عرض مشاركة واحدة
  #1  
قديم 11-12-2017, 05:10 PM
Highlevelmath2 Highlevelmath2 غير متواجد حالياً
عضو مجتهد
 
تاريخ التسجيل: Apr 2012
المشاركات: 101
معدل تقييم المستوى: 12
Highlevelmath2 is on a distinguished road
Impp قبل دخولك هندسة في الاعوام القادمة ياريت تقرا سوق الوظايف كويس نصيحة من مجرب.

أنا مهندس مدني خريج حديث, مرتبة امتياز و بشتغل ب2500 فالشهر و مواصلاتي 1000 جنيه يعني صافي اللي بيدخلي حاليا 1500 و خبرة زفت عشان مشاريع الانشاء العملاقة محتاجة وسايط و المشاريع الصغيرة اللي متاحة حاليا مبتديش خبرة كافية للسفر او لاي حاجة كبيرة...
ماساة؟ ليه بقا حصل كدا بدل ما نلطم و نعيط او تقولي اني كداب اصلا و تخش و تلبس و تطلع تقول ياريت اللي جرا ما كان؟
___________________________________

دلوقتي في trend فالجامعات يا رب يتشال ان "خش مدنييييييي مدني فلوسسسس مدني عزززززز" و تلاقي لو الدفعة 2000 واحد 1000 مدني و 300 عمارة و الباقي علي بقيت الاقسام. لان الناس بتحسبها بنشوف اصحابي داخلين ايه و نخش زيهم ولا نشوف الالبية رايحة فين, و مش عارفين ان السوق عرض و طلب.
اللي في منه كتير سعره قليل و اللي في منه قليل سعره كبير لو الاتنين عليهم نفس الطلب.
_____________________________________

اشرحلكوا و هاخش ففنيات و تفاصيل ليه الانشاء واقع مع ان من برا يبان ان مصر بتبني كتير:
مجال الانشاء في مصر بقا مشاريع حكومية و وقتها بقا ضيق جدا و تعاملات الحكومة في الربج للمقاولات مختلف عن الخاص, الحكومة بتجبرك تشتغل و بعدين تبقا تدفعلك المستخلصات, انما لو مشتغلتش؟ شركتك هاتقعد فالبيت لان 99% من الشغل بقا حكومة. اه في انشاء و اه الصحرة بيعمروها و باين الكلام دا من برا بس الوضع من جوا صعب.

أنت لو صاحب شركة و معاك عمال و مهندسين و مطالب منك تصرف فلوس المشروع من جيبك كلهم و المشروع كله اسكان اجتماعي و سكني اول حاجة قبالك ايه؟ ازاااااي تجيب الفلوس دي كلها و ازاااااي توفر كل مليم ازاي تعمل cost reduction و cost control عشان الوضع مأزم, لو جيت فنص المشروع و فلست هاتتبهدل و لو خلصت المشروع و مخدتش ربح اصلا بسبب النفقات اهو يا دوب شغلت نفسك و صرف مرتبات.

طيب الحالة قدامك كشركة ملزمة بمشروع و مقاولة و عايز توفر اول حاجة هاتعملها ايه؟ المشاريع كتير بس سهلة سكنية مش ابراج و مش حاجة كبيرة, يبقا المهندس التقيل هحتاجة فاية؟ هاجيب ليه حد خبرة فالhigh rise ولا خبرة فالكباري و يقرفني ففلوس و مرتبات ليه؟ هاجيب اللي لسا متخرج و هاجيب يادوب 1 يشيل شغل الباقي كله و امشي بقيت المهندسين و حلو اوي عليه مرتب اهبل و تعبان. لانه لسا متخرج و ساذج مش فاهم حاجة و مش عارف ايه اللي ليه و ايه اللي عليه.
العمال هابدا اقصهم و اجيب كبير عمال بدل ما بيبقا لكل عمارة هايبقا كبير عمال لكل العماير اللي انا واخدها.
و الكارثة اللي بتحصل بيجيبوا مهندس مدني واحد بس لمدة نص سنة يادوب العمال تفهم ازاي تنفذ و يمشوه و كبير العمال يكمل بداله بسعر اعلي منه (لانه هايكمل في التشطيبات كمان).

