[علمي علوم]

اولا اعتذر للجميع عن غيابى فى الايام السابقة وده كان بسبب المشاكل اللى كانت فى المنتدى اللى كانت بتخلى بعض الكمبيوترات ماتقدرش تدخل على المنتدى بس الحمد لله المشكلة اتصلحت :D

وانا ملاحظة إن النشاط زاد الحمد لله فى الموضوع وده شاء يسعد جدا
واهلا وسهلا بكل الموجودين

<div class='quotetop'>إقتباس(Y U N A @ Jul 4 2007, 04:15 AM) [snapback]340401[/snapback]</div>

البيولوجيا الجزيئية والهندسة الوراثية فى اى قسم ؟؟

وايه نظامها ؟؟[/b]

فى قسم جديد فتح السنة اللى فاتت فى جامعة القاهرة متخصص فى الفرعين اللى بتسأل عنهم وهو قسم برسوم دراسية خاصة غير باقى الاقسام وبتكون غالية شوية حوالى 8 الاف تقريبا بس انا ممكن اتأكدلك عن الرسوم ايه بالظبط لو عايز

وربنا يوفقك يا رب

<div class='quotetop'>إقتباس(dodo34342000 @ Jul 19 2007, 04:12 PM) [snapback]340901[/snapback]</div>

يا جماعة ايه اخبار التجهيزات و المعامل و كده ؟ انا كل ما اقول لحد عايزه ادخل علوم يقوللي انتي مجنونة[/b]

ههههههههه ماتقلقيش يا دودو انتى لسه سليمة :D
احنا عندنا معامل وتجهيزات كويسة الحمد لله طبعا مش على المستوى المطلوب اوى بس فى نفس مستوى باقى الكليات فى مصر

<div class='quotetop'>إقتباس(*Pretty * @ Jul 21 2007, 04:57 AM) [snapback]341413[/snapback]</div>

السلام عليكم ,,
اولا شكرا ليكي يا اميرة ع الموضوع ده
ثانيا انا كنت عاوزة اسال عن كلية علوم
هل التخصص بيبقي من اول سنة وللا ايه ؟؟
يعنى مثلا انا عاوزة اتخصص علوم كميا
هل بادرس كل الفروع اول سنة وبعد كدة اختار وللا من الاول باختار اللى عاوزاه
ولو هاخد كله ف اول سنة هل يشترط انى اجيب تقدير معين عشان ادخل قسم اللى عاوزاه وللا عادى

وهل لسا فيه نظم ان اللى يجيب تقدير ف اول سنة يقدر يحول لصيدلة مثلا وللا خلاص
و ايه مجالات العمل لخريجى كليه العلوم


اسفه للاطالة و يا ريت تفيدونى لانى لسا محتارة ادخلها وللا لا
لان كتير يخوفونى منها

شكرا[/b]

وعليكم السلام ورحمة الله وبركاته
العفو يا Pretty على ايه
وبالنسبة لاسئلتك:_

_التخصص بالنسبة لعلوم القاهرة بيبقى من سنة تانية لبعض الاقسام ومن سنة ثالثة لاقسام تانية , لكن فى تخصص اولى كدا من سنة اولى وده بيخليكى تتخصصى فى مادتين بس وتأخدى اربع مواد تانية اجبارى منهم مادة اللغة الانجليزية ودى ترم اول بس , لكن التخصص النهائى زى ما انا قلتلك كدا فى سنة تانية او تالتة حسب القسم اللى انتى عايزاه

_ولو اخدنا مثلا انك عايزة تتخصصى فى الكيمياء , فهيبقى عندك خيارين:_

1_ انك تتخصصى كيمياء مذدوج يعنى تتخصصى فى الكيمياء ومادة تانية والمادة التانية دى بتكون يا اما مادة من مواد البيولوجى ( الاحياء ) وهما : الحيوان او النبات او الحشرات _ والتخصص هنا بيكون من سنة تالتة بعد ما تدخلى قسم كيمياء بيولوجى فى سنة تانية ونبات حيوان فى سنة اولى.
يا اما تكون مادة الفيزياء _ والتخصص هنا بيكون من سنة تانية وتكونى دخلتى اى قسم من سنة اولى

2_انك تتخصصى كيمياء منفرد , يعنى تدرسى كيمياء بس والتخصص هنا بيكون من سنة تالتة بعد ماتكونى دخلتى قسم ( كيمياء فيزياء ) فى سنة تانية_ بس لاحظى انك علشان تتخصصى منفرد لازم تجيبى تقدير جيد جدا على الاقل فى سنة تانية وجيد جدا فى مواد الكيمياء كلها اللى درستيها فى سنة اتنية _ بس بجد القسم ده جميل وعليه اقبال كبير جدا فى الكلية علشان كدا شروطه جامدة شوية

_ والنسبة للدراسة فى سنة اولى فانتى زى ماقلتلك بتختارى مادتين تذاكريهم وبيكون معاهم اربع مواد اجبارى هم:_
الكيمياء _ الفيزياء _ الرياضيات _ الإنجليزى ( ترم اول فقط ).

