نظام الامتحان
نتكلم بقى شوية عن الامتحانات
نظامها ايه ودرجاتها وبتكون امتى....
احنا قلنا ان كل مادة بننقسم في امتحانها على اربع امتحانات
أعمال سنة وعملي ونظري وشفوي
درجات الامتحانات دي ازاي؟
أعمال السنة 20%
العملي 20%
الشفوي 20%
والتحريري 40%
وأحيانا بيغيروا نسبة التحريري عشان يبقى 50% على حساب درجات الشفوي
نتكلم الاول عن امتحان أعمال السنة
عبارة عن ايه
امتحانين واحد في نص السنة في أخر شهر يناير كده
والتاني في اخر السنة مع امتحانات النظري
نظام الأسئلة كلها اختيار من متعدد MCQ (Multi Choice Questions) وأسئلة صح وغلط
ومدة الامتحان بتكون نص ساعة او ساعة الا ربع على حسب المادة
وقلنا عليه 20% من مجموع المادة
يعني التشريح مثلا من 250 درجة 50 منهم اعمال سنة
مكان الامتحان
قاعات الامتحان وهما قاعتين كبار واحدة فوق في الدور الرابع عند مكتبة الكلية
والتانية تحت مدرج حافظ
امتحان العملي
وبرضه عليه 20%
ميعاده في أخر شهر أبريل
وأحيانا التشريح امتحانه العملي بتاعه بيتأجل ويكون مع امتحان النظري في الاخر
مكانه
كل مادة في القسم بتاعها
نظام كل مادة
التشريح
هاتكون اللجنة فيها جارات وعضم حوالي 15 عينة
كل عينة واقف عليها طالب بيمتحن
والدكتور ماسك وقت بعد شوية هايقول change كل واحد يسيب العينة اللي بيمتحنها ويروح اللي بعدها
كده يعني
معاك في ايدك ورقة اجابة بتجاوب فيها عن الاسئلة الموجودة جنب كل عينة
والاسئلة دي بتكون بالمنظر ده عند كل عينة
A. Identify ……ويكتب رقم
B 1. Identify……….
2 . سؤال نظري على الشيء اللي اتعرفت عليه ده
بتخلص كل العينات وتسلم الورقة وتمشي
امتحان الفسيولوجي
بيتعمل في الاول كده امتحان بسيط بـ 5 درجات بس عشان يعودك على نظام الامتحان
بيكون بعد حوالي شهرين من الدراسة
وبعد كده بقية درجة العملي بتمتحنها في امتحان اخر شهر اربعة
نظام الامتحان
هتدخل اللجنة تلاقي صورة موجودة قدامك او جهاز وورقة مكتوب فيها سؤال
الصورة دي هتلاقي فيها رسمة منحنيات او تجارب من اللي عندك في المنهج
السؤال تحضره في ذهنك كويس عشان هايدخل دكتور يسألك السؤال ده ويشوف اجابتك ايه
امتحان الهستولوجي
بيكون عيارة عن محطات برضه وبتتنقل من كل محطة للي بعدها لما الدكتور يقول Change
المحطات دي عبارة عن ايه
صور وميكرسكوبات
حاجات هاتدرسها طول السنة في السكشن ويكون في سكاشن مراجعة اخر السنة كمان
وان شاء الله هتلاقي الموضوع سهل
امتحان البيوكيمستري
هتدخل اللجنة تلاقي محلول قدامك في انبوبة اختبار والمطلوب منك تتعرف ايه المادة دي
وهتلاقي بقى في لجنة الامتحان كل المواد الكيميائية اللي درستها وممكن تساعدك تتعرف على المحلول ده
وهاتبقى في خطوات معينة بتتعمل ورا بعض عشان توصل للمحلول ده
هتدرسها برضه وتحفظ التفاعلات دي كويس وتعرف ترتيبها عشان تتعرف على المادة اللي قدامك
وبرضه هتلاقيه امتحان سهل جدا ان شاء الله
كده امتحانات العملي خلصت
ملحوظة
كتاب العملي بتاع كل مادة بيكون عليه جزء من درجات العملي حوالي 5-10 درجات
ملحوظة تانية
امتحانات العملي بتكون 4 ايام ورا بعضها ومفيش بينها فاصل
اعمل حسابك وذاكر العملي بدري عشان متلاقيش نفسك اتزنقت ساعتها
منهج العملي فيه حاجات زيادة عن النظري ماتعتمدش على مذاكرة النظري بس