خلال السنة اللي فاتت نظمت مصر مجموعة كبيرة من الأحداث الرياضية العالمية واللي أشاد بنجاحها كل المشاركين فيها.. غير جودة التنظيم؛ اللي زود كمان من قيمة النجاح إنه حصل في ظروف استثنائية بيمر بيها العالم كله بسبب جائحة كورونا.. اللي هو أنت كدولة مش بس عندك بنية تحتية رياضية مميزة وبمواصفات عالمية، وقدرات تنظيمية قوية.. لأ.. وبتعرف توظفهم بشكل مثالي ومبهر مهما كانت الظروف..
عشان كده من الأخبار العظيمة والمهمة اللي أعلنه النهاردة الاتحاد الدولي للسباحة "فينا" عن استضافة مصر لـ 3 بطولات عالمية في منطقة الأهرامات بداية من سنة 2023 حتى سنة 2026 بناءاً على اتفاقية تم توقيعها مع الاتحاد لاستضافة مصر سلسلة من الأحداث المائية الدولية في منطقة الأهرامات..
مصر هتبدأ باستضافة بطولة كاس العالم للغطس العالي ثم بطولة الجائزة الكبرى للغطس ثم بطولة العالم للسباحة الفنية، وهتستضيف خلالهم أفضل الغواصين والسباحين الفنيين في العالم..
"ياسر المسلم" رئيس الاتحاد الدولي للعبة قال: (يسعدنا توقيع هذه الاتفاقية التي تشهد مشاركة رياضيين من الطراز العالمي يتنافسون في الموقع المذهب لأهرامات الجيزة القديمة)..
أحداث زى دي لما تتنظم هيتم إذاعتها على شاشات التليفزيون في كل العالم، ومن خلالها وبالتبعية هيتم تسليط الضوء على جزء مهم من حضارتنا كدولة وهتخلّي الكل يشوفنا عن قرب ويتعرف على حجم اللي حصل وبيحصل وهيحصل على أرضنا..
اللي بيدوق طعم النجاح بيبقى سهل عليه يكرره.. حاجة تدعو للفخر إننا نشوف بلدنا بقت واحدة من أفضل دول العالم في جذب الأحداث والفعاليات الرياضية العالمية.. ثمن الثقة دي كان تعب ومجهود وتكاتف من كل أجهزة الدولة عشان نوصل للمرحلة دي.
#بالعامية_المصرية
__________________
ابتسم ... كن متفائلا ... وقل الحمد لله 
|