هو ايه هدفك في الحياة ؟

[titohakar]

هو ايه هدفك في الحياة !!

هذا السؤال يتردد علي السنتنا كثيرا وعندما نواجه به أي شخص ونسأله

( هو ايه هدفك في الحياه )

- واحد يرد علي طول ويقولك هدفي في الحياة كذا وكذا
- واحد تاني يفضل يفكر ويقول انا ايه هدفي في الحياه
- واحد يقولك أي حاجة علشان يعرفك انه عارف

ودلوقتي جه الدور عليك وانا هسألك ( هو ايه هدفك في الحياة ؟ )
انا دلوقتي مش شايفك انتا ممكن تقول أي اختيار من التلاته بس اكيد لو مش عندك هدف هتفكر وتقل انا ايه هدفي في الحياة وانا عايزك تعمل كده . في بعض الافراد ليس عندهم اهداف في الحياه وعايشين زي ما الدنيا تعمل فيهم وخلاص وفي افراد تانيه محددين اهدافهم وبيسعوا لتحقيقها وعايشين علشانها .

في افراد مش بتعرف تحدد اهدافها ممكن اساعدك انك تحدد هدفك .

علشان تحدد هدفك لازم تفكر كالآتي وتسأل نفسك السؤال ده :-

- انا اتخلقت ليه ؟ هيكون ردك علي طول ان أعبد الله ( وما خلقت الأنس والجن إلا ليعبدون ) في ناس ممكن تقول يعني انا هفضل اعبد ربنا ولا هخرج ولا اتفسح ولا كده . نقول لا لا لا انتا هتعبد ربنا وتخرج وتتفسح وتتجوز وتلعب رياضه وتعيش حياتك عادي خالص بس لازم تخلي كل ده في طاعه الله .
يعني انك تتجوز و تخلف اولاد ويكونوا عباد صالحين كده يبقي ده عباده لله

وبعدين تقعد بقي وتسال نفسك انا عايز ابقي ايه ؟ ممكن تقول

- عايز ابقي اكبر دعاة المسلمين علشان ادعوا الناس للدين .
- عايز تبقي مهندس كبير علشان تقوم ببناء المستشفيات والمدارس وتساعد المجتمع .
- وكل واحد وله هدف بقي حسب امكانياته وطموحه في الحياة .

أنواع الاهداف

- اهداف رديئة .
- اهداف جيده ولكن زائلة .
- اهداف طموحه لا تنتهي .

تعالا نفسر كل نوع لوحده

- اهداف رديئه :

ودي اهداف ساذجه سوري اني بقول اللفظ ده زي انسان مثلا هدفه في الحياة
انه يكلم البنت دي بس . وانسانه تانيه هدفها في الحياة ان الافراد يعجبوا بيها .

وهيا دي الاهداف الرديئه

- اهداف جيده ولكن زائله :

ودي اهداف جيده ولكنها تزول بمعني ان انسان مثلا هدفه انه يتجوز ويربي اولاده التربيه الصالحه ويساعدهم علي الاستقرار والانسان ده كبر في السن
وحقق هدفه ومفيش عنده اهداف تانيه .

وهيا دي الاهداف الجيده ولكن زائله



- اهداف طموحه لا تنتهي :

ودي اجمل انواع الاهداف لانها اهداف لا تنتهي بمعني انسان له هدف انه
يكون مثلا طالب في الكليه دي وحققه وجه هدف تاني انه يبقي الاول
علي الكليه وحققه وجه هدف تالت انه يبقي معيد في الكليه
وحققه وكده مازالت الاهداف مستمرة لا تنتهي

وهيا دي الاهداف الطموحه لا تنتهي


يا تري بقي انت او انتي اهدافك من أي نوع من التلاته اتمني ان الاهداف تكون من النوع التالت


واخر حاجة بقي شروط تحقيق الهدف

- وضوح الهدف .
- طموح الهدف .
- لا تهاب صعوبه الوصول الي الهدف .
- وجود خطه علميه لتحقيق الهدف .
- بذل الجهد .
- الأمل والتفاؤل .
- الصبر .



يا رب الموضوع يعجبكم وكلنا نستفيد منه ونحدد اهدافنا ونسعي لتحقيقها .