مرة أشوفك عروسة...لابسة فستان قطيفة
ومرة أشوف صبية بكر متزوقة ونضيفة
فى عيونى بنوتة حلوة فى مشيتها أليطه
تترفعى عنا وتكرهى الزيطة
....
ومرة أشوفك عجوزة هايمة فى دروبك
شايلة هموم الناس وغارقة فى همومك
متنعكشة ومبهدلة وملخبطة هدومك
بندعى يامصر لينا...ربنا يدومك
....
ومرة أشوفك صورة مرسومة بالزيت
نيل وفلوكة ونخيل وشمس وبيت
مرسوم عليه طيارة وتحتها زرت وحجيت
ياريتك يابلدى تفضلى حلوة ياريت
....
أبعد ما أبعد ولما أشوفك أقول أدينى عدت وجيت
دفعت تمن بعادى وعنك أنا زكيت
بدموعى لما ذكرتك فى غربتى وبكيت
دعيت ربى يردنى وبعدين صليت
أرفع كفوفى واقول يارب احفظها لينا...مش حوفيها حقها مهما حكيت
....