انا وشرطي المرور والثورة

[المريسي]

روحت ارخص الموتوسكل بتاعي من يومين ( اجدد الرخصة )
وطبعا انا كنت رخصت الموتوسكل اصلا من ثلاث سنين
ومتذكر ما حدث جيدا المهم اليكم الفرق في ايجاز
اولا : من ثلاث سنوات ( قبل الثورة )
انا : لو سمحت يافندم عاوز ارخص موتسكل
موظف المرور : الورقة برة علي الباب يابني
انا : عملت الاجراءات المطلوبة تاني يوم رجعت اتفضل يافندم
الموظف : في غلطة في وثيقة التامين تروح تصلحها
انا : حضرتك التامين بعيد من هنا اية الغلطة بس
الموظف : مدة التامين سنة وانت حترخص ثلاث سنوات
انا : طيب حضرتك انتو مش موضحين دا في الورقة برة
الموظف : بالله انت مؤهل عالي دي تفهمها لوحدك وخلصني علشان اشوف غيرك
انا : روحت غيرت الوثيقة ورجعت اتفضل حضرتك
الموظف : الافراج فية غلطة
انا : اية بس تاني حضرتك
الموظف : الختم مش واضح ياخويا
انا : اعمل اية انا يعني يافندم
الموظف : تروح التوكيل هههههههههه ( بيتريق عليا )
انا : هههه بضحك غصبا عني طبعا
الموظف : تروح القاهرة توضح الختم من المستورد في الافراج الجمركي
انا : يانهار ابيض
الموظف : ياما تفتح مخك معايا
انا : استنيت شوية برة ،،،،،،،،،، وبعدين فتحت مخي ( طبعا واضحة ) ومش مع دا بس لا دا لغاية ما خلصت وانا شغال بفتح في مخي لغاية ما بقي كلوا شوارع
.
.
.
.
.

ثانيا ( بعد الثورة )

المرة دي كانت موظفة
انا : لو سمحتي عاوز اجدد رخصة
الموظفة : بكل احترام حضرتك حتعمل كذا وكذا وكذا
انا : عملت الاجراءات ورجعت اتفضلي يافندم
الموظفة : في دمغة ناقصة
انا : ثواني اروح اجيبها
الموظفة : مش اشكال عندي واحدة زيادة
انا : بارك الله فيكي يافندم شكرا جزيلا
الموظفة : تيجي بعد اسبوعين تستلم الرخصة
انا : في قمة السعادة من الفرق في المعاملة بين اول ومرة والان وانصرف في هدوء بعد تقديم خالص الشكر للموظفة
.
.
.
..
.
.

اذن القانون كما هو ولكن فرق التطبيق