سلام عليكم
أولاً : أهلاً وسهلاً بيكي في احلى علم في الدنيا ... علم الرياضيات
ثانياً : باختصار شديد حضرتك لو عاوزه تجمعي بين الديكور و العمارة و التشييد .... يبقى عليكي و على فنون جميلة عمارة ...
أما لو عايزة تجمعي بين العمارة و التشييد فقط ... يبقى هندسة عمارة ...
فنون جميلة عمارة حضرتك بتمزج بين الفن و الهندسة و التطبيق ... اما هندسة عمارة فبتمزج بين الهندسة و التطبيق فقط ... و لذلك بيفضلوا فعلاً فنون جميلة عمارة على هندسة عمارة لأن فنون جميلة عمارة قدراتها في الدراسة أعلى و أرقى من هندسة عمارة ..
ثالثاً : كله زي بعضو حضرتك مفيش حاجة اسمها الأفضلية لمين ... الأفضلية في دراسة العمارة طبعاً هيا فنون جميلة عمارة , لأنها بتشمل العمارة بكل نواحيها فنياً و هندسياً و تطبيقياً ... انما الوظيفة واحدة و هيا مهندس معماري ....
الأولوية طبعاً للمتميز في دراسته سواء هنا أو هنا ...
اما لو بتختاري مؤهلات ... فابعدي الفنون التطبيقية لان مفيهاش تخصص عمارة او ديكور ... الديكور في قسم الفنون بكلية الفنون الجميلة ...
المهم ... لو قدامك مؤهل هندسة و مؤهل فنون جميلة ... لو بتفكري صح و قعدتي تحسبيها ح تلاقي ان فنون عمارة هيا اللي ليها الأولوية لأن فنون عمارة جامعة بين العمارة و البناء و التشييد و الديكور ... يعني لو قدامك مبنى و عايزة تنسيقيه صح .. ح تحتاجي مهندس معماري من فنون جميلة ينسق لك البيت من بره بمظهر فني معماري جميل و من جوه برضه بمظهر معماري فني ... اما هندسة عمارة فهو بيطبق الهندسة كهندسة مش كفن و كهندسة مع بعض ... يعني لو طلبتي منه يعمل بيت ح يعمله سطحي من غير جماليات أو مظهر فني متميز ... فبذمتك اللي ح يشتري المبنى او البيت , او اللي عايز يعمل بيت الناس تحسده عليه
, ح يختار مين ؟
و ممكن تسألي دكاترة هندسة عمارة نفسهم ...
الشركات بتدور على كده .... و ألمانيا معروف أيضاً انها بتحتاج للمهندسين المعماريين الجامعين بين الفن و الهندسة .... دول اوروبا بتموت في حاجة اسمها فن على فكرا ...
و بعدين المستقبل بإيد ربنا .... ازاي حضرتك مفكرتيش في دي ؟
رابعاً : فنون تطبيقية مالهاش دعوة بالعمارة و لا ينفع تقارنيها بفنون جميلة عمارة ... فنون تطبيقية بتهتم بصناعة المنسوجات و طباعتها و بفن النحت و التشكيل و الزخرفة و الجرافيك .. لكن مفيهاش عمارة ...
خامساً : ميزة فنون جميلة عمارة ان عددها قليل و هيا موجودة في تلات أماكن بس : حلوان - اسكندرية - المنيا .... يعني عدد الطلاب مبيكملوش 400 .... لكن اعداد هندسة عمارة بتبقى اكتر و الدكاترة بتوع هندسة عمارة بيضايقوا من الزحمة فبيرتاحوا في شغلهم في فنون عمارة ( على فكرا في فنون عمارة ح تلاقي دكاترة و اساتذة من هندسة بييجوا يدوا في فنون عمارة ) .
فلو بتدوري على الوظيفة ... الشركات حالياً مبتاخدش غير العدد القليل ... ( و ده مش مدح في كليتي ... الواقع هوا اللي بيقول كدا ) ..
يعني ايه السبب ان طلبة حاسبات و معلومات بيشتغلوا بسرعة و من غير واسطة ؟ لأن عددهم قليل في اي جامعة ....
سادساً : طبعاً علشان تدخلي فنون عمارة لازم تاخدي قدرات في ثانوي ( اسم المادة : قدرات عمارة ) و بتمتحينيها مع امتحانات آخر السنة و لازم تجيبي لائق فيها علشان تدخلي فنون عمارة ..
و علشان تدخلي هندسة عمارة لازم تجيبي في كلية هندسة تقدير جيد في إعدادي , بالإضافة إلى إنك لازم برضه تمتحني امتحان القدرات اللي يدخلك القسم ده و اللي بتعمله الكليه و لازم تجيبي لائق برضه ...
سابعاً : هندسة عمارة التخصص نفسه اربع سنين فيها , اما فنون جميلة عمارة خمس سنين منهم سنة اعدادي لتخصص العمارة و فقط .. و دي ميزة بتميز فنون جميلة عن هندسة ...
ثامناُ : فنون جميلة عمارة و هندسة ولاد عم ... و لقبك الوظيفي رسمياً مهندس معماري و ليكي نقابة مهندسين و الحاجات الاضافية دي ...
تاسعاً : عيب هندسة عمارة ان حضرتك بتتخصصي في الفرقة الرابعة ( سنة رابعة يعني ) في اقسام فرعية و منها : الإسكان - المباني العامة - التصميم الحضري ..
يعني مشروع تخرجك ح يكون مقام على قسم معين ..
فنون عمارة بقى ح تاخدي فيها مواد التلات اقسام دول و مشروع تخرجك ممكن تعمليه في اي مجال يعني مش تخصص في مجال معين ... يعني مشروع تخرجك حر ...
عاشراً : اللي قالق هندسة عمارة حالياً هوا اتفاقية اليونسكو للعمارة و اللي ح تنطبق عام 2011 ... الاتفاقية دي بتنص ان دراسة العمارة لازم تتم في خمس سنين مش اربعة ... و ده مطمن بتوع فنون عمارة , لان فنون عمارة خمس سنين اساساً ...
11 :- بس برضه الاتفاقية دي مش مرعبة للدرجة لان هندسة عمارة بيُعاملوا كأنهم أخدوا العمارة في خمس سنين ..
12 : - طلاب فنون عمارة بيتدربوا من سنة تانية في شركات كبيرة و مكاتب استشارية كبيرة ..
13 : - المواد اللي بتدرسيها في فنون عمارة هيا هيا المواد اللي في هندسة عمارة ... بل ان في مواد في اولى هندسة عمارة , فنون عمارة بياخدها في اعدادي عمارة ...
و الأخ العزيز EnG.Mohammed حط رابط لموضوع بيوضح الفرق بين هندسة عمارة و فنون جميلة عمارة ..
أرجو اني افدت حضرتك
و جزاكم الله كل خير