الحياة ...إما مغامرة جريئة ...أو لا شئ !

[M.Sherif]

كلماتي أهديها إلي كل يائس
ـــــــــ
ــــ



قالوا يا عم الفشل .... دي الخيبة بالويبة
تروح تعيد من تاني.....و دي عيبة و مصيبة
قلنا الفشل يا جماعة ....... خطوة لكل نجاح
قلنا الفشل مش عيب ..... نظرتكوا دي كئيبة



قالوا يا عم اتدارَي .....و خش جوه جدار
عيش عيشة المساكين.... و اياك تدوس في النار
قلنا الجدار و النار ...... ده مبرر الفاشلين
الدنيا يا مغامرة ......... يا حمار و جَمْبُه حمار



ــــــــ


قالوا يا عم دماغ ........الخيبة دي مصيرك
و لا يوم هتقدر تنجح...... غير مرة ده كبيرك
قلنا حياتنا غِلاباَ...... و هدفي حَتْمَا يحصل
الدنيا عايزة ارادة ....... و دي طالبة تغييرك



و بقول يا راجل اعمل...........كل اللي بتخافه
مش شايف انت الغيب...........بس القدر شافه
ليه تعيش تخاف الفشل.......ليه تخاف تعيش ف النور؟
في الضلمة جوه هدوم.........متغطي بلحافه






الخوف قفص للروح....... ازاي تعيش مسجون؟
مفتاحه جوه العقل ........ازاي تسيبه يهون؟؟؟؟؟؟؟؟
مفتاحه حتة دهب........ جواك سبايك ماس
لو المغامرة جنان..........أنا أحب أعيش مجنون





اليأس رابط قلبك ........ و الهم شل ايديك
الخوف محوط مخك....... و ضبابه جوه عنيك
يا تعيش بقوة تغوص .....في وسط أسخن نار
يا تموت جبان و الذعر .....قاطع عروق رجليك






انسان بدون أهداف ........ده سفينة من غير ناس
اتنين مصيرهم واحد......علي الصخور ينداس
خَطَّطْ خِطَطْ خطواتك .......حَدِّد حدود لحياتك
نَظَّمْ نظام منظوم ........و برضه بالاحساس




علشان تقف في محلك.......ولا ميت سنة هَتِتْقَدِّم


علشان تخاف م الخطوة .......عمرك كده ما تتعلم
في الكون مافيش ثابت........ الا القبور و الجثث
اياك تعيش ميت............... علي الحياة هَتِتْنَدِّم



عَجَبْ عُجَاب و عَجِيب ........ العقل ده معجزة
جواه خلايا خيال.............. ولا طب ولا هندسة
تقدر تِحَكِّمْ عقلك............تقدر تِشَغَّلْ مخك
الخطة دي في وقتها.........و الفكرة مِتْنَفِّذَة






عجبي علي اللي عَمَلْ ......الفِعْلة دي كل يوم
يعمل نفس الحاجات ......م الصبح بَدْري يقوم
و تِضْحَك انه مُصَمِّم........يشوف نتيجة جديدة
غَيَّر نفسك يا صاحبي........ هتعيش كتير موهوم؟؟؟





جنينة النجاح في ميدان........ و شارعها فيه محطات
تعب كفاح و جهاد ..........يأس و فشل و آهات
و محطتك لعبتك .......... يا تنام في كل محطة
يا تسابق الزمن ........... و تكسر الإشارات





اوعا تقول الظروف..........ظروفك صنعتك
أثَّر و مش تتأثر...........الدنيا دي لعبتك
اخلق لنفسك حالة..........تحقق فيها أملك
ساعتها تعيش بكيفك .......و يا جمال دنيتك



نُقَعْ عشان نقوم......ننام عشان نفوق
نِتْهِزِم عشان النصر.....و لتحت عشان لفوق
سِلِّمْ عشان نِعْلا ......... نِطْلَعْ عشان أعلي
سر النجاح الفشل.......و انا للنجاح مخلوق