خايف من السنة الجاية

[That Moment]

اهلا بكم اخوتى الاعضاء

انا حاليا فى 2 ثانوى والسنة تقريبا خلصت وده معناه اقتراب السنة المصيرية 3 ثانوى وخايف من حاجات كتير السنة الجاية منها.

1- انا محتار ادخل علمى علوم ولا علمى رياضة فأنا مش بحب الاحياء وفى نفس الوقت الرياضة 2 مش متخيل انى ادرسها اصلا ولكن الصراحة انا حلم حياتى طب او صيدلة وخايف انى ادخل علمى علوم واجيب مجموع ميدخلنيش طب او صيدلة فى حين انه من الممكن يدخلنى هندسه لأن بتبقى فرصة دخول الطب او الصيدلة ضعيفة لكن فى العلمى رياضة بتكون الفرصة اكبر لدخول هندسة لأن تنسيقها اقل شوية ولكن زى ماقلتلكم انا نفسى فى طب او صيدلة وخايف من الموضوع ده.

2-اما المشكلة التانية اللى خايف منها السنة الجاية الامتحانات........ يعنى حاليا ان رغم انى لسه مدخلتش 3 ثانوى لكن كل مابتخيل نفسى فى امتحانات الثانوية العامة برتجف وقلبى بيقف من الخوف فلو انا دلوقتى خايف كده امال لما اروح السنة الجاية وامتحن حعمل ايه؟ الحاجات اللى بخاف منها لحظة الامتحانات هى مثلا انى انسى سؤال انا عارفه او ارتبك واكتب اجابة سؤال مكان التانى او اكتب اجابة غلط من غير قصد واضطر اشخبط او اكتب اجابة فى سؤال سهل واطلع من اللجنة اكتشف انى غلطت فيه وادى نفسى ب100 جزمة واقول ازاى اغلط فيه؟ (ملحوظة:بتحصل معايا كتير) وخايف انى مثلا الاقى معظم الاسئلة صعبة فأنهار او ممكن اصحى متأخر ويفوتنى الامتحان وهى دى الافكار اللى بتخلينى خايف من السنة الجاية وخايف كمان ان ده يؤثر على مذاكرتى واقعد افكر فيه كل شوية .

3- اما اخر حاجة محيرانى هى لما اذاكر المادة هل اذاكرها من مذكرات الاستاذ؟ طيب مش ممكن ييجى فى الامتحان سؤال ميكونش فى ورق الاستاذ بتاعى؟ فياريت الناس المجربة تقوللى لما اذاكر مثلا الادب فى اللغة العربية هل اذاكر ال س و ج من ورق الاستاذ ولاقراها من الكتاب بعدين اذاكر من ورق الاستاذ ؟



اسف لاطالتى .... تحياتى