أولاً أنا دكتور غريب جلال والد نورا صاحبة الحساب فى هذا المنتدى...نورا دخلت علاج طبيعى خاص فى جامعة مصر للعلوم والتكنولوجيا فى مدينة السادس من أكتوبر هذا العام
وطالما إنى طبيب فأكيد هناك أسباب جيدة لاختيارى أنا ونورا لكلية العلاج الطبيعى خصوصاً وإن نورا جابت السنة اللى فاتت خمسة وتسعين واتنين من عشرة فى المائة وكان ممكن تدخل طب خاص أو حتى صيدلة أو أسنان خاص
أولاً الطب دراستة طويلة ومزعجة جداً..والأعداد كبيرة جداً والإستفادة ضعيفة جداً..وحرام خصوصا للبنات ضياع سبع سنوات من العمر..وفى الاخر...لا شىء..وتابعوا المشاكل اللى حاصلة على صفحات الجرايد ومطالبة الأطباء بزيادة المرتبات..طبعا بالنسبة للعيادة الخاصة ..اللى فتح خلاص فتح..المشكلة إن مافيش حد حايلاقى عيادة يفتحها إلا فى الريف وبصعوبة؟؟حال الأطباء صعبة جداً..فمابالكم بعد سنوات..
وبالنسبة لطب الأسنان..مين بقى اللى ممكن يتحمل الدراسة الطويلة وغلطة طبيب الأسنان برضة بتبقى خطيرة وبتنتهى فى المحكمة وكذلك مافيش عيادات..يعنى مافيش إلا الشغل فى المستوصفات وهناك التعقيم سيىء جداً..يعنى حايكون لك ضحايا مصابين بالفيروس الكبدى سى وممكن إنت تكون واحد منهم بأنك بتتعامل مع الدم دائماً كطبيب أسنان
تأنى الصيدلة..وهى الأسوأ على الإطلاق..فأقل بنت معاها دبلوم تجارة وشغالة فى صيدلية بتعمل إللى بيعمله الصيدلى وأحسن وعندها خبرة ..وبعدين الصيدلى لا بيحضر أدوية ولا حاجة هو يادوبك بيمد إيده على الرف وبيجيب العلاج..زى العامل فى أى سوبرماركت..دا غير بقى التعامل مع المدمنين اللى داخلين خارجين من الصيدلية وعايزين أدوية مخدرة بالذوق وبالعافية..ومشاكل أخرى لأن الصيدلى بيشتغل فى الشارع.. ..إلا أنه بس لو فتح صيدلية لازم يفضل قاعد فى الصيدلية طول النهار وإلا حايتسرق..و لازم أقول إن نقيب الصيادلة د/زكريا جاد قام بإصدار نداء قبل المرحلة الأولى للتنسيق يحذر فيه الطلبة من التقدم لكليات الصيدلة لأن الأعداد كبيرة جداً وهناك بطالة بين الصيادلة..وأنا شخصياً عندى فى المستشفى الحكومى اللى باشتغل فيها اتناشر صيدلانية إناث..وكلهن غير متزوجات ولا حتى مخطوبات ولا عندهم أمل..وبيقوموا بعمل ممكن تقوم بيه ممرضة..إذ أنهم بيوزعوا العلاج على المرضى فىالعيادة الخارجية للمستشفى..
أما لماذا دخلت نورا كلية العلاج الطبيعى ولماذا اخترت لها هذه الكلية فلهذا حديث اخر وإلى لقاء قريب
|