الشهادات والكورسات التى يجب أن يحصل عليها معلم اللغة الإنجليزية واى معلم ناجح

[Beleh]

السلام عليكم ورحمة الله



أردت من هذا الموضوع أن نتناقش حول الخبرات والمهارات
والشهادات والكورسات التى ينبغى أن يحصل عليها
أى معلم لغة إنجليزية ناجح أو أى تخصص آخر
كى تثرى سيرته الذاتية وتضمن تحديث معلوماته
وتطوير مهاراته بشكل مستمر.

ما هى أهم هذه الشهادات أو الدورات؟
وكيف يحصل عليها؟
وما تكلفة هذه الكورسات أو الشهادات؟
وأى معلومات أخرى ..

كما أتمنى من أى أخ وزميل فاضل حصل على أى دورة
أو شهادة أو كورس أن يخبرنا كيف حصل عليها وكيف أفادته،
ومدة الدراسة بها، وتكلفتها حتى تعم الفائدة على الجميع ..



هيا بنا نفيد ونستفيد معاً ..

[Beleh]

[رمضان الحدينى]

لاعغلغللاعتةغ7

[رضا عبد الحميد عبد الرازق]

بسم الله الرحمن الرحيم
بدايةً الكورسات والدوارات مش كل حاجة ولكن بتحط رجلك على اول طوبة تحت أول سلمة فى طريق اتقان اللغة الإنجليزية المتحدثة وسأحكى تجربتى ان شاء الله بالتفصيل مع الكورسات وكيف استفدت منها غدا ان شاء الله

[Beleh]

المشاركة الأصلية كتبت بواسطة رضا عبد الحميد عبد الرازق

بسم الله الرحمن الرحيم
بدايةً الكورسات والدوارات مش كل حاجة ولكن بتحط رجلك على اول طوبة تحت أول سلمة فى طريق اتقان اللغة الإنجليزية المتحدثة وسأحكى تجربتى ان شاء الله بالتفصيل مع الكورسات وكيف استفدت منها غدا ان شاء الله

فى انتظار تجربتك استاذ رضا على احر من الجمر
لك كل الود وخالص التحية

[رضا عبد الحميد عبد الرازق]

بسم الله الرحمن الرحيم

سأبدأ من الأول أرجوا ألا تملوا

تخرجت من كلية الأداب جامعة المنصورة وهى كما تعلمون دراسة اكاديمى لا تهتم بالنطق كثير المهم كان كل همى أحفظ شوية جرامر علشان شغل الدروس والتدريس وربنا وفقنى وعملت سمعة ومكانه الحمد لله ولكن أنا لست راضيا عن نفسى مدرس انجليزى مش عارف يقول كلمتين على بعض حاولت مع نفسى بس مش عارف اعمل وأبدأ ازاى وبعد حوالى 7 سنوات شغل تدريس ذهبت الى المنصورة رغم انها تبعد حوالى 45 ك عن قريتى التى أعيش فيها "الستامونى " وأخذت ليفل محادثة فى المعهد البريطانى وكانت البداية عرفت مستوايا وانا فين بالظبط وكانت المحاضرة تكبرنى بعام أو اثنين ولكن معها ماستر من الامعة الأمريكية ولما علمت انى مدرس خافت ازاى انت جاى تاخد كورس محادثة وكدة يعنى المهم تحججت انى من قرية وادرس بالعربى وليس هناك فرصة ان اتكلم انجليزى مع الطلاب ....رغم انى لم أستفد كثيرا الا انها كانت البداية لى وعرفت من اين أبدأ بدأت اخش على النت وادور وأبحث على فيديوهات وعلى صوت وسأذكر خطوات

1- فى البداية سجلت لنفسى وانا بتكلم انجليزى فى أى موضوع أى كلام فى أى كلام المهم اتكلم

2- الخطوة التانية كل يوم لازم اسمع انجليزى وخصص جزئية معينة اسمعها واسمعها واسمعها لغاية ما ودانى تورم من السمع بدأت ألقط طريقة النطق زى العيل الصغير بالظبط وهى نفس الفكرة الأستماع المهم ودانى خدت تعبيرات أصلا لا أعرف انطق غيرها الأن مثل more and more انت بتنطقها مور أند مور لالالالالالالالا قل وراى

مُر ان مور وحاجات كثير لسى ربنا يقدرنى وأذكرها بالتفصيل





يتبع

[رضا عبد الحميد عبد الرازق]

نكمل من تانى
إبدأ اتكلم حتى لو مع نفسك تخيل أى موضوع وان فى حد بيكلمك وسجل لنفسك واسمع نفسك وشوف انت نطقت ازاى هتلاقى فى البداية غلطات مش هتصدق ان انت مدرس انجليزى اصلا بس ولا يهمك كل ده ولا حاجة لما توصل لنتيجة مرضية ان شاء الله المهم انك تسمع كثيييييير جدا وتتكلم بالطريقة اللى قلت عليها أما بالنسبة لشغلك فى الفصل حتى لو الطلاب مش فاهمين انجليزى اشرح بالأنجيزى وترجم اللى انت قلته مباشرة حتى يفهم الطلاب لدرجة ان الموجه دخل حصة ليا وكان فى نص استماع وقرأته مرتين بس بطريقتى الجديدة الحلوة قراءة أنجليزى على حق زى الفراشة مش الجماعة اللى بيضغطوا على كل كل لغاية ما يخرروها دم أسف على التعبير بس دى حقيقة مثل leave it حضرتك بلاش حضرتك لاحسن تزعل منى انا كنت بقول " لييف إإتت " وعايز اتنين يضغطوا معايا لالالالالا قل ورايا " ليفيت "

