[طـفـلـة الامـس]

المشاركة الأصلية كتبت بواسطة dr.saeed

السلام عليكم ورحمة الله وبركاته

اولا ازيكم يا جماعة عاملين ايه؟
يارب تكونوا بخير
كله ماشى وعايشين
دلوقتى فى موضوع مهم الواحد فكر فيه كتير لقصص كتير شفتها بعينى ادامى من ناس كتير عرفتها سواء على النت او على الحقيقة
جرب كدة تعمل موضوع عن معنى الصداقة اهميتها راى الحكماء فيها؟
هاتلاقى كل الردود
الصديق الوفى ماعدشى موجود
الصديق الوفى ان كان موجود يبقى نادر جدا
طب ماشى
لما كلنا رأينا كدة؟
يبقى العيب فى مين بقى؟
يعنى انا وانت وانتى وحضرتك
طالما كلنا شايفين ان احنا الاصدقاء المثاليين
واصحابنا كلنا هما الى مش كدة
يبقى هل العيب فيهم بس؟
لا اكيد مش فى طرف واحد بس
بس فى اغلب الناس بتستغل المعاملة الكويسة غلط
طب وطالما كل واحد حاطط فى دماغه
ان التانى مش وفى
امال مين فينا الى وفى؟
كل انسان بيشوف نفسه كويس وخالى من العيوب
والحقيقة بتكون عكس كده خالص
والمفروض ان الانسان لما يبدا يشعر بالشعور ده فى نفسه
يقلق
لان ده بداية الطريق الغلط
ونفس النظام مع الاصدقاء لازم نتهم نفسنا دايما بالتقصير فى حقهم مهما قدمنا لهم من معاملة
حاجة بسيطة ممكن نيتدى فيها نتكلم فى المشكلة
البعض بياخد معنى الصداقة على وجه طفولى شوية
بمعنى
انى وفى مع الاخ دة وانى صاحبه من زمان
يبقى لازم دة يحكيلى كل حاجة عنه
زى مانا بحكيله هو كمان يعمل زيى ولا انا أثق فيه وهو لا؟
لا عادى
عايزة تقول او ماتقولش هى حرة
بس مش تحاول تدارى عنى حاجات عادية لا تحتاج انها تدارى وانا بقولها على كل كبيرة وصغيرة
وناس تانية تاخدها ان الصاحب مفروض يسيب كل حالته وشغله ويفضل يسمع لصحابه؟
ايوة المفروض تبقى مع صديقك دايما
مهما كان وراك مسئوليات
لان هو ده اللى هايبقى لك وهاتحتاجه فى وقت من الاوقات برده
طب مثال حقيقى مختلف عن الى فاتوا
فى مرة سألت مين أقرب واحد للنبى صلى الله عليه وسلم ومن قبل الاسلام كمان؟
اتقالى
أبو بكر الصديق اكيد
سالت تانى
مين أمين السر النبوى؟
اتقالى
ايه هو مش سيدنا أبو بكر
ماشى النبى صلى الله عليه وسلم وابو بكر الصديق أصدقاء واخوة بجد
بس امين السر النبوى هو حذيفة بن اليمام
حاجة تانية
ليه بلاقى الاصدقاء غالبا فى العصر دة بيختلفوا كتير ويفقوا مع بعض على التافه؟
ليه لما بيحصل بينهم مشكلة او تسمع من واحد بعيد انه قال عنك كدة مش تروحله تقوله قلت كدة وليه؟
عشان فيه ناس الواحد مش بياخد معاهم لا حق ولا باطل
بيطلعوا نفسهم من الموضوع ويبقوا هما الغلط
بس كرامتهم لا تسمح لهم بالاعتراف بده
ودى مصيبة
يمكن اى فعلا قال كدة بس لسبب معين
خاصة انكك مش بتتعامل مع نبى
انتى بتتعامل مع بشر من سهل ان يزل وبخطىء
الحاجة التالتة
ليه البنات بالذات الاقى كل بنت تقول البنات بيغيروا اوى منى
طب طالما كل واحد شايفه ان كل البنات الغيرة عندهم عالية اوى وغير محمودة
يبقى مين فيهم الى فعلا بيغير غيرة مش كويسة؟
عامة انا مش بغير من اى حد نهائى
لان الغيرة دى اقبح شىء فى الكون وبتؤدى الى مصائب
الحاجة الرابعة
البحث عن صديق
ودة اهم شىء
ليه لما نيجى نصاحب
نختار من الوسط المحيط وخلاص
حتى لو البيئة مش كويسة
اهم اصحاب وقريبين منى وشايفهم على طول وخلاص؟
لان دول اللى بيبقوا ادامنا ونقدر نفهمهم اكتر من اى حد تانى
ليه مش بناخد بالنا اوى ان الاصحاب هم اكتر حاجة تأثر على شخصية الواحد عشان كدة لازم نختارهم بدقة وبعناية بجد
الحاجة الخامسة
ليه لما بيكون جواك حاجة معينة من صديقك تفضل حاططها فى قلبك
وطبعا اكيد صاحبك دة بيغلط اكتر من غلط لانى زى ما قلت مش نبى
وانت ولا مرة تصارحه
بالعكس
تفضل سايبه يغلط يغلط
وانت قلبك يشيل منه أكتر
وفى الاخر تاخد القرار انى ابعد عن الشخص دة نهائيا
من كتر تراكم المواقف طبعا واحد على التانى

