[أحمـدنجـم]

من أصغر عيل في حارتنا لأكبر واحد زاط
بعد ما كان القلب العربي دايماً ريحته شياط
شوفنا عيون الملعون حمرا حابس أي عياط
جوز الجزمة في وشه هدية ملفوفة برباط
~ْ*~ْ*~ْ*~ْ*~ْ*~ْ*~ْ*~ْ*
جاي تندم دلوقتي يا ظالم وتقول اتسرعت؟
قتلت أخويا وجيت في جنازته ولولت ودمعت
جيت بأماني وقلت أنا هبني زعقت وسمعت
دي الحرية اتخنقت لما دمرت وولعت
~ْ*~ْ*~ْ*~ْ*~ْ*~ْ*~ْ*~ْ*
جوز الجزمة ف وشك طالع من قاعدة صواريخ
نفسها تاخد بوش الظالم تعزله ف المريخ
انت وجوز الجزمة يا بختك اسمكو ف التاريخ
لكن الجزمة اسمها أبيض واسمك فيه تلطيخ
~ْ*~ْ*~ْ*~ْ*~ْ*~ْ*~ْ*~ْ*
كان اسم الصحفي يا اخونا منتظر التعبير
عارف ان هتيجي اللحظة يصحى فيها ضمير
ساعة الصفر قراره وناره خلت قلبه بصير
قال: لحظة.. أحياها كرامة بعدها أي مصير
~ْ*~ْ*~ْ*~ْ*~ْ*~ْ*~ْ*~ْ*
جوز الجزمة العربي اتعملت علشانه أفلام
ليه الشعب العربي يا عالم عايش ف الأوهام
جوز الجزمة وعامل أزمة وهتفضل أيام
يبقى أكيد بادينا يا عالم تحقق أحلام
~ْ*~ْ*~ْ*~ْ*~ْ*~ْ*~ْ*~ْ*
نفسي أوباما ياخد العبرة من سلفه ويعدل
ينسى نعرة إن بلاده هي الراعي الأول
يعرف إن العربي بيرفض يركع أو يتبتل
لغير الله الواحد راسه ترفض تخضع تنزل
~ْ*~ْ*~ْ*~ْ*~ْ*~ْ*~ْ*~ْ*
من أصغر عيل في حارتنا لأكبر واحد زاط
بعد ما كان القلب العربي دايماً ريحته شياط
شوفنا عيون الملعون حمرا حابس أي عياط
جوز الجزمة في وشه هدية ملفوفة برباط