_ وفى اقسام علشان تدخليها بتشترط تقدير معين زى الكيمياء وفى اقسام لأ , بس كل الاقسام المنفرد بتشترط تقدير بس بيختلف من قسم لقسم.
وفى مواد كدا اضافية بتكون دراستها بالفربى زى حقوق انسان وحاسب الى وكدا

_وبالنسبة للتحويل لصيدلة فده اتلغى خلاص من الكلية.

_ وبالنسبة لمجالات العمل لخريجى علوم فهى كتيرة والحمد لله وكل قسم ليه مجالات شغله الخاصة بيه , ومثلا قسم الكيمياء من اكتر الاقسام اللى ليها مجالات عمل كتير ومنها:_
شركات الادوية _ معامل التحاليل _ مصانع كيميائية _ مستشفيات ..........................الخ :D

ولا تتأسفى ولا حاجة احنا فى خدمتك
ويا رب اكون افدتك ولو عايزة اى اسئلة تانية اسئليها على طول.

<div class='quotetop'>إقتباس(البروفسور @ Jul 21 2007, 09:06 AM) [snapback]341452[/snapback]</div>

اولا اشكرك على موضوعك الرائع ده والي حيفيد ناس كتير اوي
نيجي لسوالي بقى ايه الكمبيوتر سينس وهل هي في كليه العلوم وايه شروط دخولها وانا علمي رياضة ينفع ادخلها ولا لا

سؤال اخر اسف جدا

هل انا علمي رياضة ينفع ادخل جولوجيا وهل في تخصص بترول؟[/b]

العفو يا البروفسور ويا رب فعلا يفيد ناس كتيرة
وبالنسبة لسؤالك:_
فعلا كلية العلوم فيها قسم كمبيوتر منفرد وقسم رياضة وكمبيوتر وشروط دخولها انك تكون علمى رياضة وكويس انك كدا فعلا :D وساعات بتتطلب تقدير معين على حسب كل سنة تقريبا, و على فكرة القسم ده جميل جدا وليه شغل كتير برضه .

وبالنسبة لسؤالك التانى , واسأل برحتك ولا يهمك :_
اكيد ينفع تدخل قسم جيويوجيا خاصة ً انه دلوقتى بيطلب علمى رياضة بس والقسم ده بيطلع تخصص بترول وممكن تشتغل منه فى شركات تعدين وبترول وكدا إن شاء الله , هو وقسم جيوفيزياء كمان .

ربنا يوفقك ولو فى اى اسئلة تانية اسئل على طول.

<div class='quotetop'>إقتباس(البحـــ مندىــــــار @ Jul 22 2007, 11:23 AM) [snapback]341745[/snapback]</div>

هل يوجد بجامعات مصر علوم قسم فيزيا نووية ولا لأ وإن وجد فى اى جامعة ؟؟؟؟[/b]

بالنسبة لجامعة القاهرة ففى قسم فيزياء منفرد ممكن منه تدرس فيزياء نووية من سنة تالتة.
لكن بالنسبة لباقى الجامعات فالحقيقة انا معرفش للاسف الشديد و يا ريت لو حد تانى عنده معلومة عنها يقولنا


<div class='quotetop'>إقتباس(اينشتاين @ Aug 8 2007, 08:14 AM) [snapback]344901[/snapback]</div>

شكرا اوى ع الفكرة الجميلة واتمنى عبقرينو بعد كده يعمل اقسام منفردة للكليات العلمية لانها صعبة ومحتاجة تجمع لاكبر عدد من الاعضاء عشان كل واحد يساعد التانى


