[أ/رضا عطيه]

عمرك سمعت عن معلم مسك منصب في الزراعة ولا الصناعة ولا الصحة ولا التعمير ولا القضاء وغيرهم


طب ليه وزارتنا الوحيدة المتاحة لكل لهؤلاء وكل الفئات ومحروم منها أصحابها


فتش هتلاقى المهندس والمستشار والدكتور رئيس كنترول أو وكيل وزارة أو مسئول إدارى في المديرية


مهندس لاتعرفه معمارى ولاهيئة أبنية ولا حتى مهندس زراعى - المهم والأهم أنه من أهل الثقة


مفيش تشكيل وزارى غلط في مرة واختار مدرس حقيقى -


اتصل بالطلبة وداق طعم طباشير الوزارة وشال جدول أكبر من نصابه وانتقل شرقا وغربا لسد العجز


لأ -اللغة السائدة هنا أن التعليم العالى مسيطر على التعليم اللى مش عالى


الشهادات بتاعته لازم تكون مدموغة بخاتم هيئات ومؤسسات غير مصرية لينال شرف الوزارة


فيأتى ليطبق ماتعلمه في الخارج فيجد نفسه غرقان في شبر مية الواقع بالداخل


ماحدش هيعدلها غير اللى عايش في واقعها


ماحدش هيعدلها ويطورها غير لما وزيرها ومستشاريها ووكلائها ومديرى أعمالها من اللى شغالين فيها بالفعل مش بالمسميات


كل يوم نبتكر مدارس جديده باسم بلدان عديده


والسؤال : هل جئنا بكل ماهو متوفر في هذه المدارس في بلدانهم
أم جئنا فقط بالمبانى والمسميات والمناهج اللا مصرية من باب التقارب السياسى ودمتم





شكلنا هنعيش زمن جديد من التجارب


ولنا ولأولادنا الله فهو وحده الحكم العدل