السلام عليكم ورحمة الله وبركاته
اهلا ومرحبا بكم في موضوعي 
حلوه الدخلة دي ؟ 
المهم انا هتكلم عن حاجة بتستفزني شخصيا لما بشوفها واكيد بتستفز اي حد
طبعا
عندنا في الجامعة تلاقي ولد ( وصحبته ) قاعدين جمب بعض - انا بتكلم عن ناس معرفه - وسوري في الكلمة لازقين في بعض في اي مكان بيقعدوا فيه سواء في محاضرة او برا المحاضرات دا مشهد مستفز وهما قاعدين مثلا بيتكلموا
ده مشهد متكرر كتير كل يوم وكل شوية واللى بيضايق اكتر انهم عارفين ان ده عيب وبيعملوه
المشهد التاني وهما بيهرجوا مع بعض
تلاقي الولد من دول وهو بيهرج مع ( صحبته ) مثلا يلوي دراعها يضربها في كتفها معلش فيي الكلمة يقرصها من درعها
انا ماشفتش كده انما عادى ممكن جدا اى بنت تسمح لواحد انه يهزر معاها تستحمل بقى اللى هيرجالها
وقدامي شوفت ولاد وبنات بيلعبوا كهربا وكانت بنت هي اللي فيها وبتجري ورا ولد وعشان ميخليهاش تمسكه بيهوشها برجله جت في بطنها بس علي خفيف
لا تعليق
واحد اعرفه مش صاحبي اوي يعني هو وصحبته تهريجهم والله العظيم بيقرفني لما يقعد يهرج معاها ويضربها وبعد كدا هي تقوم تجري وراه و المشكله انه عنده اخت بنت
طب في ولد راجل يرضي علي اخته انها تهرج التهريج دا مع ولاد ويمدوا ايدهم عليها وبتاع
مفيش راجل محترم يسمح لاخته انها يبقى ليها صحاب ولاد لان دى كارثة اساسا
دا الرسول صلي الله عليه وسلم بيقول " لأن يطعن في رأس رجل بمخيط من حديد خير من أن يمس امرأة لا تحل له "
قليلين اوى اللى عارفين الحديث ده واقل منهم هما اللى بيطبقوه
ما بالك بقي باللي بيكونوا اعدين لازقين جمب بعض ولما يهرجوا يبقي تهريجهم كله بمد الايد وان بقي عادي جدا انه يحط ايده عليها ويمسكها كدا
اظن عيب اوي اوي اللي بنعمله دا
عيب وحرام كمان مفيش شك
من وجهة نظري الشخصية ان اي بنت تسمح لولد ــ مهما كانت بتعتبره ــ انه يمد ايده عليها دي بتسقط من نظري تماما
عندك حق
بس يا ترا دي ظاهره وهتنتهي ؟
ان شاء الله تنتهى طول مافى ناس محترمة ولسه بتخاف من ربنا
بس فى حاجة مخليانى محتارة جدا
لما مرة كلمت بنت من البنات اللى بيعملوا دايما كده لقيتها متدينة وطريقة تفكيرها عجبتنى
انا مكلمتهاش على اللى هى وصحابها بيعملوه انما كان كلام عام
فوجئت انها وكل صحابها البنات ليهم تفكير كويس
وكمان بيطلعوا يصلوا وكمان بحس ان عندهم ايمان قوى
ورغم كل ده بيعملوا حركات بايخة مع الولاد وده اللى هيجننى
ربنا يهدينا ويهديهم جميعا
طب وايه سببها اصلا ؟
مش هقول الاهل وعدم تربيتهم لان ده كان زمان
اما دلوقتى فكل واحدة مسئولة عن نفسها وعن اللى بتعمله
وكمان الشباب دى مش لسه صغيرين عشان حد يقولهم عيب عليكم كده
كل واحد مسئول عن تصرفاته
وكمان التنشئة والتربية عليها عامل كبير بس لفترة معينة انما فترة الكلية دى بيبقى الواحد مسئول عن نفسة كاملا لان مفيش حد بيروح يحكى لاهله ده انا حصل معايا كذا وكذا فى الكلية
فبيبقى الولد والبنت الفترة دى اكنهم فى عالم تانى لوحدهم
وبرضه ربنا يهدينا جميعا
و في النهاية بقول ربنا يهدي
واسف لو كان في كلام خارج شوية او حاجة زي كدا بس انا مش عارف اوصف الموقف باقل من كدا