[ีundertaker_2000]

المشاركة الأصلية كتبت بواسطة hazem_ayman

السلام عليكم ......



بعيد بقي عن الكلام الكبير , والشعارات الضخمة , والعبارات الثقيلة , والكلام غير
المفهوم , احنا النهاردة هنتناول موضوع او قضية في منتهي الخطورة واعتقد برده
ان دا انفراد مني بفتح الموضوع دا ومناقشته بجديه ومنطقيه وموضوعيه وبأهمية
كبيرة جدا جدا جدا ...


والموضوع دا متعلق بــ كواليس العلاقة بين الشاب والفتاة , ونروح بقي لأخطر
مشهد في هذه المشاهد , وهو الحوارات التليفونية او الإتصال عن طريق الموبايل او
حتي عن طريق التليفون الأرضي بين الشاب وصحبته او انتيمته او زميلته او حتي
حبيبته علي إختلاف المسميات وكترها وتعددها الفترة دى , ولاحظت يا جماعة
انتشار ظاهرة خطيرة في الحورات دى وهي إن ( الحوار كله بيتم عن طريق
الإسبيكر ) اللي هو يعني مكبر الصوت , وبيكون سامع المكالمة احياناً عدد لا بأس
به من الشباب ...

انا معاك ان فى شباب بتعمل الحكايه دى يا حازم بس مش كل الشباب بس انا شخصيا راى ان الى يعمل الحركه بيكون اصلا مش محترم او من بيئه مش محترمه

وعــــــــــن بعض الأسباب اللي ممكن تخلي شاب ينتهك كرامة بنت بالشكل
الحقير دا , ويعلن للجميع علي الملاء صوتها الرنان العذب وأول الأسباب دى هي
الفخر والتباهي بمعني انه بيفتخر بأنه متعدد العلاقات بكافة اشكالها وانواعها معهن
وانه يعني بالبلدي كدا ( مقطع السمكة وديلها ) او ( قاهر قلوب العذاري ) ودى طبعاً
من العبارات المشهورة والأقوال الشهيرة جداً والمتدوالة بين الشباب .. ومغزاها
يعني انــــــه شاب ملوش حل , وزيه زى الناس اللي طلعت القمـــــــــــر .


وفيه بقي سبب اخر وخطير جداً وهو ان الظاهرة دى انتشرت من باب العناد كمان
بين الشباب وبعضهم .. بمعني اكتر انك تلاقي بعض الشباب في صراع مع بعضهم
البعض علـ ( مين هيكسر أنف البنت دى ) , ومين هيفوز بلقب الجروب ويصبح
فارس الأحلام الأول والأخير , ومين اللي هيكون ليه بصمه عظيمه ينكتب عنها
اشعار ويقال فيها حودايت وحكايات ( يعني زى الف ليلة وليلة كدا ) .

والله اسباب تافهه زيهم يعنى هتفرق ايه معاه اذا كان حد يعرف انه عارف لانه او زميل علانه والله دى قله ادب

نستعرض مشهد بسيط جداً من خلف الكواليس لإتصال هاتفي بين صديق و احدي
صديقاته ... المحمول بيرن , يرد , وفي لحظة يفتح الإسبيكر , ويهمس لأصدقائه
المحيطين به للإنصات عشان يسمعوا المكالمة بوضوح , وبيبدأ هو ينطلق بقي
بكلامه المعسول ودخلاته الرومانسية والعاطفية علشان يحفز صديقته المتصلة
انها ترد بأرق والطف ما عندها من جمل وعبارات وكلام جميل , وبعد انتهاء المكالمة
تعلو الضحكات والنظرات التي تملئها علامات التعجب , وكله بيسأل بيقول ! معقولة
دى فلانة ؟؟!!!!! معقووووووووولة ؟؟ !!!! وينتهي المشهد الحقيــــــــر .


وننتقل للظاهرة التانية بقي , ودى طبعاً هقول فيها كلمتين صغيريين جداً للبنات
خصوصاً ... ( خلي بالك كويس .. قد تكون مكالمتك مع صديقك عبر المحمول مسجلة
بالحرف الواحد ) , وممكن تكون المكالمة دى سبب خطير في القضاء عليكي نفسك
بل ومن الممكن ان تقضي علي اسرتك بالكامل ........ دا مجرد جرس انذار !!!

طب انا نفسى اعرف حاجه الى بيعمل كدا بيكون هدفه ايه ولا هى خراب بيوت وخلاص


وننتقل لظاهرة اخيرة كانت تحتاج لموضوع خاص منفرد للخوض فيها بتأني ولكن
هيحصل دا تاني وتالت لانها فعلاً مهمه واهم ما في الموضوع ودى كمان انا هتناولها
من الواقع ومن مشاهد متعدده اتكررت قدامي , وهي انــك احياناً تعجب بزميلة
معــك في الجامعة أو الكلية , وتفاجأ بعد اعجابك بها انها علي اتصال بصديق لك
في حدود الزمالة ومش بيربطهم ببعض غير سياق دراسي بحت جدا , فأنت فضولك
بسبب إعجابك بهذه الفتاة , دفعك انــــــك تسأل صديقك دا عليها مثلا , وكان سؤالك
بيقول ( هو انت علاقتك ايــــه بفلانه ) ...... وكان رده صدمة لا توصف وقالك بكل برود
وبساطة ( دى صحبتي وحبيبتي ) .... ولكن أنت متأكد أن العلاقة بينهم لم تتجاوز
حد الزمالة فقط لا غير , وانا اكتشفت اخيراً وللإسف الشديد ان حتي علاقة الزمالة
بين الشاب والفتاة تكاد ان تقضي علي حياة زوجية من الممكن ان تنشأ من خلال
سؤال مثل هذا , وبسبب الإستهتار والتسيب الحاصل في كافة العلاقات , تتعرض
الكثيرات من الفتيات لأن تقتل بيدها فارس احلام مجهول بدون أن تدري .. لذلك
يدب هنا جرس إنذار اخر لكل الأخوات ...... تأملي في زميل دراستك كويس جداً .

طب هو بيسال صاحبه ليه مهو يروح يكلمها مالوش دعوه بصاحبه بص فى اصحاب جدعه وبتقول الحقيقه وفى اصحاب مش جدعه ومش بتحب صاحبها وبتحبله الخير والنوع دا يستحسن انك تبعد عنه



انا اســـف جداً يا جماعة علي الإطالــــــــــــــة , ولكني والله اكتب لأفيد الجميع
وأحاول ان اكون سبباً في القضاء علي ظاهرة ما او التصدي لها ولو بكلمة او بعبــارة
يضىء بها عقل مظلم , او يستيقظ عليها قلب تائه في بحور الظلام ......


توضيح هام جداً :


الموضوع واقعي , والمشاهد التي ذكرت واقعية وليست من وحي الخيـــــــــال .

الموضوع ظاهرة ولكـــن من الخطأ أن نعمم مهما كانت فاعلية وخطورة انتشــار
هذه الظاهرة .


والسلام اكيد ختـــــــــــــام .

ميرسى يا حازم الموضوع فعلا فى غايه الاهميه يا حازم وضرورى فعلا وربنا يستر والله

موضوع جميل ومفيد