ده افضل حل فى نظرى لانى كما ذكرت مسبقا فيه ناس الواحد مش بياخد معاهم لاحق ولا باطل
فبيسيبهم يعملوا اللى نفسهم فيه كله
الحاجة السادسة
تقول هو صاحبى بقى بيمشى مع الواد دة كتير ليه؟
ليه بقى بيمشى مع دة اكتر منى؟
هو خلاص نسانى ولا ايه؟
وممكن يكون الشخص دةأقرب واحد ليه فى المحيط الدراسى
فيكون التعامل معاه كتير
وفى نفس الوقت بيبتدى السؤال يقل شوية بين الاصدقاء لان فيه كليات زى هندسة عندنا مثلا مش بيلاقوا وقت اصلا يذاكروا فيه
دى بتحصل معايا
صحابى بيغيروا عليا جدا من الموضوع ده
لدرجة انى بزعل جدا من تصرفاتهم
الحاجاة السابعة
ودى من أغرب الحاجات
انتى يا بنى
انا معجب بالبنت دى؟
وهو كمان يكون معجب بيها
الله
ازاى؟
مش مفروض ياخد باله
مش لازم يسالنى الاول
وتبتدى بينهم حاجات ممكن الاطفال يتحرجوا من انهم يعملوها
عشان واحد فيهم يعرف يكلمها والكلام دة
وكذلك مع البنات بس الموقف بالعكس طبعا
طبعا دى بعض المواقف الرئيسية الى بين الاصحاب
والى بتحصل ونرجع نقول ما فيش اصدقاء أوفياء
وطبعا كل واحد فينا فيه عيب معين
أى واحد
فيه عيب
بس هل انت هاتستحمل عيب صاحبك
ولا واحدة بواحدة هاتمل من العيب دة
وتصاحب غيره
يطلع فيه عيب تانى
تستحمله لانه فيه صفات كويسة
وتسيبه لما تمل من العيب دة؟
الموضوع طويل شوية
والكلام فيه كتير اوى
لو حد عنده موقف معين ممكن يقوله ومش لازم ذكر اسماء لان المواقف فى الموضع دة أكيد كتير
وفيه أكيد ناس لما شافت الكلام حست انه منطبق عليها
والسؤال الاخير؟
مين الى وفى ومين الى بيضيع الصداقة بجد؟

فى امان الله

احتمال اكمل كلام
عشان الكلام كتير فعلا زى ماحضرتك ذكرت
بس الموضوع مفيد
جزاكم الله خيرا