سندوتش ثقافه

[FRANKENSTEIN]

"سندوتش" ثقافة
انا معاك ان الصحافة الالكترونية غطت على الصحافة المكتوبة.
وان شباب هذا الجيل لا يميل لمطالعة الكتب.
ماشى لكن خد بالك ثقافة "التيك اواى" وحدها لا تكفى ...
ثقافة اتصفح ع الماشى عبرالمواقع لا تصنع فردا متفوقا .

لابد من التعمق.
لابد من تنويع مصادر المعرفة

التفوق عايز ثقافة والثقافة عايزة مواقع وجرايد وكتب وبرامج وحوار مع الشلة.

التفوق عايز سماع ..عايز إصغاء وقت الحوار ..والحوار النافع "ودن" قبل ما يكون "لسان"..ميزه خلقها فينا ربنا ان كل واحد له لون ..اسمع صاحبك بيقول ايه ..وانت قول رايك ..بكده تتعلم منهم وتعلمهم .

وإياك وعقلية "one way" ..فكر الاتجاه الواحد الخالى من التكامل ..اللى بيشوف جزء واحد من الصورة

تصدق هى دى مشكلة "الشيوعية" وهو دى مصيبة "الرأسمالية" ..

"الخبز او الحرية" ..الشيوعية اكل مضمون بالبطاقة .. واللى بيتكلم بحرية ع السجن او المشنقة ..الرأسمالية ظلم اجتماعى لدرجة واحد عنده فلوس ميملكهاش سكان مدينة مع حرية لدرجة "الحب ع الرصيف"

نرجع لموضوعنا..
اذا كانت القراية ع الكمبيوتر لها وضع يكتف :
تثبيت رقبة وقعدة كرسى ومسكة فأر..فالقراية مع الكتاب فيها استرخاء ..مرة اودة ومرة صالة..وحبة شلته ..وحبة سرير .. دا غير راحة العين من موجات الشاشة حتى مع الفلتر ..

ريح عينك وريح عقلك وخش ع الكتاب والجريدة مع الموقع والفضائيات.
بالطريقة دى تحقق التوافق فى تكوينك الفكرى .
يعنى ان كان تنويع مصادر الوعى ما بين كتاب ومجلة وصحيفة ونت وبرنامج وفيلم..فحتى الفيلم لازم يتنوع ما بين اكشن ورومانسى واجتماعى ووطنى...
مرة كوميدى ومرة تراجدى
مرة درامى ومرة تسجيلى

وخايف اقولك سيب الافلام الهايفة وخش على "فيلم ثقافى"تفهمنى غلط.