[محمد.فوكس]

الفكرة دي سلاح ذو حدين ممكن تكون وسيلة لان كل واحد يدخل اللي عايزه و بيحبه.
بس يا جماعة الموضوع ده مينفعش يطبق في جو الفساد اللي احنا فيه.
شوفوا اللي حاصل في الكليات اللي ليها اختبارات و اخص بالذكر كلية الشرطة بيحصل فيها وساطة.
و ده هيحصل لو اتطبقت الفكرة الخطيرة دي.
و بعدين الطالب مننا بيحزن او لما ميقدرش يدخل الكلية اللي كان عايزها و هو عارف انه ما اتظلمش في التنسيق و انه عادل مية في المية و مع ذالك في ناس بتبقى عايزة تنتحر.. اومال هيعملوا ايه لما يعرفوا انهم مدخلوش الكلية عشان اللي خد مكانهم ..
ابن استاذ في الكلية و لا ابن وزير ولا ابن ضابط ولا ابن مسئول ولا دفع مبلغ و قدره.
بعد كده ممكن في جداول نتيجة التنسيق اسم الكلية و جنبها السعر مش المجموع.
و بعدين على فرض ان مش هيبقى في كوسة .. ماهو المشاكل بتاعت الثانوية هتنتقل للاختبارات دي .. القلق و الدروس و الانتحار .. هي هي
بالنسبة للنظام في اوروبا اعتقد انه مينفعش يطبق هنا:
الطالب يخلص ثانوي و يختار بقى المجال اللي هو عايزه و لو كله اختار مجال واحد مفيش مشكلة لان التعليم مش مجاني يعني كل واحد بيدفع ثمن مكانه في الكلية.
هل بقى ينفع نخلي التعليم غير مجاني في مصر؟
الدول الاوروبية فيها دخول عالية و مستوى معيشة مرتفع .. احان لو عملنا زيهم محدش هيدخل كلية في البلد دي لان اكثر من 70% من الناس هنا مش هيقدروا على مصاريف التعليم العالي لو بقى غير مجاني.
ولا نخلي الناس تخلص ثانوي و تقف لغاة كده .. بدل ما نخلي الناس تتعلم اكتر عشان نعمل نهضة من الجهل اللي احنا فيه نقوم نقولهم خدو ثانوي و اشتغلوا بيها .. اذا كان اللي معاهم بكالوريوسات و ليسانسات مش بيشتغلو .. حد هيشتغل بثانوية عامة.
و بعدين هتمتحن الطالب في ايه .. هو اصلا المفروض يدخل يدرس المواد علمية او طبية او هندسية او اقتصادية او قانونية او ادبية.
هتمتحنه في الحاجات دي اومال هو داخل يدرس ايه في الكلية؟
و بعدين لما الوسايط و الفلوس تشتغل الشباب الصغير اللي طالع من ثانوي هصطدم بالفساد في سن صغير و يكره بلده في سن مبكرة.
التنسيق ده من الحاجات القليلة جدا في البلد اللي مش بتفرق بين ابن الوزير و ابن الغفير كمان هنبوظها.
خطر جدا ان الفساد يدخل المنطقة دي.
انا موافق ان نظام دخول الجامعات بيظلم بعض الطلبة اللي يستحقوا يدخلوا كلية معينة و لم يساعدهم مجموعهم و يكون في صالح اخرون اعتمدوا على الحفظ و الصم فحصلوا على مجموع يدخلهم الكلية.
لكن التنسيق مش هو اللي ظلمه التنسيق.اللي ظلمه هو المنظومة من اولها.
لو عايز تصلح بقى يبقى متجيش على التنسيق دي اخر مرحلة .. عالج الموضوع من الاول.
ولو عايزين فعلا كل واحد يدخل اللي بيحبه .. ده شيء جميل .. لكن لازم ندور على وسيلة مش ممكن يدخل فيها السلطة او المال.
و الا يبقى التنسيق بالمجموع هو الوسيلة العادلة الوحيدة.. لغاية ما نلاقي حل كويس.
الاختبارات دي بدل ما التعليم في النازل هتخلي مفيش تعليم اصلا.