[إبراهيم أبو ليفة]

صباح الفل يا قلمي .
صباحو يا هيما .
بصراحه كده قريت مقال في الاخبار وعاوز اناقشك فيه.
استر يارب..!!!
الانتخابات البرلمانيه القادمه .
ملكشي فيه
يعم اصبر بس دا الراجل بيقول ان الحكومه عامله جراج كبير وجايبه طباخين من احسن الفنادق في مصر علشان تطبخها
طيب والسلطات علشان انا بحب السلطه اوي
هتستهبل ؟
لا بجد فيه كفته طيب؟
وبعدين فيك هتحبسنا ارحم نفسك انتخابات ايه؟ وبرلمان ايه ؟ يبني احنا في حاله حرب وحكينا كتير علي فلوس الطبيخ وتكاليف الخضار هما حتتين جاتوه وسندويتش هامبرجر وقضيت..
حرام عليك كل حاجه هزار دي مصر!!!!
منا عارف انها مصر امال حيفا (صراحه ملقتش ولا مدينه ولا عاصمه تنفع تتكتب غير حيفا )
هاعديهالك
غلوش انتا بس واطلع من الموضوع
الموضوع بصراحه كده ان القوانين بتقرر وماشي حالها زي الفل بلا برلمان بلا مجلس امه بلا مجلس شعب اذا كان الشعب دا اساسا شعب ...
لا والله ؟
اه والمصحف علي رأي يوسف ولدي
ودا ماله دا كمان ؟
فوكك منه دلواتي ..
لا بجد والنبي لتقول.
خللي باللك عمال تحلف حلفانات حرام ...!!!
يعم انا بتكلم بلغه (دارده) دارجه يعني ..
تصدق بالله مافي حدا رح يقرأ كل الكلام الفاضي دا ..
بص الواد ساعات بيرّخم علّي فأنا اقوله : لا والله يقولي اه والنعمه ...تربيه فيسبوك بعيد عنك
المهم انتا فصلت مني ولا نرجع لموضوعنا ؟
قول يا حزلئوم ..
بالفصحي بقي وبلغه السياسه واهلها ومن لا يفهمهما يبتعد وكفي عليه ماتم كتابته انفا ..
مصر لا تحتاج اي مجالس نيابيه اكرر هل يختلط الزيت بالماء ؟؟؟؟
افندم !!!
الرئيس ماشاء الله 64 حصان والمجلس نص حصان بالتالي هيعطلونا بلا تزوير بلا تزييف بلا مصاريف وفي الاخر تجي امريكا تقولك الطبخه دلعه مززه وحقوق الانسان ومشاكل الصعايده ..
الا قول صح هو الشعب كم حصان؟
شعبنا بخير وشبابنا بخير
واسأل سوق المخدرات .
لو مش لقتوني بعد الضهر يبقي انا في الوادي الجديد لجنه ثانويه عامه علي المعتقلين
يارب استر