بداية السلام عليكم
انا ف الحقيقة ثانوية معادلة من السعودية وكان حلمي انا ابقى دكتور واهوا الحمد لله ربنا حققلي امنيتي
وكمان انا لما سألت على الطب البشري والفرق بينه وبين الاسنان عرفت انه الاسنان احسن بمراحل
ودا لانه 5 او 6 سنين بس والبشري 7 ( ربنا يعنيهم
)
وكمان ف طب اسنان ممكن تفتح عيادة مباشرة ..
وكمان اسهل من البشري والصيدلة (دا على كلام واحد ف خامسة بشري ) وحاجات تانية كتييير ..
... اسنان المنيا كانت رغبتي الاولى فى دماغي والـ14 فى الرغبات
اصل اهلي كانوا هيوروني الويل لو ماكتبتش البشري
دا انا كمان قولت لواحد صاحبي لو جالي بشري ، احول اسنان ؟؟
قام باصصلي كدة <_< و قالى : علشان ي***وك ف البيت
فالحمد لله انها جات من عندهم ..
المهم .. احب ارحب بكل زمايلي اللى معايا فى اسنان المنيا واللى داخلين اسنان فى كل حتة ف مصر
وكان عندي شوية اسفسارات كدة يعني لو مفهاش غلاسة
؟؟
اسال عادي يعني ... اوكي طيب
اول حاجة بالنسبة لاعدادي (اللي هوا احنا يعني
) طبعا هناخد محاضرتنا فى علوم ... صح !
طيب هل الدكاترة اللى هيدونا المادة هيكونوا ان شاء الله من علوم ولا من اسنان ؟؟
دي اول حاجة .. تاني حاجة بقى .. بما اني معادلة والتوزيع الجغرافي ملغي علينا ..
فانا فكرت اني احول للقاهرة .. او اسكندرية .. بس انا سمعت انه المنيا والقاهرة عندهم مستشفى خاصة بيهم مكتوب عليها " مستشفى كلية طب الاسنان " زي ما هوا واضح تحت كدة ..
لكن في بعض الكليات لاء
.. فانتو اية رايكم احول ولا لاء ولا اية
؟؟
وكمان دفعتنا بقت 235 طالب ( اصل احنا -المعادلة- شرفنا الكلية
.... معلش ازحمت شوية بس استحملونا بقى
)
واللى مضايقني انا بتوع اسنان عين شمس 165 بس
دول زمانهم هليعبوا كورة فى المدرج
تالت حاجة ودي الاخيرة ( عشان انا عارف اني طولت عليكوا .. انا اصلا رغاي حتى فى المنتديات
)
ازاي اغير الكلام اللى تحت اسمي فى المنتدى من عضو جديد لاي حاجة تانية مثلا ( طالب جامعي بتاع اسنان )
او اي حاجة يعني
؟؟
ومتشكر جدا ا جماعة .. واسف فعلا انا كنت طولت عليكو
فى انتظار الردود ...
اخوكم / مصطفى