13
بنت البلد
أحب بنت البلد والحب بهدلنى
ومن بروج الادب والفن نزلنى
أحب عوجة لئيمة اشتكى لله
من غلبى منها وتشكى غلبها منى
جاهلة أذا تفرجت فى جنينة الحيوان
تقول على النمر قطة وعلى الوعول خرفان
وتقول على البنك سيما والبلوز فستان
لكن يصبنى الكتم لما تجادلنى
جبانة تصرخ من النملة بعز الصوت
والبورص طلع عليها عزرائيل الموت
لكن يفوت رمش عينها من فؤادى فوت
ان كنت ميت قتيل هوه اللى قاتلنى
راكبة على الكارو تتسامر مع الحمار
والشمس فوق جسمها تشعل وتقدح نار
ولما يوم ينتظرها أبن الذوات بباكار
تقوله روح على أمك وأبقى قابلنى
أحب بنت البلد من فرط خفتها
هوليود على بدعها ما تجيش عصبتها
ولا بنات لندره تتلف لفتها
أدى اللى جابلى البلا أدى اللى هابلنى