المهم بقى الخيبة الثقيلة لما تيجى تشرح بالإنجلزي مش هاتعرف قل ليه لأنك لازم تحضر جميع الجمل والمفردات اللى انت محتاجة وهتخدمك فى الناحية زى مثلا عايز تقول الفعل يتبع بــــ أو يسبق بــ مثلا فلازم تذاكر شوية جرامر من كتب انجليزية الأصل مش ملخص

على فكرة يا جماعة انا بتكلم بتلقائية واللى شايف ان الكلام ده احتمال يكون خايب وان ما فيش مدرس انجليزى بالمواصفات اللى انا بقولها يا ريت ما يثبتش همتنا ولعل وعسى يكون فى مدرس خايب زى حالتى ويستفيد منها

يتبع

[رضا عبد الحميد عبد الرازق]

بعد ذلك بعد ما دربت نفسى شوية وبدأت أخد ثقة فى نفسى شويتين طبعا زملائى كانوا شموا خبر عن كورس المحادثة اللى انا أخذته وهو لا كورس ولا حاجة ده مجرد ليفل واحد لا راح ولا جه المهم جلست مع زميل دراسة ومدرس مثلى ولكن ملبوخ شوية فى الدروس ومش عايز يصرف على المادة اللى هى مصدر رزقه لا عنده كمبيوتر ولا نت ولالالا على فكرة انا مش بغتابه أه بس أنا بوضح بس والأنكت من كده ان صاحبى ده عند مرونة فى الكلام بس الأول كنت بخاف من الشوية دول وطلبت من صديقى هذا قلتله بما اننا مدرسين انجليزى تيجى نكلم بعض بالأنجليزى وكانت المفاجئة لقد شهد لى صديقى وقال ان مستوايا فى النطق والطلاقة فى الكلام تحسن كثيرا لأنى فعلا بدأت أطبق اللى انا بسمعه وتحمست أكثر وسمعت انجليزى اكثر وأكثر
يتبع

[رضا عبد الحميد عبد الرازق]

كل يوم عدد المشاهدات بيزيد ولا أحد يتفاعل مع الموضوع والناس بتكتفى بالمشاهده 260 شخص شافوا الموضوع ولا واحد عنده حتة خبرة صغيرة يقولها سبحان الله

[حبيبةالرحمن مرعى]

بارك الله فيك

[Mr M.Saber]

استاذ رضا بصراحة كلامك جميل جدا جدا وانتظر تجربتي قريبا

[رضا عبد الحميد عبد الرازق]

يا مسهل يا رب أخيرا حد هيقول تجربته متشوقين لتجربتك مستر صابر

[Mr...Ahmed]

اولا موضوع رائع جدا تسلم ايدك Beleh

ثانيا مستر رضا انت بجد انسان محترم ومثال للمدرس المجتهد وفعلا انا ناوى ادخل فى موضوع الكورسات ده عشان لاحظت ان منذ بدأت مهنة التدريس دى وانا مستوايا نزل جداااااا زيادة على ده انى بشتغل ف الازهر يعنى حتى الموجهين مستوياتهم ضايعة فلازم حاجة تسندنى قبل ما انسى الانجليزى كله
بالنسبة لل ICDL انا اخدتها واحب اقول لجميع الزملاء انها مجرد شهادة ملهاش اى لازمة انما لو عاوزين نؤسس انفسنا صح يبقى لازم نروح للمركز البريطانى او الامريكى وبالذات فى الجامعة الامريكية كورس المحادثة فيها اكثر من رائع و نعمل زى ما مستر رضا عمل امتحانات تحديد مستوى واتحدى الجميع اننا حننصدم من النتيجة عشان بجد اللى احنا بنتكلمه ده مش انجليزى خااااااالص


دى خبرتى المحدودة وبالتوفيق للجميع

[رضا عبد الحميد عبد الرازق]

أستاذ أحمد أولا شكرا على تفاعلك مع الموضوع وعلى زوقك فى الرد
ثانياً أحيى فيك صراحتك لأن موضوع تحسين مستوى المدرس محتاج صراحة واعتراف انه يوجد مشكله
لأن مشكلتنا كلنا هى الطلاقة فى الكلام والنطق ويجد بعض الأساسيات ان عرفتها تجد ان الموضوع بسيط بس محتاجين تفاعل اكثر حتى يتم تبادل خبرات

[Elmistersayed]

شكرا على الموضوع
بصراحة انا اعرف قواعد كثيره للنطق تختلف كثيرا عما نتعلمة فى المدارس والجامعات لان المدارس والجامعات لاتعلم شى أصلا بل هى فقط تفتح لك الباب لتعلم نفسك وتوجد قواعد كثيرة لا يعرفها معظم المعلمين وهذا هو السبب لعدم فهم واستيعاب الكثير من المعلمين لما يستمعوا اليه اثناء الافلام والخطابات وغيرة : على سبيل المثال
nice shoes تنطق nish shoes
accidents تنطق accidens وهناك قواعد أخرى كثيرة تستطيع الحصول عليها من الكتب وهذا (من وجهة نظرى) نادر وصعب الحصول عليه واذا كنت مستمع جيد يمكنك استنباط الكثير من مثل هذه القواعد من خلال الافلام وغيرة ويجب عليك أن تستمع كثيرا حتى ولولم تفهم شىء وانا كنت استمع الى الافلام وغيره ومعى ورقة وقلم وادون كل ما اراه يستحق التدوين وكانت الفائدة والاستفادة من ذلك كبيرة جدا والحمد للة واتمنى ان افيدكم واستفيد منكم فانا معلم ولكنى ابحث عن العلم (خاصة النطق و الاستماع) بكل وسيلة