[scrubs]

المشاركة الأصلية كتبت بواسطة cenderella1993

ميرسى بجد على ردك
واذى يعنى مفيش رسميات هو مش انت اكبر مننا واجب علينا الاحترام
المهم ذى ماتحب برده
انا شايفه انى فى اقسام كتيره حلوه بس انا كان نفسى اخش علوم عشان اشتغل فى تراكيب وصناعه الادويه وبعد كده فكرت ان قسم البترول الشغل فى احسن وهو برده حلو بس انا عارفه ان هو مش متوافر فى كل الكليات وبصراحه انا سمع انو غالى كتير اوى فانا محتاره ومحتاجه بجد لمساعده حد عارف كل الاقسام وايه المفيد فيها
المهم عشان مطولش عليك قولى من وجهك نظرك ايه افيد قسم فى سوق العمل يعنى الواحد يشتغل فى بتوافر يعنى بس ياريت يكون بعيد عن التدريس معلش طولت عليك
وشكرااااااااا على الرد

الحمد لله الموقع اشتغل تمام اهه واقدر اجوبك دلوقتى

بصى فى موضوع القرارت المصيرية لازم نفكر براحة ونسأل ونشوف خبرات الناس التانية
انتى عايزة تشتغلى فى صناعة الادوية وده كان السبب الاساسى عشان تدخلى علوم
بس لما الحمد لله بقيتى طالبة فى علوم فهمتى الدنيا وعرفتى الاقسام عن قرب شوية
ووارد جدا ان الانسان يحب حاجات مكنش بيحبها زماان لسبب بسيط انه مكنش يعرف الحاجات
ديه قبل كده زى مثلا قسم البترول


تعالى بقى نكلم فى المفيد والمهم

اى حد درس كيمياء فى كلية علوم يقدر يشتغل فى الادوية يعنى كيمياء سبشيل يقدر كيمياء / نبات يقدر
وغيرهم ولكن ملحوظة مهمة جدا مهما اشتغلتى فى مجال الادوية هتلاقى الصيدلى هو الرئيس وانتى تحت منه
ده مش كلامى ده كلام انسان قريب منى اوى عنده خبره 25 سنة والخبرات هنا هى اللى ليها الاولوية

لو عايزة تشتغلى فى مجال البترول

فيه عندك قسم جيوفيزياء وفيه عندك قسم جيوفيزياء/جيولوجيا الاتنين مؤهلين للعمل فى مجال البترول ومطلوبين + مجال الانشاءات والمياه الجوفيه وغيره
ولكن ملحوظة فرصة البنات صعبة فى المجال ده لأن المجال ده بيحتاج الى سفر بشكل شبه دائم او بيات فى المواقع وغيره من الحاجات الى بتمثل عقبة للبنات


طبعا انتى احترتى اكتر وهتقولى هو عمال يقفلها فى وشى ليه
لأ انا بكلمك بكل امانة ونقلا عن تجارب ناس اعرفها والحمد لله انك عرفتى دلوقتى بدل ما تعرفى بعدين


بصى فيه اقسام تانية جميلة جدا فيه مثلا فيزياء/علوم حاسب هتشتغلى فى مجال الكمبيوتر من برمجة وشبكات بس المجال ده محتاج كورسات فى الصيف وشغله مطلوب وشغل نضيف جدا ومناسب ومرتباته حلوة
برضه من كلام واحد خريج علوم عين شمس من نفس التخصص وشغال فى تى اى داتا

فيه فيزياء حيوى واشهر حاجة للمجال ده اخصائى اشعة فى المستشفيات

وفيه مجال الكيمياء وده مفتوح جدا وواسع جدا من حيث الشغل
لو بتحبى الكيمياء اوى يبقى تدخلى كيمياء سبشيل
او نص نص ادخلى كيمياء/فيزياء وامسكى العصاية من النص

طبعا انا بعدت عن الرياضة عشان انتى عارفه الرياضة

الخلاصة انا برشحلك

فيزياء حاسب ---> لازم تكونى بتحبى المجال + كورسات +شغل مناسب ليكى وفرص عمل موجوده
كيمياء ----> هيفتح ادامك سكك كتير فى جميع مجالات الشغل سواء الادوية او غيره ولا بد من حب المجال

انا مجبتش سيرة الجيوفيزياء او الجيولوجيا عشان انا بربط التخصص بمجال العمل وزى ما قولت فوق فرص البنات صعبة والناهرده هتأكد من واحد شغال فى شركة بترول عن موقف البنات فى مجال الشغل كجيوفزيائى

ادعى ربنا يوفقك للأختيار الصحيح ولا بد من صلاة الاستخارة
ولما تقررى قولى اخترتى ايه وهتناقش بأذن الله
اسف على الاطاله بس ده اختيار مصيرى لا بد من الصراحة والواقعية