوف واقعين معا مين .. لاقيتهم واقعين معا الجزائر .. قولت يادي النيلة !!
اشوف اللي بعدها .. لاقيتها زامبيا .. قولت زامبيا مشاكسة برده ..
عشان فرقة زي دي ممكن تبقي من اصحاب المفاجاءات وتبقي زي توجو بتاعة كاس العالم 2006
اشوف اللي بعدها .. لاقيتها رواندا .. قولت كويس .. دي مقدور عليه وبنتيجة عالية كمان ..
بس بعد دا كله .. نسيت فريق مهم جدا في المجموعة دي .. وهوا مصر !!!!
اي حد في افريقيا لو قولتله مصر واقعة في مجموعة فيها جزائر ورواندا وزامبيا
هايقولك كدا مصر في كاس العالم خلاص ! .. وانا من ضمن الناس دي
بجد والله العظيم مافيه فرصة احسن من دي في اننا نتأهل تاني لكاس العالم
خاصة ان الجيل الحالي من اللعيبة بيفكروني بنفس الجيل اللي اتأهل في 90 ..
و اللي نلاحظه .. ان بدون مجاملة .. احنا عندنا اقوي خط هجوم في افريقيا كلها ..
عمرو زكي (هداف البريمير ليج وبجدارة) ، ابو تريكة (غني عن التعريف) ، ميدو ، محمد زيدان ، متعب
لدرجة وصلت ان حسن شحاته نفسه محتار يحط مين ويشيل مين !!
دا غير اننا معانا خط وسط لا يستهان بيه .. زي حسني عبد الربه واحمد فتحي وبركات وشوقي
يعني بجد فريق مصر من اقوي الفرق اللي فعلا موجودة دلوقتي على افريقيا
واذا كمان وصلنا لكاس العالم باذن الله .. فيه امل كبير اننا نعدي لدور ال 16 ..
بس اللي هايحدد دا بشكل اساسي .. لعبنا في كاس القارات ..
اه وبالمناسبة .. القرعة بتاعة كاس القارات في 22 نوفمبر الجاي دا ..
ومصر تأكد وقوعها معا البرازيل .. وفيه اتنين من دول هايقعوا معانا ( اسبانيا او ايطاليا) !!
يعني هاتبقي مطحنة !
وكمان لو مسكنا تاريخ الماتشات اللي لعبتها مصر معا الفرق اللي معانا دلوقتي
هانيجي تلاقي ان زامبيا افتكر اننا غلبناها 4 ايام تصفيات كاس العالم بتاعة 2002 ..
والجزائر مابقتش زي الاول .. يعني مش صعب اننا نغلبها ..
هوا يمكن العائق الوحيد قدامنا هوا قلة ادب الجمهور بتاعهم ..
وانا عمري ماهانسى تصفيات 2002 اما بركات ايده اتفتحت ودخل فيها ازاز من الجمهور اللي كان بيحدف !!
ورواندا ماعتقدش انها ليها تاريخ اصلا ..
اني واي .. ربنا يكرمنا ونتأهل عشان بجد هوا دا الجيل اللي يستحق الوصول للمونديال
ويارب كمان يبقي لعبنا في كاس القارات جامد عشان نكسب بيه احترام الجميع ومانكتفيش بالتمثيل المشرف وبس
بالمرة بقي .. خدوا جدول الماتشات بتاعة مصر عشان تبقوا عاملين حسباكوا >>
الجولة الأولى: مصر – زامبيا (احد يومي 28-29 مارس 2009).
الجولة الثانية: الجزائر – مصر (احد يومي 6-7 يونيو 2009).
الجولة الثالثة: مصر – رواندا (ستؤجل لمشاركة المنتخب الوطني في كأس القارات)
الجولة الرابعة: رواندا – مصر (احد يومي 5-6 سبتمبر 2009).
الجولة الخامسة: زامبيا – مصر (احد يومي 10-11 أكتوبر 2009).
الجولة السادسة: مصر –الجزائر (احد يومي 14-15 نوفمبر 2009).
تجدر الاشارة .. اننا اما اتأهلنا لكاس العالم سنة 90 .. كان صاحب الهدف حسام حسن
وكان جابه في الجزائر في استاد القاهرة .. وكان الماتش يوم 17 نوفمبر 1989 ..
والمره دي في التصفيات .. اخر ماتش لمصر هانلعبه قدام الجزائر يوم 15 نوفمبر وفي استاد القاهرة برده !!
ان شاء الله تكون صدفة خير ...
|