قصيدة مأساوية

[aliasdhade]

المصدر: محمد سمير

هنعمل أيه أنا و أنت وهيَ .. لو

لو خلوها دوله مباركيه ... وباعوها بعقود رسمية
لو جابوا فيها100داخلية ... وطوارئ واحكام عرفية
وعذبوني وبهدلوا فيا ... لوقتلوني ومثلوا بيا
وقالوا لفافة بانجو غبية ... مصر هاتفضل غاليه عليا
بردو هاتفضل غاليه عليا
.
بردو هطالب بالحريه ... وهقدم روحي لبلدي هدية
وإيش اكون انا وسط الفداويه ... نديم وعرابي ، زغلول وصفية
أحمس ، مينا ، قطز ، الجهادية ... ضباط أحرار ، ناصر القومية
سادات ، حكايات ، حرب مدوية ... أبطال عظماء ، بطولات تاريخية
وعلشان كدة راح أقولها قوية ... مصر هاتفضل غالية عليا
أيوة هاتفضل غالية عليا
.
لو فرعون حبس الموساويه ... لو قراقوش منع الملوخية
لو سحلوني ، ضربوني برزية ... بردو هاقولها ومدوية
لا جمال ولا عزو هيلعبوا بيا ... ومفيش توريث ياواد انت وهي
تورثوا مين دة انا مـ الجماليه ... قال ايه توريث ، فاكرنها تكية
راح الم الناس واعملها قضية ... وهخليها فضيحة عالمية
يلا "كفايه" سرقة يا حرمية ... وهتلاقوا غيري مليون شخصية
قادة وعلماء و افندية ... وشباب جامعات ، حركات شعبية
كله هايصرخ صرخة قوية ... مصر هتفضل غاليه عليا
مصر هاتفضل غاليه عليا
.
فاكرين نفسكوا جامدين با عنيه ... اجمد من مين كان غيركوا رزيه
هكسوس وتتار ، حملة فرنسة ... بريطانيا العظمى احتارت فيا
قالوا عنى دة شعب عظيم قالوا فيا ... حكايات ، اساطير ، قالوا شوكتوا قوية
وعلشان كدة كلمتنا اهيه ... هنحررها ، وايامنا الجاية
ولو هنموت تمن الحرية ... ماهي طول عمرها بدمانا مرويه
راح اموت وانا ابني بيصرخ فيا ... مصر هاتفضل غالية عليا
يا ابويا هاتفضل غالية عليا
.