فضفضة: نظام التقويم الشامل وإستحالة تطبيقه فى الواقع

[أ/ محمد رسلان]

بصراحة الواحد إتخنق انا مدرس ومش عارف إللى وضعوا التقويم الشامل دول بالنظام القائم دلوقتى إزاى وضعوه ؟
هوه اى دكتور وللا واحد وصل لمنصب ينفصل عن الواقع بالطريقة الفظيعة دى ؟
دول كإنهم مش عايشين معانا ؟ مفيش أى إعتبار عندهم للمشاكل الحقيقية الموجودة بالتعليم زى الكثافات العالية والمناهج البايظة والغير مرتبة وخاصة منهج الرياضيات بالإعدادى والمدارس إللى معظمها فترتين ( وحتى إللى بقت فترة واحدة رجعت فترتين) والله مهزلة إللى بيحصل ده شغل آخر لخبطة حيودونا ويودوا البلد فى داهية
لازم إللى يشارك فى وضع المناهج يكون من المعلمين المشهود لهم بالكفاءة أقول المعلمين يعنى إللى عايشين فى الواقع مش الدكاترة وأصحاب المناصب إللى قاعدين فى المكاتب مع المكيفات
معقولة مش عارفين الواقع الأليم إللى فيه المدرس عشان يعملوا التقويم الشامل ده بطريقة بعيدة عن الواقع وعن ظروف المدارس
وفق التقويم الشامل يا سادة لابد أن يفعل المعلم أشياء كثيرة من ضمنها:
1- يشرح المنهج المقرر ( بكل سلبياته من حشو ولخبطة وتمارين عقيمة وكثرة الموضوعات غير الهامة وتهميش الموضوعات الهامة )وفق الخطة الموضوعة (أقصد المفروضة) عليه ولابد أن يعانى فى توضيح المادة العلميةإللى الكتاب مبوظها
2- يقوم بأخذ الغياب فى أول الحصة (لعدد من الطلاب لا يقل فى الغالب عن60 أو 65 طالب)
3-يقوم طالب طالب شفويا وسلوكيا وفى النشاط مرة كل شهر
4- يقسم الطلاب إلى مجموعات لعمل نشاط مصاحب للمادة مرة كل اسبوع
5- يهتم بالطلاب الضعاف ويعمل لهم برامج علاجية
6-يهتم بالطلاب الموهوبين.
بالله عليكوا المدرس دا إيه؟ إنسان آلى؟ دا بشر زى أى بشر يلاقيها من كثافة الفصول وللا شغب الطلاب وللا المناهج العقيمة وللا من التقويم الشامل إللى عايز المدرس ينتحر؟ إزاى حيعمل كل ده؟
نفسى واحد من إللى وضعوا التقويم الشامل ده يكون عنده الشجاعة ويعيش التجربة فى الواقع ياريت يجرب يشتغل اسبوع فى أى مدرسة ويقوم بكل الكلام المطلوب فى التقويم الشامل فى ظل الواقع المرير إللى بنعيش فيه وإن شاء الله يا إما حيتجنن يا إما حينتحر يا إما حيتوسل لزملائه واضعى التقويم الشامل لإلغائه
إن تطبيق نظام التقويم الشامل ده فى ظل البيئة غير المناسبة والظروف التعليمية المتدهورة وواقعنا التعليمى الواضح لنا جميعا فى مصرنا الحبيبة أشبه بواحد بيبنى بيت ويجمله ويصرف على تزيينه والبيت أصلا أساسه بايظ
اتقوا الله يا مسئولى التعليم يا إما إرحلوا عنا وفارقونا بصراحة إنتوا سبب تدهور التعليم بقراراتكم غير المدروسة دى والمنفصلة تماما عن الواقع
وأخيرا أعتذر لزملائى عن الإطالة ولكنى حبيت أفضفض وأطلع كل إللى فى قلبى وعندى إحساس إنه فى قلوبنا جميعا. إحنا عايزين نشتغل بس بواقعية وليس بأوهام وخيالات ناس ليس لها علاقة إلا بكتابة قرارات وكلام وهمى
بعيد عن الواقع .
ملاحظة مرفق دليل التقويم الشامل للتحميل ياريت تشوفوا الإبداعات الخارقة لأصحاب القرارات إللى فاكرين إنهم بينهضوا بالتعليم بقرارتهم العقيمة و عشان تعذرونى فى كل إللى قولته
زملائى الأعزاء : آسف للإطالة وأتمنى أرى تعليقات سيادتكم وأعتذر لأى خطأ إملائى غير مقصود من سرعة الكتابة
http://www.mediafire.com/?mji9gfjijnqs49q