انا بقى ليا شوية اسئلة

1- ايه المطلوب عشان اكون معيد فى الكلية وهل لو ما بقيتش معيد ايه الخطة المطلوبة عشان اكون استاذ بالكلية فيما بعد
2 - انا متردد لحد الآن بالنسبة للكلية وخايف اوى من لقب "مدرس" - مع احترامى لجميع المدرسين طبعا وانا بكن لهم كل الاحترام وكلهم على راسى من فوق ولكن المشكلة تخصنى انا فانا لا اتوقع ان اجدى فى هذه المهنة - فهل يوجد مهن اخرى غير التدريس متوفرة لتخصص الرياضيات البحتة وعلوم الحاسب ؟
3 - هل جامعة عين شمس افضل من القاهرة من حيث وفرة المعامل والامكانات والمادة العلمية وهيئة التدريس ؟
4 - هل ممكن فيما بعد انى اخد دورات برمجة وجرافيك وتصميم مواقع واكون بنفس كفاءة خريج حاسبات ومعلومات او هندسة قسم حاسب الى ؟؟!!!!
5 - ايه المواد اللى يتم تدريسها فى سنة اولى ( العلوم الطبيعية ) ؟

معلش الاسئلة كتير وانا عايش فى جو من القلق النفسى وارجو ان حد يجاوبنى ويريحنى سواء طلبة او خريجين[/b]

اهلا وسهلا بيك يا اينشتاين وشكرا على تشجيعك

وبالنسبة لأسئلتك:_

1- المطلوب لتكون معيد انك تطلع من الاوائل على قسمك ودى مش حاجة صعبة على فكرة الحمد لله وخاصة لو القسم عدد الطلبة اللى فيه قليل شوية , ولو مابقتش معيد اولا ممكن لو اتخرجت بتقدير حلو تتعين معيد فى اى كلية تانية زى هندسة مثلا خاصة ً الجامعات الخاصة , وممكن كمان تحضر تمهيدى وبعدين ماجستير ودكتراه .
لكن بالنسبة لتكون استاذ بالكلية من غير ما تبقى معيد فاللاسف انا معرفش ازاى بس ممكن اسئلك إن شاء الله وارد عليك.

2- انا عايزة اقولك ان دلوقتى تعتبر اخر وظيفة لخريج علوم هى التدريس وده علشان الوظيفة دى بيفضلولها خريجين كلية التربية , وعلوم ليها وظائف تانية كتير جدا واعتقد ان الاخت THE_SAD_SMILE ردت على السؤال ده كويس جدا وليها منى جزيل الشكر ولو عايز اى استفسار تانى بخصوص الموضوع ده قولى وانا اسئلك زمايلى اللى فى الاقسام دى .

3-اعتقد ان علوم القاهرة تعتبر احسن كلية علوم فى مصر , خاصة من ناحية التنوع فى اقسامها وكمان يعتبر هيئة التدريس عندنا من اضخم واعرق هيئات التدريس فى كليات العلوم , لكن بالنسة للمقارنة مع جامعة عين شمس فانا ماقدرش افيدك اوى للاسف بس انا عن نفسى بفضل القاهرة خصوصا للمميزات اللى قلتلك عليها , وكمان احنا دلوقتى فى القاهرة عندنا نظام جديد للى داخل جديد وهو نظام الساعات المعتمدة وده نظام جميل جدا ومش موجود إلا فى علوم الاقهرة على حد علمى ,وماتنساش حاجة مهمة جدا انك لو رحت اى جهة حكومية ضخمة زى مركز البحوث مثلا للتدريب او الشغل بيقبلوا علوم القاهرة بسسسس فى الغالب ودى عن خبرة شخصية , يعنى بصراحة كدا جامعة القاهرة بتفتحلك ابواب كويسة بعون الله. وفى الاخر القرار الاخير للتوزيع الجغرافى زى ما قالت hahh فعلا.


4-السؤال ده مهم اوى فعلا , وانا إن شاء الله هسألكم زمايلى اللى فى قسم الحاسب والمعيدين والدكاترة اللى اعرفهم عن السؤال ده وإن شاء الله ارد قريب. بس اعتقد انه ينفع كدا إن شاء الله.

5- النظام انك بتدرس اربعة مواد اجبارى وهى : الكيمياء _ الفيزياء _ الرياضيات _ الانجليزى (ترم اول فقط )
وبتختار تخصصين تدرسهم فى سنة اولى وهما ممكن يكونوا:_
_ مواد خاصة بعلمى رياضة مثل: جيويوجيا _ميكانيكا
_مواد خاصة بعلمى علوم مثل : بيوفيزياء_بيولوجى او بيوفيزياء_ حيوان او نبات _حيوان

وفى مواد كدا صغيرة بتكون بالعربى بتختار منها مادة الترم الاول ومادة الترم التانى وبتكون زى : حقوق الانسان او حاسب الى وحاجات كدا
وعلى فكرة النظام ده جديد مش بقاله إلا السنة اللى فاتت اوى علشاشن كدا انا مش عارفة عن المواد دى كتير بس هعرفلك من الكلية إن شاء الله من اللى كانوا فى سنة اولى السنة اللى فاتت.