دا الوضع فالانشاء. سلعتك كمهندس مدني بقت مستهلكة جدا و مصدر قوتك اللي هو التصميم المعقد مبقاش بيتعمل في مصر. تمنك واقع بسبب ان في 85 الف مهندس مدني حاليا و الشغل ميتعداش ال20 الف وظيفة. تعمل ايه؟!
__________________________________________________ __

أبعد عن المجالات اللي بالشكل دا حتي لو اسمها شيك و حلو و المهندس راح و المهندس جيه, المهندس بيتمرمط دلوقتي. متخشش مجال ممكن التنفيذ بتاعه فحاجات بسيطة اي عامل يعمله و يحلوك محله و لا يستسهلوا الشغل و يجيبوك طور فساقية. خش مجال صعب و دقيق و محتاج فعلا الخريج بتاعه.


رايي؟ انت قبل ما تقرر لازم تدرس السوق متقلش انا داخل اللي بحبه و تسكت فاغلب الاحيان اصلا هاتكتشف انك كنت واخد فكرة غلط عن الشغل زي اللي فاكرين ميكانيكا دول Iron man ولا بتوع حاسبات Mr Robot.
انزل الشارع عايز تشتغل مبرمج؟ انزل روح شركات برمجة خشها و اسال الHR عليها و علي احوالها عايز مدني يا سيدي انزل و اسال الشركات و انزل المواقع قبل ما تقدم اصلا فالكلية او فالقسم, انزل شوف الشغل عامل ازاي بنفسك و احكم عشان متضيعش سنين من حياتك علي الفاضي.

حاليا في مصر مطالع 2018 سوق الانشاء واقف و مش عاطفي مع حديثي التخرج بسبب اللي فلته فوق دا. سوق المعماري و الفنون الجميلة احسن عشان بيشتغلوا شغل 3DMAX و بريزينتيشن و جرافيكس حلو جدا للعملا برا مصر.

حاليا احسن و اقوي سوق هو التكنولوجيا. حاسبات و معلومات حاليا فشيخة و مرتبتها كوية جدا الdevelopment/programming حاليا واكلة الجو جدا, و ادارة المشروعات و الtime planning لبتوع تجارة انجلش و لازم اللغة انجلش.

ايه دا؟ انت بتقول ان "المعفنيين" بنوع تجارة و حاسبات احسن من المهندس؟ يا باشا الموضوع مش موضوع معفن ولا حلو ولا قمة ولا سفلي ولا اي حاجة الموضوع عرض و طلب. بتوع تجارة عربي كتير جدا اللي يميزهم اللغات. سوقهم اوسع بكتير من المهندس الانشائي او حتي المعماري دي حاجة.
تاني حاجة المبرمجين و اللي شغالين development قليلين جدا جدا و الشاطر فيهم بيتقدر بشكل بشع. و السوق عليهم كتير لان كل الناس بتمشي فالIT لان الشبكات اسهل نسبيا فبقت حاجة مميزة.دايما دور علي اللي يميزك مش تمشي ورا الاغلبية فالهيصة.
__________________________________________________ ______________

و خلي بالك اللي باقوله النهاردة ممكن يتشفلب بكرا. بس اللي واضح يعني ان الانشاء و مدني هايفضل مضروب فترة كبيرة كدا لان في تكدس ضخم عليه. و الجامعات الخاصة بتخرج ضعف الحكومة حاليا و خلي بالك من الموضوع دا السوق فالتصميم (مش التنفيذ او المقاولات) مش عايز جامعات خاصة.
رد مع اقتباس