سؤال يطرح نفسه
هي مصر اصلاً بلدنا ؟
لو روحت اي مكان في العالم هتلاقي ابن البلد هو رقم واحد
وبعديه يجي الاجانب والمهاجرين واللاجئين
بس اللي معاه جنسية البلد
له حقوق .. وواجبات
يحب اوي يخدم بلده لانها ادته كل حاجه حلوة
لكن مصر
المصري في مصر بيتعامل اقل من الحيوان
الاجنبي له كل المميزات
صحة - تعليم - فلوس - امان
ويشترك مع الاجانب طبقة الحكام وكبار الاغنياء
الموضوع ده بيفكرني بايام الاحتلال الانجليزي لمصر
على فكرة مصر دولة مش مستقلة ولا حاجه ولا الشعارات اللي بيقولوها دي
بدليل ان مصر متقدرش تعمل اي حاجه الا لما تاخد الاذن من ماما
الخلاصة اننا اغراب في وطننا
ومش هتفرق كتير اغراب في وطننا عن اغراب بره وطننا
ممكن نروح وطن تاني يقدرنا ويحترمنا وساعتها احس ان عندي وطن فعلاً
مصر مهما هتعمل فيها عمرها ما هتقدرك
ببساطة لانها مش بلدك اصلاً
انت خدام فيها
اه كلنا خدامين عند طبقة الحكام والاغنياء بس بشكل غير مباشر
وفي فرق بين شغالين وخدامين
العمل في الاقتصاد هو مجهود شاق بس بتاخد عليه مكافأة
واذا كان بدون مقابل مادي اسمه عقوبة
واذا كان بمقابل مادي عبيط يبقى اسمه خدمة وذل ومهانة
اما عن احلامنا بان مصر هتتغير
اعتقد صعب ان لم يكن مستحيل
لانه التغيير محتاج قائد
واي قائد بيطلع في البلد دي لازم يا ينطرد يا يخرس
اما عن اذا كان فعلاً هيحصل ولا لأ
فاوكد انه هيحصل
بس مش دلوقتي خالص خالص
وانا شخصياً مش شايف انه عيب اني اروح ادور على وطن تاني
لاني بني ادم ليه طموح وعاوز انجح وابقى حاجه وعاوز وطن ابقى حاسس فيه بالامان والاحترام
وطن يبقى ليا فيه حقوق وواجبات
الحلو في مصر قليل اوي اوي اوي
والوحش فيها عامل زي السرطان بياكل الحلو
وبصراحة انا مش عاوز ابقى ضحية للسرطان ده
انا هعيش في البلد دي جوا الحيط
كام سنة اتخرج واشتغل سنة ولا اتنين وبعدين اهاجر
وهيبقى كل اللي بيمثل مصر فيا هما اهلي اللي هعمل كل اللي اقدر عليه عشان اجيبهم معايا
اما اصدقائي فالطبيعي اننا هنفترق هنفترق لاي ظروف
وساعتها مصر بالنسبة لي مش هتبقى اكتر من ذكرى ....
|