نفسك تسمع حاجة تخلي كل حياتك تتغير ؟؟

[مريم السباعى.]

قلب معلق بالمساجد;98322]

أنا بافكر في فكرة عبقرية و محتاج مساعدتكم فيها ..

إيه رأيكم نقعد كده زي (تنابلة السلطان ) منعملش أي حاجة في حياتنا ومايبقاش لينا أي لازمة

يعني لا نشتغل و لا نذاكر ولا نتعب نفسنا خالص






انت باين عليكم كده ولاد حلال :biggrin: و بتسمعوا الكلام فأنا (هاسوق فيها :biggrin:) و اقوللكم على حاجة كمان


عاوزين كمان اللي يجوع أو يعطش .. ماياكلش ولا يشرب


و اللي يعيا (يمرض يعني) مياخدش دوا.




- حد يطرد الواد ده من المنتدى يا جدعان ..
.. فين المشرفين اللي هنا ..؟؟؟

- فيه إيه بس يا عم .. و أنا اللي باقول عليكم طيبين و هتسمعوا كلامي

- نسمع كلام مين يابني .. إنت باين عليك اتجننت

- اتجننت ليه بس .. طيب فهمني أنا غلطت في إيه ..

- إنت شايفني مختوم على قفايا (زي هيت مان:SnipeR (54) ولا راكن الفيل على باب المنتدى ؟؟
إزاي يعني الكلام اللي بتقوله ده .. إزاي الواحد ميشتغلش ولا ياكل ولا يشرب .. أمال نعيش إزاي

- خضيتني يا كابتن:SnipeR (75): .. كنت فاكر إنك هتقول حاجة صعبة معرفش أرد عليها
إنت كل اللي همك يعني إنك هتعيش إزاي .. بسيطة .. يعني إنت جيت في جمل .. ولا في فيل ؟؟


بكل بساطة .. لما تكون عاوز فلوس .. أو عاوز أكل أو شرب .. اطلب من ربنا و استنى ربنا يجيبلك اللي انت عاوزه

إيه مش عاجبك ؟؟؟

اعترضوا بقى على كلام ربُـنا


- لا طبعا مش هنعترض على كلام ربنا .. بس ربنا ما قالش كده .. ربنا جعل لكل حاجة سبب .. يعني عشان ربنا يرزقنا لازم ناخد بالأسباب و نشتغل .. و بعد ما ناخد بالأسباب .. نتوكل على ربنا و ربنا هيرزقنا
مش ربنا بيقول فَامْشُوا فِي مَنَاكِبِهَا وَكُلُوا مِنْ رِزْقِهِ وَإِلَيْهِ النُّشُورُ) الملك 15

- طب ما انت حلو اهو و حافظ الآيات كمان ..

أمال اشمعنى يعني لما بنيجي نقول يا جماعة عاوزين نتوب و نرجع لربنا بتقول لي :

إن شاء الله لما ربنا يهدينا .. ادعيلنا يا عم الشيخ
اشمعنى دي مش بناخد فيها بالأسباب

- امممممممممم .. اصــــــــــــــل

-يا عم أقعد بقى ..ده انت منظرك بقى نيلة خالص قدام الأعضاء ..
و فرحان بس (اطردوه من المنتدى) و تصحي المشرفين من النوم :nam:

-مش يا عم الشيخ ربنا هو اللي بيهدينا برضه ؟؟

-دلوقت بقيت عم الشيخ ..؟؟
ما علينا ..

أيوة طبعا ربنا اللي بيهدينا

و ربنا برضه هو اللي بيرزقنا

و هو اللي بيشفينا

اسمع كده كلام سيدنا ابراهيم في سورة الشعراء :

(الَّذِي خَلَقَنِي فَهُوَ يَهْدِينِ (78) وَالَّذِي هُوَ يُطْعِمُنِي وَيَسْقِينِ (79) وَإِذَا مَرِضْتُ فَهُوَ يَشْفِينِ (80) وَالَّذِي يُمِيتُنِي ثُمَّ يُحْيِينِ (81) وَالَّذِي أَطْمَعُ أَنْ يَغْفِرَ لِي خَطِيئَتِي يَوْمَ الدِّينِ)

يعني زي ما هدايتنا بإيد ربنا ..

برضه رزقنا و أكلنا و شربنا و شفاءنا ..

و كل حاجة بإيد ربنا سبحانه و تعالى

يبقى زي ما بناخد بأسباب الرزق بإننا نشتغل ..

و بناخد بأسباب الشفاء بإننا نتعالج

لازم ناخد بأسباب الهداية بإننا نتوب و نطيع ربنا

-بس يعني دايما اللي بنسمعه ..
مثلا الممثلين اللي بيتوبوا .. في يوم وليلة بيتحولوا من قمة الفساد لقمة الهداية

أومثلا فلان الفلاني حصل له موقف ..

أبوه مات في حادثة ..

واحد صاحبه اتحرق ..

اخوه انتحر ...

