انا مش عارفة اقولكم ايه موضوعكم بجد تحفة
انا اترددت كتير قبل مااكتب لانى مالقيتش مشكلة هنا شبه مشكلتى
انا اساسا فى الازهر فى3 ثانوى
اساس المشكلة بقى ان المعهد عندنا فوضى وممنوع الغياب وكمان عندنا نظام اليوم الكامل يعنى بخرج من المعهد الساعة 2 دا فى اقل تقدير
وبعد المعهد بتبدأ الدروس
والجدول بتاعى
السبت /احياء
الاحد / رياضة
الاثنين / كيمياء
الثلاثاء / انجليزى
الخميس / رياضة
الجمعة / فيزياء
وعبقال مااروح البيت بروح فى حدود الساعة 5 او 6 لان بيتى بعيد عن الدروس كلها
بروح بكو ن هلكانة مش قادرة اشوف قدامى وبعدين بتبدا الغرف الصوتية هنا وبما انى ازهر فتبدا عندى من الساعة 7
كنت الاول مستقرة وبادئة كويس والفاصل مابين الحصص كنت بذاكر فيه
بس انا دلوقتى لما دخلت فى المواد بدات اتعقد
المواد الشرعى بدات تروح منى فى حاجات كتير ماذاكرتهاش
والمواد العربية مجنينانى مش عارفة اعمل معاها ايه كل مااذاكرها انساها تانى
ندخل على المواد الثقافية
الانجليزى كان عندى فيه شوية مشاكل لكن الحمد لله المدرسين اللى هنا فى المنتدى حلولى المشاكل دى
الاحياء واعوز بالله منها هاتخلينى انتحر ال dna مش فاهمة منه حاجة ولاعارفاه اساسا وبروح الدرس وانا مش فهماه والمدرس يقعد ييعيد ويزيد وانا ولا هنا
مع انى فى الوارثة كنت كويسة
والفيزياء بقى المدرس اللى باخد عنده درس مش بيشرح غير المسائل وسايب كل حاجة نظرى
والمدرس اللى بيشرح كويس لسه هايبدا بعد شهر او اكتر لانه مش بيعمل مجموعات ازهر
وانا اتعقدت واتخنقت وقتى مقتول اوى وموادى كتير اوى
مش عارفة اعمل ايه حاسة ان السنة ضاعت من ايدى ومش عارفة اظبط وقتى خالص
وغير دا كله عليا ضغط نفسى جامد
بسبب انى طلعت الاولى على المحافظة فى 3 اعدادى وكله منتظر هاعمل ايه السنة دى
انا بقيت خايفة اقول لحد انى ممكن افشل ومحدش مصدقنى خالص
حتى اصحابى بيقولوا عليا انى لئيمة وبقول كدا لانى بذاكر ومش عاوزاهم يذاكرو
ياريت حد يرد عليا بسرعة لانى خلاص تعبت والسنة بتجرى
آخر تعديل بواسطة Eng.Rasha ، 15-11-2008 الساعة 02:07 AM
|