[dr.zomba]

المشاركة الأصلية كتبت بواسطة "لؤلؤه المحيط"

السلام عليكم ورحمه الله وبركاته

شكرا يا شريف وده طبعا زى ما قولت مش تشريف ده تكليف وأنا هاكتب عن شئ اثرفي شئ لم يكن علي الحسبان عمري ما اتخيلت إن ده ممكن يحصل في بيتنا
أول مره اعرف حاجه اسمها الموت أول مره اشوفه بيخطف اعز الناس عندي كانت اول مره احسن بالدنيا اللي احنا عايشنها
حصل ده مع احد أقاربي كان ابن خالي
أنا فعلا حسيت بعدها بحقارة اللي الدنيا للي احنا عايشنها لما يكون طفل في عمر الزهور عمره كان سنتين كان أجمل حاجه عندي
هابدا الحكاية من الأول
أنا خالي تزوج من قريب وأنجب توأم سماهم سيف وفارس كانوا أجمل حاجه
ومن فتره كان يوم ميلاد شخص في العائله عندنا

فخالي قالنا إن إحنا نقضي اليوم عنده ووافقناكانت آخر مره أشوفه فيها

كان يوم جميل قضينا اليوم مع بعضنا ولعبت معاهم هم الاثنين _اقصد سيف وفارس_ وكان يوم حلو جدا
واليوم خلص بسرعة
ابن خالي الأول سيف كلنا عارفين انه بيعيط كتير لما حد يمشي فخالي قالي أنا هاخده وامشي وبعدها امشوا انتم
ابن خالي الثاني فارس كان في البيت مش خرج معاه لأنه هادي ويضحك وعادي خالص
اخدنا العربية ومشينا بس بعد فتره افتكرنا إننا نسينا أوراق مهمه عند خالي فرجعنا تاني وأنا رجعت اجبهم
كان فارس بيعيط لأننا مشينا ده مش عادته أول ما شافني مسك في جامد ومش عايز يسبني بيعيط بطريقه فظيعة عمره ما كان كده
المهم اخدت الأوراق ووقفت شويه ومشيت كان صرخة صعب جدا دي آخر مره شفته زى ما يكون حاسس انه مش ها يشوفنا تاني
بعدها بكام يوم كان عندي درس ورجعت البيت مفيش حد في البيت خالص غير اخويا وأولاد خالتي ومفيش حد عايز يتكلم
كانت زوجه خالي وسيف وفارس في المطبخ وقت غداء وبتجهز الأكل عادي
وهم واقفين وهي بتجهز المائدة في الغرفة
فارس شد البوتوجاز علي كان عليه مكرونه بتسلق
المياه الساخنة كانت عليه بس المشكلة إن خالي شغله مش في نفس المحافظة وإحنا في محافظه ثانيه
الجيران اخدوه وراحو مستشفي الشيخ زايد بس المستشفي مفيهاش التجهيزات اللازمة الحالة كانت خطر
كانت نسبه الحروق اكتر من 60%_ تصوروا طفل يتحمل ده كله
والأصعب مفيش مستشفي كانت عايزه تاخده الحالة خطر ومفيش حد عايز يتحمل المسئولية المهم عرفنا نوديه مستشفي بس كان في وقت كثير فات
كان في المستشفي 5 أيام وبعدها توفي

اصعب حاجه اصحي من النوم في البيت قرآن شغال وفي ناس في البيت والبيت كله بيعيط وفي مكان للعزاء تحت البيت

فهمت كل حاجه
دي أصعب لحظه
أنا طولت عليكم قوي في
أنا فعلا حسيت بان الدنيا دي قليلة جدا
مين يتخيل طفل عمره سنتين؟؟؟ دي كانت اخر حاجه نتوقعها عمري ما فكرت ان حاجه تحصلهم
فعلا حسيت بان الدنيا دي مش حاجه دي اتفه شئ مفيش اتفه منها مش محتاجه كل اللي الناس بتعمله فيها
ناس مش منتظمه وسماع اغاني وبعد الشباب عن الدين وناس همها الاول والاخير الفلوس عرفت ان ده كله مش حاجه
انا عارفه اني طولت في الكلام بس كنت عايزه اوضح ان الحال اتغير في لحظه من اقصي لحظات لسعادة لأقصي حزن ممكن
دي كانت أول مره اشوف الموت و اشوفه بيخطف اعز الناس
الدنيا صغيره محدش عارف عمره قد ايه ممكن يموت كمان دقيقه كمان ساعه كمان سنه ممكن يكون عمره طويل بس لازم نعرف ازاي نتوب ونستغل الباقي من عمرنا
ها كرر كلامي تاني العمر صغير مفيش حد عارف هيموت امتي
لازم نستغل كل دقيقه كل وقتنا
مش نسيب العمر يعدي واحنا مش واخدين بالنا

************************************************** ****************************


للعلم أنا تعبت جدا وأنا باكتب الموضوع ده كان شريط الذكريات بيعدي قدام عيني من جديد

لا اله الا الله

البقاء لله و ربنا يرحمه ويرحمنا جميعا

وفعلا الدنيا دي حاجه تافهه جدا واحنا مدينلها اكبر من حقها وناسيين الاخره

خاطرة رائعة صادقة جدا

وربنا يصبركوا ويرحمه