و بعدين حياته كلها بتتغير 180 درجة و بيبقى (إنسان جديد)

-واضح إنك بتتفرج على سبيس تون كتير

الممثلين اللي بتقول عليهم دول .. إنت بتشوف قصتهم من آخرها

انما هما بيمروا برحلة مجاهدة كبيرة .. يمكن أكبر من اللي انت ممكن تمر بيها بكتير
و بيضحوا بالشهرة و الفلوس و بيتعرضوا لانتقادات كتير ..
و بيتعبوا

يعني مش يوم و ليلة ولا حاجة

ثم هو يعني سيادتك مستني حاجة من الحاجات دي تحصل لك عشان تتوب

مين يا عم قال الكلام العجيب ده

ما هو ده اللي خلاني أتكلم معاك النهارده

إن الشيطان راسم عندك صورة في دماغك ..

إنك هتسمع كلمة أو يحصل لك موقف ..

هتنام بالليل (هوووووووب) تصحى تلاقي نفسك الإمام البخاري

و الفكرة دي هي نفس الفكرة العبقرية اللي انا قلت عليها فوق

إننا نستنى الرزق يجيلنا لوحده من غير ما ناخد بالأسباب

ربنا بيقول في الحديث القدسي

( إذا تقرب العبد مني شبرا تقربت منه ذراعا) صحيح البخاري

أول حاجة إيه .. (من تقرب إلي شبرا)

يعني لازم إنت تاخد خطوة ..

شبر بس ..

هتلاقي ربنا بيسهل لك التوبة و بيتقرب إليك اكتر

أهم حاجة إنك...

تبدأ

و تاخد الخطوة دي

إنما هتفضل واقف كده مستني الهداية تنزل عليك من السما

مستني لما يحصل لك موقف مؤثر

أو تسمع درس أو خطبة يأثر فيك جامد

أو واحد يقول لك كلمة (تهزك )

أو مستني لما أخوك ينتحر

يبقى خليك مستني ..

هتلاقي أخوك برضه مستنيك تنتحر عشان يتوب هو كمان


حتى لو بقيت عضو في منتدى أحلى حياة

و قريت كل مواضيعه

من غير ما تاخد خطوة عملية

برضه مفيش فايدة

برضه لازم إنت اللي تاخد الخطوة و تجاهد نفسك

ربنا بيقول :

(وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ) العنكبوت 69

يعني لازم تجاهد و تشتغل لربنا عشان ربنا يرزقك الهداية


اتفقنا ؟؟؟

الرسالة اللي عاوز أوصلها من الكلام اللي فات باختصار (عشان اللي مش بيحب الرغي)

إن مفيش عصاية سحرية .. هتخلي الواحد يتغير مرة واحدة و يتوب و يبقى من أولياء الله الصالحين

الموضوع محتاج مجاهدة و صبر ..

و لازم و انت ماشي في طريقك لربنا هتقع .. و تقوم .. و تبتلى ..

فكل المطلوب منك إنك تاخد الخطوة و تحاول تقرب لربنا


و ده هيجرنا للكلام عن حاجة تانية ..

إن البعض بيقول .. إن أنا مش همشي في طريق ربنا دلوقت .. لأن دي مسؤلية كبيرة أنا مش قدها !

و أنا لو التزمت دلوقت هاسئ للمتدينين و للدين عشان أنا عارف نفسي مش هعرف أثبت .. و هرجع تاني

فانا هستنى لحد ما أصلح شوية حاجات كده .. عشان لما أتوب .. أتوب (على نضيف)

و ده من أشهر مداخل الشيطان

و رده بسهولة إنك تعرف إنك مش مطلوب منك تبقى معصوم من الذنوب

و محدش من الناس الملتزمين اللي انت بتشوفهم ولا حتى المشايخ معصوم من الخطأ

اسمع كلام حبيبك صلى الله عليه و سلم

(كل ابن آدم خطاء و خير الخطائين التوابون)

فانت مش مطلوب منك إنك تكون معصوم

المطلوب إنك تتوب لما تخطئ ..


مش انك تبدأ (على نضيف) و تفضل كده على طول !!!!



حد فاهمني ؟؟

[/QUOTE]

[مريم السباعى.]

.................................................. .........................

[KhaleD Moustafa]

جزاكِ الله خيراً

موضوع رائع جداً


بوركتِ

[~ Smile 4 Life ~]

كـلام جميل جدا يا مريم
ربنا يبارك فيكي يا حبيبتي
ويتوب علينا ويهدينا ويهدي شباب المسلمين
يـــارب

[ساره جمعه]

موضوع رووووووووووووووووووووووووووووووووووعه يا مريومه جزاك الله خير

[shimaa swelam]

والله فاهمينك....الموضوع اكثر من رائع ثانكس مريومة

[Pro Saher Abdel-Aziz]

اخــتــيـار مــوفــق

[bright stars]

تسلم اديكي....
وجزاكي الله كل خير

[مريم السباعى.]

جزاكم الله كل خير يارب

[أنين الأنين]

موضوع رااائع
جزااك الله عنا خير الجزاااء

[Ahmed-Dragon]

موضوع اكثر من رائع

بارك الله فيك جعله اله بميزان حسناتك

[مريم السباعى.]

بارك الله فيكم على هذالا المرور الطيب وجزاكم الله كل خير

[حسونة بيه]

موووووووووووووضوع اكثر من راااااااااااااااائع جزالك الله خيراااااااا

[المتفائله...]

ربنا يهدينا ويهدى شباب المسلمين
شكراااااااااااااا

[مريم السباعى.]

اللهم انمين يارب