اقتباس:
|
انا في ثانوية عامة السنة دي مجموعي 96% وانشاء الله ناوية علي اسنان بس كنت عاوزة اسال شوية اسالة !!!
|
من كلام دكتورتنا المستقبلية - ان شاء الله - انها فى تالتة ثانوي السنة دي ...
ربنا يكرمك ويعملك اللى فى الخير ويفرحك اهلك بيكي .. امين
والله احنا السنة دي جدولنا من 8 الصبح لـ6 المغرب بس احنا مش بنشتعل دا كله لا طبعا
مثلا انهاردة كان علينا محاضرات من 8 لـ2 وبعدين روحت (والحمد لله مفهمتش حاجة
)
اللى عايز اقوله انك بتشتغلى على حسب جدولك .. اما بالنسبة لنظام المحاضرات نفسها
فالدكاترة بيشرحلونا شوية عربي وشوية انجلش لغاية ما نبدا نتعود على الانجليزي لان دراستنا كلها هتبقى انجليزي
والدكاترة بيقولوا عليهم طيبين .. (بس مش باين عليهم كدة لغاية دلوقتي
) بس هما بجد كويسين جدا
مافيش اقسام اول سنة انتي هتخديها كلها في كلية علوم لان اول سنة اسمها اعدادي
يعني دكاترة من علوم وكتب علوم وحتى المدرج قريب من علوم ( اسنان للامور الادراية بس )
لكن باقى السنين بتكمليهم فى كلية اسنان عادي ..
طبعا علشان اوضحلك اكتر احنا نظامنا كالتالى
اول سنة : اعدادي ( كلها فى علوم وملهاش فايدة تقريبا فى كلية اسنان )
تاني سنة : اولى اسنان ( فى كليتك وبتكون اسهل سنة فى اسنان لانها خفيفة وكلها مبادئ)
تالت سنة : تانية اسنان ( بتدخلى فى الجد وطبعا فى خلال السنتين الاوائل بتشتغلى على اسنان مش طبيعية )
رابع وخامس سنة : تالتة ورابعة اسنان ( بتشتغلى على بنى ادمين .. واكتر سنتين فى شغل يدوي كتير وكمان اكتر سنتين مكلفتين - فى الفلوس للادوات - وكل اسنان ميزتها انها كلها شغل يدوي )
سادس سنة : امتيــاز ( بتكون فى مستشفى كلية طب الاسنان اللى جنب الكلية بالظبط وفى السنة دي ما بتدرسيش خالص بتشتغلي بس وتاخدي مرتب شهري كمان حوالى 200 او 300 جـ فى الشهر )
وبكدة تكوني دكتورة اسنان اد الدنيا وتقدري تفتحي عيادة مباشرة .. وربنا يوفقك
اقتباس:
|
-المحاضرات كلها انجليزي ولا المصطلحات انجليزي وباقي الكلام عربي؟
|
احنا اعدادي شوية كدة وشوية كدة لكن على نص السنة كدة هنبقى انجلش ع طول
وكل السنين انجلش .. كتب المحاضرات وامتحانات وشرح وكله .. بس مش هتكون مشكلة ليكي - ان شاء الله - لانك هتكوني اتعودتي .. ولعلمك كل كليات القمة كدة انجلش فى انجلش ..
اقتباس:
|
-اه نظام المدينة الجامعية في المنيا؟
|
الله اعلم .. يمكن اي حد من الدكاترة البنات يقدروا يفيدوكي ..
اقتباس:
|
-التخصص أول سنة ولا بعد السنة الاولي؟
|
مافيش تخصص .. انتي دكتورة اسنان عالطوووول ... لانك بتتخرجي دكتورة اخصائية جراحة فم واسنان
وبعدين تتخصصي فى حاجة معينة لو عايزة بتحضري فيها ماجستير ودكتوراة .. وكدة يعني ..
لكنك ممكن تفتحى عيادة على طول بعد سنة امتياز ..
اقتباس:
|
ممكن تجاوبوني لاني بجد خايفة السنة الجاية واكون متشكرة جدا
|
مافيش داعى للخوف كليتنا ممتعة جدا .. انتي بس شدي حيلك وهاتي مجموع عالى علشان تضمني ( كلية طب الأسنان)
اقتباس:
|
معلش سوال تاني اه نظام الجامعة المفتوحة في طب الاسنان ؟
|
الله اعلم .. بس اعتقد امفيش تعليم مفتوح فى اسنان اصلا ..
وربنا يوفقك وييسرلك اللى فيه الخير .. واستخيري ربنا وشد حيلك
ثم ان الحكاية لسة بدري عليها شدي حيلك السنة دي وربنا يوفقك
ولو فيه اي اسئلة تانية احنا فى الخدمة