_ واحب اضيف ان فى نظام الساعات المعتمدة ده فى حاجة اسمها " Summer course " يعنى لو حد شال مواد لا قدر الله بياخدها فى الاجازة ويمتحن فيها ويطلع تانى سنة بيور وده طبعا نظام جميل جدا ولسه جديد زى ما قلت.

ماتقلقش بخصوص الاسئلة عادى اسئل براحت.
واتمنى انى اكون افدتك ويا رب القلق اللى عندك ده يخلص قريب وانصحك بصلاة الاستخارة وانك تروح الكلية وتشوفها بنفسك وبجد هتحبها اوى إن شاء الله.
ولو عندك اى اسئلة اسأل على طول مفيش مشاكل وربنا يوفقك يا رب.

<div class='quotetop'>إقتباس(hahh @ Aug 8 2007, 12:54 PM) [snapback]344949[/snapback]</div>

- هل ممكن فيما بعد انى اخد دورات برمجة وجرافيك وتصميم مواقع واكون بنفس كفاءة خريج حاسبات ومعلومات او هندسة قسم حاسب الى ؟؟!!!!


انا نفسى موت فعلا اعرف اجابة السؤال ده لانى فعلا نفسى ابقى بكفاءة خريج حاسبات حتى لواخد كورسات طول عمرى وياريت لو فيها تعليم مفتوح او اى حاجة

بس اللى سمعته بجد عن علوم بيقول انها كلية جميلة جدا ومش صعبة بالقدر اللى ناس بتقول عليه

والله الموفق[/b]

انا هسألك عن الموضوع ده يا hahh انتى واينشتاين وإن شاء الله اجاوب عليكم قريب.
وفعلا كلامك صح يا hahh عن كلية العلوم هى جميلة جدا ومش صعبة زى ما الناس بتصور بس هى محتاجة شوية اهتمام وتركيز.

<div class='quotetop'>إقتباس(hahh @ Aug 12 2007, 11:50 PM) [snapback]347022[/snapback]</div>

ربنا يخليكم على المعلومات الهايلة
بس كنت عايزة اعرف هو فى قسم فى علوم القاهرة اسمه حاسب سبشيال وشكرااا[/b]

اه فيه يا hahh والتخصص فيه بيقى من سنة تالتة بعد ما تدخلى قسم رياضة _حاسب فى سنة تانية

<div class='quotetop'>إقتباس(-سوسو- @ Aug 17 2007, 03:26 PM) [snapback]349338[/snapback]</div>

طب فى قسم جديد فى علوم القاهرة اسمة (البيو تكنولوجى )حد يعرف دة عبارة عن اية و اية الوظايف المتاحة من القسم دة

و ياريت تقولوا اية هو احسن قسم فى كلية العلوم علشان انا داخلة علوم القاهرة ان شاء الله السنة دى[/b]

اهلا وسهلا بيكى يا سوسو
القسم ده عبارة عن قسم بيدرس مواد الاحياء والاحياء الجزيئية اللى زى الخلايا والانسجة والهندسة الوراثية وحاجات زى دى , وهو قسم جامد على فكرة علشان كدا هو غالى شوية.

ومجالات الشغل كثيرة ومنها : الشركات والمصانع ومعامل الهندسة الوارثية وكذا مكان تانى.

واللينك ده بيتكلم عن القسم ده من السايت بتاع الكلية:_

http://www.science.cu.edu.eg/english...e/new-prog.htm

ولو عايزة معلومات اكتر عنه اقوليلى وانا اسألك إن شاء الله .

واحب اضيف هنا عنوان موقع كلية العلوم_جامعة القاهرة , لو حد عايز يعرف حاجة معينة ,ممكن برضه يلاقيها عليه:_

كلية العلوم _جامعة القاهرة



وشكرا لكل اللى شارك فى الموضوع وشكرا للى اضاف معلومات.
وشكر خاص للاخت _ THE_SAD_SMILE_ على اضافتها الرائعة وجزاها الله كل خير.


شكرا جزيلا