[دبدوب زهران]

فى تدريب الترقى الى موجه ثانوى كان لازم تقدم بحث وقدمت بحث عنوانه الدروس الخصوصية افة التعليم فى مصر وطالبت فى البحث بالاتى .
1 - رفع راتب المعلم ليصبح المستوى الاول للمرتبات فى مصر
ورفع الراتب مش عايز موازنة اضافية من الدولة ولكن اعادة توزيع الميزانية
مثلا فلوس الكنترولات - مكافأت المتابعة - الفلوس اللى بتاخدها مديرية الامن لحراسة لجان الامتحانات - فلوس العمداء والظباط اللى خرجوا من الجيش واشتغلوا فى محو الامية ولكل واحد 1500 جنيه فى الشهر وعربية وسواق وسكرتيرة - المحافظ لو مر على لجنة الامتحان له عن كل لجنة 500 جنيه - المستشارين اللى بياخدوهم بعد المعاش - 800 مليون طبع الكتب المدرسية فى كتب الطلاب ما بيفتحوهاش والكتاب ينطبع مرة واحدة ويسلمه الطالب اخر السنه لانه طبعة فاخرة زى الكتب الامريكية - المدرسة تبقى متسلمة من سنتين ويجوا يشيلوا البلاط ويعملوا غيره علشان يبقى فيه سبوبة للسرقة - اجهزة الكومبيوتر ابو 4 الاف جنيه وتكلفته 1300 جنيه .
وغيره كتير .
2- قانون من مجلس الشعب بتجريم الدروس الخصوصية .
والمدرس اللى يعطى دروس خصوصية بعد ذلك يفصل واذا اعطى دروس وهو مفصول يبقى ممارسة مهنة بدون ترخيص يسجن مثل الاطباء .
3- الطالب اللى ما يحضرش 85 % من الايام يفصل ولا يدخل الامتحان منازل زى التعليم الفنى .
وكنت مجهز كيفية الامتحانات والادارة تستلم نتيجة من المعلم اخر العام ولازم تكون بمستوى معين والا يرجع المعلم لراتبه القديم .
وحصل اشتباك بينى وبين رئيسة اللجنة قائلة لى انت مابتديش دروس ؟ قلت لها ماهو انا كاتب ان كلامى ده خبرة 25 سنة دروس خصوصية . قالت انت بعد ما خربتها جاى تتكلم فى قوانين الوزارة . اتفضل يااستاذ احنا ورانا ناس تانية انت باين عليك فاضى .
المهم خرجت وتركت لهم البحث واترمى فى الذبالة بعد كده .